હિમાચલ પ્રદેશમાં ચૂંટણી અગાઉ AAPને ઝટકો, પ્રદેશ અધ્યક્ષ સહિત વધુ બે નેતાઓ ભાજપમાં સામેલ

કેસરીએ કહ્યું હતું કે અમે હિમાચલ પ્રદેશમાં છેલ્લા આઠ વર્ષથી AAP માટે પૂરી ઈમાનદારી અને સમર્પણ સાથે ચોવીસ કલાક કામ કરી રહ્યા હતા.

aap

નવી દિલ્હીઃ હિમાચલ પ્રદેશ વિધાનસભા ચૂંટણી અગાઉ આમ આદમી પાર્ટીને મોટો ઝટકો લાગ્યો છે. રાજ્યના આપ પાર્ટીના પ્રમુખ અનૂપ કેસરી અને અન્ય બે નેતા શુક્રવાર ભાજપમાં સામેલ થઇ ગયા હતા. દિલ્હીમાં ભાજપના રાષ્ટ્રીય અધ્યક્ષ જેપી નડ્ડાના નિવાસસ્થાન પર કેસરી સહિત સંગઠન મહાસચિવ સતીશ ઠાકુર અને ઉના જિલ્લાના પ્રમુખ ઇકબાલ સિંહ ભાજપમાં જોડાયા હતા. આ અવસર પર તેમણે કેજરીવાલ પર નિશાન સાધ્યું હતું. તેમણે કેજરીવાલ પર મંડી મતવિસ્તારમાં રોડ શો દરમિયાન પાર્ટીના નેતાઓનું અપમાન કરવાનો આરોપ લગાવ્યો હતો.

કેસરીએ કહ્યું હતું કે અમે હિમાચલ પ્રદેશમાં છેલ્લા આઠ વર્ષથી AAP માટે પૂરી ઈમાનદારી અને સમર્પણ સાથે ચોવીસ કલાક કામ કરી રહ્યા હતા. પરંતુ અરવિંદ કેજરીવાલે મંડીમાં રેલી અને રોડ શો દરમિયાન રાજ્યના પાર્ટી કાર્યકરોની અવગણના કરી હતી. રાજ્યના AAP કાર્યકરોની આ ઉપેક્ષાને અપમાન માન્યું અને સ્વાભિમાન માટે પાર્ટી છોડી દીધી છે.

'કેજરીવાલે અમને જોયા પણ નહોતા'

કેસરીએ કહ્યું કે અમે તેમના (કેજરીવાલ)થી ખૂબ જ નિરાશ છીએ. તેઓએ અમને જોયા પણ નથી, જેઓ પાર્ટી માટે દિવસ-રાત કામ કરે છે. માત્ર અરવિંદ કેજરીવાલ અને પંજાબના સીએમ ભગવંત માન જ મંડીમાં રોડ શોના મુખ્ય આકર્ષણ હતા. ભાજપમાં જોડાયા બાદ તેમણે કેન્દ્રીય મંત્રી અનુરાગ ઠાકુર અને પાર્ટીના રાષ્ટ્રીય અધ્યક્ષ જેપી નડ્ડાને આગામી વિધાનસભા ચૂંટણીમાં પાર્ટીને ફરીથી સત્તામાં લાવવા માટે સખત મહેનત કરવાની ખાતરી આપી હતી.

'કર્મચારીઓ અપમાનિત અનુભવે છે'

સતીશ ઠાકુર અને ઈકબાલ સિંહે પણ AAP છોડવાનું આ જ કારણ આપ્યું. તેમણે કહ્યું કે પાર્ટી માટે પોતાને સમર્પિત કરનારા કાર્યકરો હિમાચલ પ્રદેશના રોડ શો દરમિયાન દિલ્હી અને પંજાબના મુખ્યમંત્રીઓ દ્વારા અપમાનિત થયાની લાગણી અનુભવી રહ્યા છે. ઠાકુરે કહ્યું, "6 એપ્રિલે રોડ શો દરમિયાન અમને અપમાનિત થયાનું લાગ્યું હતું. તેથી અમે વડાપ્રધાન નરેન્દ્ર મોદીના નેતૃત્વમાં કામ કરવા અને હિમાચલ પ્રદેશના લોકોની સેવા કરવા માટે ભાજપમાં જોડાવાનું નક્કી કર્યું હતું.