ખાનગી મેડિકલ કોલેજોની ફી મુદ્દે નેશનલ મેડિકલ કમિશને જાહેર કરી નવી ગાઈડલાઈન

50 ટકા બેઠકોની ફી રાજ્યની સરકારી મેડિકલ કોલેજની ફીની સમકક્ષ રખાશે.

ખાનગી મેડિકલ કોલેજોની ફી મુદ્દે કેંદ્ર સરકાર હેઠળના નેશનલ મેડિકલ કમિશને નવી ગાઈડલાઈન જાહેર કરી છે.  ખાનગી મેડિકલ કોલેજ અને ડિમ્ડ યુનિવર્સિટીમાં 50 ટકા બેઠકના સંબંધમાં ફીને લઈને નવા નિયમો જારી કરીને વિદ્યાર્થીઓને એક મોટી રાહત આપવામાં આવી છે. નેશનલ મેડિકલ કમિશને એક નોટિફિકેશન બહાર પાડીને જણાવ્યું કે ખાનગી મેડિકલ કોલેજની 50 ટકા બેઠકોની ફી સંબંધિત રાજ્ય અને કેન્દ્રની સરકારી મેડિકલ કોલેજ જેટલી રાખવી પડશે.  50 ટકા બેઠકોની ફી રાજ્યની સરકારી મેડિકલ કોલેજની ફીની સમકક્ષ રખાશે.

ખાનગી મેડિકલ કોલેજમાં ભણતા હજારો વિદ્યાર્થીઓને આ લાભ મળશે તેઓ હવે ઓછા ખર્ચ મેડિકલમાં અભ્યાસ કરી શકશે. નેશનલ મેડિકલ કમિશન દ્વારા જારી નિયમોમાં કહેવાયું કે વ્યાપક સ્તરે વિચાર વિમર્શ કર્યા બાદ આ પ્રકારનો નિર્ણય લેવાયો છે કે ખાનગી મેડિકલ કોલેજ અને ડિમ્ડ યુનિવર્સિટીઓમાં 50 ટકા બેઠકોની ફી જે તે રાજ્ય કે કેન્દ્રની મેડિકલ કોલેજો જેટલી રાખવી પડશે. ઉલ્લેખનીય છે કે ઘણા લાંબા સમયથી મેડિકલ ફી ઓછી કરવાની માંગ કરવામાં આવી રહી હતી. 

ગુજરાત કોરોના કેસ

ગુજરાતમાં કોરોનાના કેસમાં આજે સામાન્ય ઘટાડો થયો છે.  આજે રાજ્યમાં છેલ્લા 24 કલાકમાં કોરોના વાયરસના નવા 4710  કેસ નોંધાયા છે.  આ સાથે રાજ્યમાં કોરોનાના કુલ એક્ટિવ કેસનો આંકડો 51013 પર પહોંચી ગયો છે. રાજ્યમાં 236 લોકો વેન્ટીલેટર પર છે. 50777 લોકો સ્ટેબલ છે. અત્યાર સુધીમાં રાજ્યમાં 1134683 લોકોએ કોરોનાને મ્હાત આપી છે. રાજ્યમાં અત્યાર સુધીમાં કોરોના સંક્રમણથી 10648 લોકોના મોત થયા છે. રાજ્યમાં આજે સંક્રમણથી 34 લોકોના મોત થયા છે.

બીજી તરફ આજે 11184 દર્દીઓ રિકવર પણ થયા છે. તો બીજી તરફ કોરોનાનો રિકવરી રેટ પણ 94.85 ટકાએ પહોંચ્યો છે. રાજ્યમાં કોરોના સંક્રમણથી આજે  34 મોત થયા. આજે 2,71,887 લોકોનું રસીકરણ કરવામાં આવ્યું છે.

ગુજરાતમાં છેલ્લા 24 કલાકમાં સામે આવેલા આંકડા પ્રમાણે અમદાવાદ કોર્પોરેશનમાં 1451, વડોદરા કોર્પોરેશનમાં 781, ગાંધીનગર કોર્પોરેશનમાં 242, વડોદરા 231,   સુરત કોર્પોરેશનમાં 174,  સુરત 165, મહેસાણા 147, બનાસકાંઠા 144, રાજકોટ કોર્પોરેશન 137, ખેડા 115, આણંદ 114, ગાંધીનગર 105, કચ્છ 96, રાજકોટ 89,  પાટણ 74, ભરુચ 54, મોરબી 53, જામનગર કોર્પોરેશન 51, પંચમહાલ 50, તાપી 45, સાબરકાંઠા 42, નવસારી 39, ભાવનગર કોર્પોરેશન 36, અમદાવાદ 33,  ડાંગ 24, વલસાડ 23, જામનગર 22, છોટા ઉદેપુર 20, દેવભૂમિ દ્વારકા 20, ભાવનગર 19, અરવલ્લી 18, દાહોદ 16, ગીર સોમનાથ 16, મહીસાગર 15, સુરેન્દ્રનગર 15, અમરેલી 9, જૂનાગઢ કોર્પોરેશન 8, નર્મદા 7, જૂનાગઢ 5, પોરબંદર 4 અને બોટાદમાં 1  કેસ નોંધાયો છે.