જૂનાગઢ કોર્ટમાં કીર્તિ પટેલના આંસુ: મીડિયા સામે રડતા રડતા કરી ન્યાયની માંગ, જાણો શું છે સમગ્ર વિવાદ
જૂનાગઢ કોર્ટમાં રજૂ કરાયેલી કીર્તિ પટેલ મીડિયા સામે ધ્રુસકે ને ધ્રુસકે રડી પડી. મૃગીકુંડ સ્નાન વિવાદ અને પોલીસ સાથેની માથાકૂટ બાદ ન્યાયની કરી માંગ. વાંચો સંપૂર્ણ અહેવાલ.
સોશિયલ મીડિયા પર સતત ચર્ચામાં રહેતી વિવાદિત ઇન્ફ્લુએન્સર કીર્તિ પટેલને આજે પોલીસ દ્વારા કડક સુરક્ષા વચ્ચે જૂનાગઢ જિલ્લા ન્યાયાલયમાં રજૂ કરવામાં આવી હતી. રાજસ્થાનથી ધરપકડ કર્યા બાદ જૂનાગઢ લાવવામાં આવેલી કીર્તિ પટેલ જ્યારે કોર્ટ સંકુલમાં પહોંચી ત્યારે મીડિયાના કેમેરા જોઈને તે ભાવુક થઈ ગઈ હતી અને ધ્રુસકે ને ધ્રુસકે રડવા લાગી હતી. ભવનાથના મૃગીકુંડમાં પ્રતિબંધિત સ્નાન અને પોલીસ અધિકારીઓ સાથેની ઉગ્ર દલીલો બાદ નોંધાયેલા 3 જેટલા ગુનાઓના સંદર્ભમાં તેની પૂછપરછ માટે પોલીસે રિમાન્ડની પ્રક્રિયા હાથ ધરી છે.
કોર્ટ પરિસરમાં હાઈવોલ્ટેજ ડ્રામા: મીડિયા પાસે માંગી મદદ
જૂનાગઢ જિલ્લા અદાલતમાં જ્યારે કીર્તિ પટેલને લાવવામાં આવી ત્યારે તેની આંખોમાં આંસુ હતા. ચાલતા ચાલતા તે રડતી રહી અને મીડિયાના પ્રતિનિધિઓ પાસે ન્યાયની ગુહાર લગાવી હતી. તેણે બૂમ પાડીને કહ્યું હતું કે, "મીડિયા હાજર રહે અને મને યોગ્ય ન્યાય મળે તે જોવે." જોકે, સુરક્ષામાં રહેલા પોલીસકર્મીઓએ કીર્તિ પટેલને મીડિયા સાથે વધુ વાતચીત કરતા અટકાવી હતી અને તાત્કાલિક કોર્ટ રૂમ તરફ લઈ ગયા હતા. આ દ્રશ્યો જોઈ કોર્ટ પરિસરમાં હાજર લોકોમાં પણ ભારે કુતૂહલ જોવા મળ્યું હતું.
ભૂતકાળનો વિવાદ: મૃગીકુંડમાં સ્નાન અને સાધુઓનો રોષ
આ સમગ્ર વિવાદની શરૂઆત મહાશિવરાત્રિના મેળા દરમિયાન થઈ હતી. ભવનાથ તળેટીમાં આયોજિત મેળાના અંતિમ દિવસે જ્યારે સાધુઓની રવેડી નીકળે છે, ત્યારે પરંપરા મુજબ માત્ર સન્યાસીઓ જ મૃગીકુંડમાં શાહી સ્નાન કરી શકે છે. કીર્તિ પટેલે પ્રશાસનની આંખમાં ધૂળ નાખી, ભગવા વસ્ત્રો ધારણ કરી આ પવિત્ર કુંડમાં ડૂબકી લગાવી હતી.
આ ઘટનાના વાયરલ થયેલા વીડિયોમાં તે મહિલા પોલીસકર્મીઓ અને ફરજ પરના PI (પોલીસ ઈન્સ્પેક્ટર) સાથે ઉગ્ર દલીલો અને માથાકૂટ કરતી જોવા મળી હતી. આ પરંપરાના ભંગ બદલ સાધુ સંતોમાં ભારે આક્રોશ ફાટી નીકળ્યો હતો. જોકે, કાયદાકીય રીતે જોતા મૃગીકુંડમાં સ્નાન કરવા માટે કોઈ લેખિત મનાઈ નથી, પરંતુ વર્ષો જૂની ધાર્મિક પરંપરાના ભંગને કારણે પોલીસ ફરિયાદ દાખલ કરવામાં આવી હતી.
કીર્તિ પટેલ સામે નોંધાયેલા ગંભીર ગુનાઓ
માત્ર મૃગીકુંડ વિવાદ જ નહીં, પરંતુ કીર્તિ પટેલ સામે અન્ય ગંભીર ફરિયાદો પણ નોંધાયેલી છે:
- પોલીસ સાથે ઘર્ષણ: ફરજ પરના અધિકારીઓ સાથે ગેરવર્તણૂક બદલ ગુનો.
- બજરંગદાસ બાપુની ફરિયાદ: ધાર્મિક લાગણી દુભાવવા બદલ બજરંગદાસ બાપુએ પોલીસ સ્ટેશનમાં ફરિયાદ નોંધાવી હતી.
- યુટ્યુબરનો આત્મહત્યાનો પ્રયાસ: એક સ્થાનિક યુટ્યુબરે આક્ષેપ કર્યો હતો કે કીર્તિ પટેલના સતત માનસિક ત્રાસથી કંટાળીને તેણે જીવન ટૂંકાવવાનો પ્રયાસ કર્યો હતો.
હાલમાં જૂનાગઢ પોલીસ આ તમામ 3 ગુનાઓ અંગે તેની ઊંડાણપૂર્વક તપાસ કરી રહી છે. પોલીસ તે જાણવા માંગે છે કે પ્રતિબંધિત વિસ્તારમાં તે કોની મદદથી પહોંચી હતી.
ટોપ સ્ટોરી
ટ્રેન્ડિંગ સમાચાર
