Gujarat Rain Update: રાજ્યના 265 તાલુકામાં મેઘમહેર, સાંતલપુરમાં સૌથી વધુ 15 ઈંચ વરસાદથી જળબંબાકાર
Gujarat Weather : મધ્ય ગુજરાત અને ઉત્તર ગુજરાતમાં આજે પણ ભારે વરસાદની આગાહી કરવામાં આવી છે. જાણીએ છેલ્લા 24 કલાકમાં ક્યાં કેટલો વરસ્યો વરસાદ
- રાજ્યના 265 તાલુકાઓમાં ભારે વરસાદ, જનજીવન પ્રભાવિત થયું.
- સાંતલપુરમાં 15 ઇંચ, અન્ય પાંચ તાલુકામાં 10+ ઇંચ વરસાદ.
- ભારે વરસાદથી નીચાણવાળા વિસ્તારોમાં પાણી ભરાયા, વાહનવ્યવહાર ખોરવાયો.
- હવામાન વિભાગે આગામી સમયમાં વધુ વરસાદની આગાહી કરી.
Gujarat Weather : ગુજરાતમાં મેઘરાજાએ ફરી જોરદાર બેટિંગ કરી છે. છેલ્લા 24 કલાક દરમિયાન રાજ્યના 265 તાલુકાઓમાં વરસાદ નોંધાયો છે. ભારે વરસાદના કારણે અનેક વિસ્તારોમાં જનજીવન પ્રભાવિત બન્યું છે. છેલ્લા 24 કલાકમાં પાંચ તાલુકામાં 10થી 15 ઈંચ અને 15 તાલુકામાં 5થી 8 ઈંચ સુધી વરસાદ નોંધાતા અનેક નીચાણવાળા વિસ્તારોમાં પાણી ભરાવાની સ્થિતિ સર્જાઈ છે.
સાંતલપુરમાં સૌથી વધુ 15 ઈંચ વરસાદ વરસ્યો છે
રાજ્યમાં સૌથી વધુ વરસાદ પાટણ જિલ્લાના સાંતલપુરમાં 15 ઈંચ નોંધાયો છે. જ્યારે રાધનપુરમાં 13.46 ઈંચ, ભાભરમાં 11.30 ઈંચ, દિયોદરમાં 10.83 ઈંચ અને નડિયાદમાં 10.31 ઈંચ વરસાદ નોંધાયો છે.
અનેક તાલુકામાં 5થી 8 ઈંચ વરસાદ
ભારે વરસાદ ધરાવતા વિસ્તારોમાં મહેમદાવાદમાં 8.39 ઈંચ, દાંતીવાડામાં 7.09 ઈંચ, થાનગઢમાં 7.09 ઈંચ, વાંકાનેરમાં 6.93 ઈંચ, સુઈગામમાં 6.81 ઈંચ, ઓગડમાં 5.98 ઈંચ, દહેગામમાં 5.71 ઈંચ, થરાદમાં 5.12 ઈંચ, સોજીત્રામાં 5.04 ઈંચ અને ડીસામાં 5 ઈંચ વરસાદ નોંધાયો છે.
આ પણ વાંચો: Gujarat Rain Updates: રાજ્યના 11 જિલ્લામાં ભારે વરસાદની આગાહીના કારણે સ્કૂલો-કોલેજોમાં રજા જાહેર
અન્ય વિસ્તારોમાં પણ સારો વરસાદ
આ ઉપરાંત કઠલાલ અને વસોમાં 4.96 ઈંચ, રાપર અને મહુધામાં 4.92 ઈંચ, ધનસુરામાં 4.88 ઈંચ, ખેડામાં 4.76 ઈંચ, માતરમાં 4.72 ઈંચ, ખેરાલુમાં 4.57 ઈંચ, હડાદ અને બાલાસિનોરમાં 4.45 ઈંચ, તેમજ પેટલાદ અને મોરબીમાં 4.41 ઈંચ વરસાદ નોંધાયો છે.
અનેક વિસ્તારોમાં જનજીવન પ્રભાવિત
સતત વરસી રહેલા વરસાદને કારણે રાજ્યના અનેક શહેરો અને ગામોમાં નીચાણવાળા વિસ્તારોમાં પાણી ભરાયા છે. કેટલાક વિસ્તારોમાં રસ્તાઓ પર પાણી ફરી વળતા વાહનવ્યવહાર પર પણ અસર જોવા મળી છે. હવામાન વિભાગે આગામી કલાકોમાં પણ રાજ્યના વિવિધ વિસ્તારોમાં ભારે વરસાદની સંભાવના વ્યક્ત કરી છે. જેને પગલે જિલ્લા વહીવટી તંત્રને સતર્ક રહેવા અને લોકોને જરૂરી સાવચેતી રાખવા સૂચના આપવામાં આવી છે.
બનાસકાંઠાના વાવ-થરાદ પંથકમાં સતત બીજા દિવસે પણ મેઘરાજાએ ધમાકેદાર બેટિંગ કરી છે. માત્ર બે કલાકમાં દિયોદરમાં 1.85 ઈંચ, લાખણીમાં 1.73 ઈંચ, ધાનેરામાં 1.46 ઈંચ અને રાહમાં 1.42 ઈંચ વરસાદ નોંધાયો છે. દિયોદરમાં છેલ્લા 24 કલાક દરમિયાન 11 ઈંચથી વધુ વરસાદ પડતા શહેરના અનેક વિસ્તારોમાં પાણી ભરાઈ ગયા છે. દિયોદર શાળા નંબર-2ના કેમ્પસમાં પણ વરસાદી પાણી ઘૂસી ગયા છે, જ્યારે શહેરના મુખ્ય માર્ગો પાણીમાં ગરકાવ થતાં રસ્તાઓ બેટમાં ફેરવાયા છે અને જનજીવન પ્રભાવિત બન્યું છે.
ટોપ સ્ટોરી
ટ્રેન્ડિંગ સમાચાર
