'ભ્રમમાં રહેતા નહીં, પાકિસ્તાન ઘૂંટણિયે પડ્યું નથી': ઓપરેશન સિંદૂર અને ભારતીય કાર્યવાહી બાદ ઓવૈસીનું મોટું નિવેદન
ઓવૈસીએ કહ્યું - પાકિસ્તાનમાં માર્યા ગયેલા આતંકવાદીઓની જનાજામાં પાક. સેનાના અધિકારીઓ હાજર રહે છે, પાકિસ્તાનને નબળું પાડવા દરેક પદ્ધતિ અપનાવવા કેન્દ્ર સરકારને સલાહ, પાક.ના મીડિયાના જુઠાણાંનો પણ ઉલ્લેખ.
Asaduddin Owaisi Pakistan statement: જમ્મુ અને કાશ્મીરના પહેલગામમાં થયેલા આતંકવાદી હુમલાના જવાબમાં ભારતે પાકિસ્તાન વિરુદ્ધ 'ઓપરેશન સિંદૂર' સહિતની લશ્કરી કાર્યવાહી કરી છે. ભારતના આક્રમક પગલાં બાદ પાકિસ્તાન ગભરાટમાં છે અને વૈશ્વિક સ્તરે ભારત વિરુદ્ધ ખોટા સમાચાર ફેલાવવાનો પ્રયાસ કરી રહ્યું છે. ભારતીય વિદેશ સચિવ વિક્રમ મિશ્રીએ પ્રેસ કોન્ફરન્સ યોજીને પાકિસ્તાનના જુઠાણાંનો પર્દાફાશ કર્યો છે અને વિદેશ મંત્રી એસ જયશંકરે પણ કોઈપણ લશ્કરી હુમલાનો જોરદાર જવાબ આપવાની ચેતવણી આપી છે. આ બધાની વચ્ચે, AIMIM ના વડા અને હૈદરાબાદના સાંસદ અસદુદ્દીન ઓવૈસીએ પાકિસ્તાન અને તેની વાસ્તવિક સ્થિતિ અંગે એક મોટું નિવેદન આપ્યું છે.
ભારતીય સેના દ્વારા 'ઓપરેશન સિંદૂર' ની સફળતા અને પાકિસ્તાનમાં કરાયેલી કાર્યવાહી બાદ એવી ચર્ચા ચાલી રહી છે કે પાકિસ્તાન ઘૂંટણિયે પડી ગયું છે. જોકે, AIMIM ચીફ અસદુદ્દીન ઓવૈસીએ આ ધારણાને રદિયો આપ્યો છે.
હૈદરાબાદના સાંસદ અસદુદ્દીન ઓવૈસીએ જણાવ્યું કે, "તમે લોકો વિચારી રહ્યા હશો કે પાકિસ્તાન ઘૂંટણિયે પડી ગયું છે, પરંતુ એવું નથી. ભૂલ ન કરો, પાકિસ્તાન ઘૂંટણિયે નથી પડ્યું." તેમણે આ વાતના સમર્થનમાં કેટલાક પુરાવા રજૂ કર્યા. ઓવૈસીએ કહ્યું કે પાકિસ્તાનમાં માર્યા ગયેલા આતંકવાદીઓની જનાજામાં (અંતિમ સંસ્કારમાં) આતંકવાદી સંગઠનોના સભ્યો અને પાકિસ્તાની સેનાના અધિકારીઓ હાજરી આપી રહ્યા છે. તેમણે હાફિઝ સઈદના પુત્રનું ઉદાહરણ આપતા કહ્યું કે, "હાફિઝ સઈદનો પુત્ર પાકિસ્તાનમાં માર્યા ગયેલા આતંકવાદીઓની જનાજામાં આવી રહ્યો છે. તેમની પાછળ આતંકવાદી સંગઠનો અને પાકિસ્તાનની સેનાના લોકો છે. આ પાકિસ્તાનનો અસલી ચહેરો છે. આપણે ભૂલ ન કરીએ, આ લોકો ઘૂંટણિયે નથી."
પાકિસ્તાનને નબળું પાડવા અને અન્ય મુદ્દાઓ પર ઓવૈસી
ઓવૈસીએ કેન્દ્ર સરકારને સલાહ આપતા કહ્યું કે પાકિસ્તાનને નબળું પાડવા માટે દરેક શક્ય પદ્ધતિ અપનાવવી જોઈએ. તેમણે સરહદ પર પાકિસ્તાન દ્વારા નાગરિકો પર કરવામાં આવી રહેલા ગોળીબારનો પણ ઉલ્લેખ કર્યો. પાકિસ્તાન દ્વારા પાણી રોકવા અંગે ઓવૈસીએ કહ્યું કે ડેમ બનાવવામાં ૮-૧૦ વર્ષ લાગી શકે છે, પરંતુ પછી ભારત પાસે પાણી છોડવાની શક્તિ હશે.
ઓવૈસીએ પાકિસ્તાનના ઇરાદાઓ પર પણ પ્રશ્ન ઉઠાવ્યા. તેમણે કહ્યું કે, "પાકિસ્તાનને હિન્દુઓ, મુસ્લિમો, શીખો કે ખ્રિસ્તીઓની કોઈ ચિંતા નથી. તેઓ ફક્ત ભારતને નબળું પાડવા માંગે છે, જે ક્યારેય નહીં થાય." તેમણે પાકિસ્તાનમાં બલૂચ અને પઠાણોની પરિસ્થિતિ અંગે પણ ચિંતા વ્યક્ત કરી અને પૂછ્યું કે જો પાકિસ્તાન આટલું સારું છે તો તેઓ શા માટે ચિંતિત છે.
છેલ્લે, ઓવૈસીએ ભારત સરકારના વલણનો પણ ઉલ્લેખ કર્યો. તેમણે કહ્યું કે સરકારે કહ્યું છે કે જો પાકિસ્તાન તણાવ વધારશે તો ભારત પાછળ હટશે નહીં અને ભારત તેની જગ્યાએ સંપૂર્ણપણે તૈયાર છે.
ટોપ સ્ટોરી
ટ્રેન્ડિંગ સમાચાર
