Bengal SSC Scam: ડાયમંડ સિટીમાં અર્પિતા મુખર્જીના ઘરે ઈડીના ફરી દરોડા 

પશ્ચિમ બંગાળ શિક્ષક ભરતી કૌભાંડની આરોપી અર્પિતા મુખર્જીના ઘરે EDએ ફરી એકવાર દરોડા પાડ્યા છે. આ વખતે કોલકાતાના ડાયમંડ સિટીમાં તેમના નિવાસસ્થાને દરોડા પાડવામાં આવ્યા છે.

પાર્થ ચેટર્જી અને અર્પિતા મુખર્જી

Bengal Teachers Recruitment Scam: પશ્ચિમ બંગાળ શિક્ષક ભરતી કૌભાંડની આરોપી અર્પિતા મુખર્જીના ઘરે EDએ ફરી એકવાર દરોડા પાડ્યા છે. આ વખતે કોલકાતાના ડાયમંડ સિટીમાં તેમના નિવાસસ્થાને દરોડા પાડવામાં આવ્યા છે. આ સાથે તપાસ એજન્સી સીસીટીવી ફૂટેજ પણ ચકાસી રહી છે અને અર્પિતા મુખર્જીના ડ્રાઈવર પ્રણવ ભટ્ટાચાર્યની પૂછપરછ કરી રહી છે. અર્પિતા મુખર્જી EDની કસ્ટડીમાં છે. તપાસ એજન્સી તેની પૂછપરછ કરી રહી છે. બંગાળના કેબિનેટ મંત્રી પાર્થ ચેટર્જી પણ આ કેસમાં આરોપી છે અને તેઓ ED દ્વારા કસ્ટડીમાં પૂછપરછનો સામનો કરી રહ્યા છે.

અગાઉ, EDએ અર્પિતા મુખર્જીના ઓછામાં ઓછા ત્રણ બેંક ખાતાઓમાંથી વ્યવહારોને અવરોધિત કરવાની પ્રક્રિયા શરૂ કરી છે, જેમાં તપાસ એજન્સીને ઓછામાં ઓછા 2 કરોડ રૂપિયા મળ્યા છે. એજન્સીના એક વરિષ્ઠ અધિકારીએ શનિવારે આ જાણકારી આપી. તેમણે કહ્યું કે મુખર્જીની ઘણી "બનાવટી કંપનીઓ"ના બેંક ખાતાઓ પણ EDના સ્કેનર હેઠળ છે. મુખર્જીના ત્રણ બેંક ખાતા ફ્રીઝ કરવાની પ્રક્રિયા શરૂ થઈ ગઈ છે. આ ખાતાઓમાં કુલ બે કરોડ રૂપિયા મળ્યા છે. અમને શંકા છે કે આ ખાતાઓનો ઉપયોગ બહુવિધ વ્યવહારો કરવા માટે કરવામાં આવ્યો હતો અને વધુ તપાસ ચાલુ છે.”

અધિકારીએ ખાતાઓમાંથી મળેલી રકમની વિગતો ન આપતાં જણાવ્યું હતું કે "નકલી કંપનીઓ"ના બેંક ખાતાઓ ફ્રીઝ કરવાનો નિર્ણય લેવાનો બાકી છે. “અમે સંબંધિત અધિકારીઓ પાસેથી આ બેંક ખાતાઓની વિગતો માંગી છે. ખાતાઓની તપાસ કર્યા પછી, અમે આગળની કાર્યવાહી અંગે કોઈ નિર્ણય લઈશું." ઇડીએ જણાવ્યું હતું કે મુખર્જીની પૂછપરછ એ જાણવા માટે ચાલુ રહેશે કે તેમના વધુ બેંક ખાતા છે કે કેમ. સૂત્રોના જણાવ્યા અનુસાર ચેટરજીના બેંક ખાતાઓની પણ તપાસ કરવામાં આવી રહી છે. સૂત્રોએ એમ પણ જણાવ્યું કે સવારથી મુખર્જી અને ચેટર્જી બંનેની પૂછપરછ કરવામાં આવી રહી છે. EDએ પાર્થ ચેટર્જી અને અર્પિતા મુખર્જીના બે ફ્લેટમાંથી 50 કરોડ રૂપિયાની રોકડ ઉપરાંત મોટી માત્રામાં જ્વેલરી અને વિદેશી ચલણ જપ્ત કર્યું હતું. બંને 3 ઓગસ્ટ સુધી કેન્દ્રીય એજન્સીની કસ્ટડીમાં રહેશે.