Assam Election EVM Issue: કરીમગંજમાં એક ખાનગી કારમાં EVM મશીન મળી આવતા ખળભળાટ,  4 ચૂંટણી અધિકારી સસ્પેન્ડ 

ઘટના સામે આવ્યા બાદ દાવો કરવામાં આવી રહ્યો છે,  કાર ભાજપના વર્તમાન ધારાસભ્ય કૃષ્ણેંદુ પોલની પત્નીની છે. ચૂંટણી પંચે જિલ્લા ચૂંટણી અધિકારી પાસે વિસ્તૃત રિપોર્ટ માંગ્યો છે. 

કરીમગંજ જિલ્લામાં એક ખાનગી કારમાંથી EVM મળી આવ્યા

કરીમગંજ: આસામ (Assam)ના કરીમગંજ જિલ્લામાં એક ખાનગી કારમાં વોટિંગ મશીન EVM મળી આવતા ખળભળાટ મચી ગયો છે. EVM જપ્ત થયા બાદ આસામના કરીમગંજમાં સંબંધિત બૂથ પર ચૂંટણી રદ કરી દેવામાં આવી છે. તેમજ ચૂંટણી પંચે બૂથ નંબર 149 પર ફરીથી મતદાન કરવાનો નિર્ણય લીધો છે.ચૂંટણી પંચે (Elections commission) ચાર ચૂંટણી અધિકારીઓને સસ્પેન્ડ પણ કરી દીધાં છે. આ મામલે ચૂંટણીપંચે ફરિયાદ નોંધાવી છે. ઘટના સામે આવ્યા બાદ દાવો કરવામાં આવી રહ્યો છે,   કાર ભાજપના વર્તમાન ધારાસભ્ય કૃષ્ણેંદુ પોલની પત્નીની છે. ચૂંટણી પંચે જિલ્લા ચૂંટણી  અધિકારી પાસે વિસ્તૃત રિપોર્ટ માંગ્યો છે. 

EVMનો વીડિયો સામે આવ્યા બાદ કોંગ્રેસ મહાસચિવ પ્રિયંકા ગાંધી (Priyanka Gandhi)એ ભાજપ (BJP) અને ચૂંટણી પંચ પર સવાલો ઉઠાવ્યા છે. પ્રિયંકાએ ટ્વિટ કરીને કહ્યં હતું કે, "દરેક વખતે ચૂંટણી દરમિયાન ઇવીએમ ખાનગી વાહનોમાં લઈ જવામાં આવે છે અને પકડાય ત્યારે આ વાહનો ભાજપના ઉમેદવારો અથવા તેમના સાથી પક્ષના હોય છે. 

પ્રિયંકા ગાંધીએ ઉઠાવ્યા સવાલ 

પ્રિયંકા ગાંધીએ વધુમાં કહ્યું કે, સત્ય તો એ છે કે આ પ્રકારની ઘણી ઘટનાઓનની જાણકારી આપવામાં આવે છે પરંતુ કોઈ કાર્યવાહી કરવામાં આવતી નથી. ચૂંટણી પંચે આ ફરિયાદો અંગે નિર્ણાયક પગલાં લેવાની અને તમામ રાષ્ટ્રીય પક્ષો દ્વારા ઇવીએમનું પૂન:મુલ્યાનક શરુ કરવાની જરૂર છે. ''

EVM સાથે કોઈ ચેડા થયા નથી- ચૂંટણી પંચ 

આ સમગ્ર મામલે ચૂંટણી પંચે કહ્યું કે, “પરિવહન પ્રોટોકોલનું ઉલ્લંઘન કરવા બદલ અધિકારીઓને કારણ દર્શાવો નોટિસ જાહેર કરવામાં આવી છે. સાથે જ પીઓ અને ત્રણ અન્ય અધિકારીઓને સસ્પેન્ડ કરી દેવાયા છે. જો કે ઈવીએમ સીલપેક મળી હતી પરતું  AC 1 રતબાડી (SC)ની ઈન્દિરા એમવી શાળા નંબર-149 પર ફરી મતદાન કરવાનો નિર્ણય કરવામાં આવ્યો છે”

ચૂંટણે પંચે જણાવ્યું કે, સાંજે 6 વાગ્યે મતદાન સમાપ્ત થયા બાદ સુરક્ષા સાથે EVMને લઈને અધિકારી મતદાન મથકથી નિકળી ગયા  હતા પરંતુ રસ્તામાં ખરાબ હવામાનના કારણે ટ્રાફિક જામ લાગી ગયો હતો. જેથી અન્ય ગાડીઓથી અલગ થઈ ગયા હતા. આ દરમિયાન રાત્રે લગભગ 9 વાગ્યે જે ગાડીથી EVM લઈ જવામાં આવી રહ્યાં હતા. તે ખરાબ થઈ ગઈ હતી. જો કે, આ મામલે સંબંધિત અધિકારીને પણ જાણકારી આપવામાં આવી હતી અને અન્ય વાહનને મોકલવામાં આવ્યું હતું પરંતુ ઈવીએમ લાવી રહેલી ટીમે અલગ વાહનની વ્યવસ્થા કરી લીધી હતી.

આ વાહન ભાજપના ઉમેદવારના પત્નીના નામે રજિસ્ટર્ડ છે. ઘટના બાદ જ્યારે ઈવીએમ વીવીપેટ મશીનની તપાસ કરવામાં આવી તો તે સંપૂર્ણ સીલબંધ અને સુરક્ષિત છે. તેની સાથે કોઈ છેડછાડ કરવામાં આવ્યા નથી.