પશ્ચિમ બંગાળ વિધાનસભા ચૂંટણી 2026: કોંગ્રેસે 284 ઉમેદવારોની પહેલી યાદી જાહેર કરી, જાણો મમતા દીદી સામે કોણ મેદાનમાં?

બહેરામપુરથી અધીર રંજન ચૌધરી અને માલતીપુરથી મૌસમ નૂરને ટિકિટ; ભવાનીપુરમાં જામશે ત્રિપાંખિયો જંગ - મમતા બેનર્જી, સુવેન્દુ અધિકારી અને કોંગ્રેસના પ્રદીપ પ્રસાદ વચ્ચે કાંટાની ટક્કર.

west bengal congress announces 284 candidates for 2026 assembly elections adhir ranjan choudhury baharampur

Source : તસવીર સોશિયલ મીડિયા

Show Quick Read

Key points generated by AI, verified by newsroom

• કોંગ્રેસે 294 માંથી 284 બેઠકો પર ઉમેદવાર જાહેર કર્યા.
• અધીર રંજન ચૌધરી ફરી બહેરામપુરથી ચૂંટણી લડશે.
• ભવાનીપુરમાં મમતા, સુવેન્દુ સામે કોંગ્રેસનો પ્રદીપ પ્રસાદ.
• ચૂંટણી 23 અને 29 એપ્રિલે, પરિણામ 4 મેના રોજ.

પશ્ચિમ બંગાળમાં આગામી વિધાનસભા ચૂંટણી 2026 નો માહોલ હવે બરાબરનો ગરમાયો છે. કોંગ્રેસ પાર્ટીએ રવિવારે પોતાની પહેલી યાદી જાહેર કરીને મોટો ધડાકો કર્યો છે. આ પહેલી યાદીમાં જ કોંગ્રેસે રાજ્યની 294 બેઠકોમાંથી 284 બેઠકો પર પોતાના ઉમેદવારોના નામ ફાઇનલ કરી દીધા છે. આ યાદીમાં સૌથી મોટું નામ લોકસભાના ભૂતપૂર્વ વિપક્ષી નેતા અધીર રંજન ચૌધરીનું છે, જેમને પાર્ટીએ ફરી એકવાર બહેરામપુર વિધાનસભા બેઠક પરથી મેદાનમાં ઉતાર્યા છે. આ સિવાય ભવાનીપુર જેવી હાઈ-પ્રોફાઈલ સીટ પર કોંગ્રેસે પ્રદીપ પ્રસાદને ટિકિટ આપીને મુખ્યમંત્રી મમતા બેનર્જી અને ભાજપના દિગ્ગજ નેતા સુવેન્દુ અધિકારી સામે સીધો પડકાર ફેંક્યો છે.

રવિવારે (29 માર્ચ, 2026), કોંગ્રેસ પાર્ટીએ પોતાના સત્તાવાર સોશિયલ મીડિયા પ્લેટફોર્મ 'X' પર એક પોસ્ટ શેર કરીને 284 ઉમેદવારોના નામની જાહેરાત કરી હતી. આ યાદીમાં ઘણા જૂના અને જાણીતા ચહેરાઓ પર પાર્ટીએ ફરીથી વિશ્વાસ મૂક્યો છે.

The Central Election Committee of the Congress has selected the following persons as party candidates for the elections to the West Bengal Legislative Assembly 👇 pic.twitter.com/8DIjEqNVrR

— Congress (@INCIndia) March 29, 2026

માલતીપુરમાં મૌસમ નૂર પર કળશ ઢોળાયો

કોંગ્રેસની આ ઉમેદવાર યાદીમાં મૌસમ નૂરનું નામ પણ ચર્ચામાં છે. મૌસમ નૂર અગાઉ રાજ્યસભામાં કોંગ્રેસના સાંસદ રહી ચૂક્યા છે અને તાજેતરમાં જ તેમનો કાર્યકાળ પૂરો થયો છે. રાજ્યસભામાંથી નિવૃત્ત થયા બાદ તરત જ કોંગ્રેસ હાઈકમાન્ડે તેમના પર મોટો ભરોસો મૂકીને તેમને માલતીપુર વિધાનસભા વિસ્તારમાંથી ટિકિટ આપી છે.

ભવાનીપુરમાં ખરાખરીનો જંગ: દીદી vs દાદા vs કોંગ્રેસ

આખી ચૂંટણીમાં સૌની નજર ભવાનીપુર બેઠક પર રહેવાની છે, કારણ કે અહીં ખરાખરીનો ત્રિપાંખિયો જંગ ખેલાશે. તૃણમૂલ કોંગ્રેસ (TMC) તરફથી ખુદ મુખ્યમંત્રી મમતા બેનર્જી મેદાનમાં છે, જ્યારે ભારતીય જનતા પાર્ટી (BJP) એ વિધાનસભાના વિરોધ પક્ષના નેતા સુવેન્દુ અધિકારીને તેમની સામે ઉતાર્યા છે. હવે આ હાઈ-વોલ્ટેજ ડ્રામા વચ્ચે કોંગ્રેસે પ્રદીપ પ્રસાદને પોતાના ઉમેદવાર બનાવીને સ્પર્ધાને વધુ રોમાંચક બનાવી દીધી છે.

બીજી તરફ, પશ્ચિમ બંગાળની બીજી સૌથી ચર્ચિત બેઠક 'નંદીગ્રામ' પર પણ ભારે રસાકસી જોવા મળશે. અહીં કોંગ્રેસના ઉમેદવાર એસ.કે. જરિયાતુલ હુસૈનનો સીધો મુકાબલો ભાજપના ઉમેદવાર સુવેન્દુ અધિકારી સાથે થશે. (નોંધનીય છે કે સુવેન્દુ અધિકારી બે બેઠકો પરથી ચૂંટણી લડી રહ્યા હોવાનું અહેવાલમાં જણાય છે).

ક્યારે યોજાશે ચૂંટણી?

ભારતીય ચૂંટણી પંચ (ECI) ની જાહેરાત મુજબ, 294 બેઠકો ધરાવતી પશ્ચિમ બંગાળ વિધાનસભા માટે બે તબક્કામાં મતદાન યોજાશે.

પહેલો તબક્કો: 23 એપ્રિલ, 2026

બીજો તબક્કો: 29 એપ્રિલ, 2026

મતગણતરી અને ચૂંટણીના અંતિમ પરિણામો 4 મે, 2026 ના રોજ જાહેર કરવામાં આવશે.

આ પણ વાંચો

‘આ દેશમાં ફક્ત બે જ ખલનાયક છે: મુસ્લિમો અને...’ - બ્રિજભૂષણ શરણ સિંહનું ચોંકાવનારું નિવેદન