Jahangirpuri Violence: ગૃહમંત્રી અમિત શાહે દિલ્હી પોલીસના ઉચ્ચ અધિકારીઓ સાથે કરી વાત, જાણો શું આદેશ આપ્યાં

Jahangirpuri Violence: : ગૃહ મંત્રાલયે દિલ્હી પોલીસને જરૂરી સૂચનાઓ આપી છે અને સ્થિતિ પર પણ ચાંપતી નજર રાખી રહ્યું છે.

ફાઈલ ફોટો

Delhi : કેન્દ્રીય ગૃહ પ્રધાન અમિત શાહે શનિવારે શહેરના જહાંગીરપુરી વિસ્તારમાં હિંસાની ઘટના પર દિલ્હી પોલીસના બે ઉચ્ચ અધિકારીઓ સાથે વાત કરી અને તેમને જરૂરી કાર્યવાહી કરવાનો નિર્દેશ આપ્યો. સત્તાવાર સૂત્રોએ આ માહિતી આપી.

સમાચાર એજન્સી પીટીઆઈના નજીકના સૂત્રોના જણાવ્યા અનુસાર, ગૃહમંત્રી અમિત શાહે પોલીસ કમિશનર અને વિશેષ કમિશનર (કાયદો અને વ્યવસ્થા) સાથે વાત કરી અને તેમને જહાંગીરપુરી હિંસાની ઘટના પછી તમામ જરૂરી પગલાં લેવા જણાવ્યું.

રાષ્ટ્રીય રાજધાનીમાં હનુમાન જયંતિ નિમિત્તે નીકળેલા શોભાયાત્રા દરમિયાન થયેલી હિંસાની ઘટના અંગે પોલીસ દળે કેન્દ્રીય ગૃહ મંત્રાલયના ઉચ્ચ અધિકારીઓને પણ જાણ કરી હતી.

સૂત્રોએ જણાવ્યું કે ગૃહ મંત્રાલયે દિલ્હી પોલીસને જરૂરી સૂચનાઓ આપી છે અને સ્થિતિ પર પણ નજર રાખી રહ્યું છે.સૂત્રોએ જણાવ્યું કે દિલ્હી પોલીસે પરિસ્થિતિને કાબૂમાં લેવા માટે વરિષ્ઠ અધિકારીઓ સહિત પૂરતા પ્રમાણમાં સુરક્ષાકર્મીઓ તૈનાત કર્યા છે. તેમણે એમ પણ કહ્યું કે જહાંગીરપુરી સિવાય અન્ય સંવેદનશીલ વિસ્તારોમાં વધારાના દળો તૈનાત કરવામાં આવ્યા છે.

ઉલ્લેખનીય છે કે, શનિવારે દિલ્હીના જહાંગીરપુરી વિસ્તારમાં હનુમાન જયંતિની શોભાયાત્રા દરમિયાન હિંસા ફાટી નીકળી હતી, પોલીસે જણાવ્યું હતું.અધિકારીઓના જણાવ્યા અનુસાર, આ ઘટનામાં અસામાજિક તત્વોએ અનેક વાહનોમાં તોડફોડ કરી હતી અને પોલીસ કર્મચારીઓને ઘાયલ કર્યા હતા.

દરમિયાન દિલ્હીના  ઉપરાજ્યપાલે રાષ્ટ્રીય રાજધાનીમાં હિંસા અને પથ્થરમારાની ઘટનાઓની નિંદા કરી અને કહ્યું કે આ પ્રવૃત્તિઓ પાછળ રહેલા કોઈને બક્ષવામાં આવશે નહીં. તેમણે દિલ્હી પોલીસ કમિશનર સાથે પરિસ્થિતિનો તાગ મેળવ્યો હતો અને લોકોને શાંતિ જાળવવા અપીલ કરી.

સ્પેશિયલ પોલીસ કમિશનર, કાયદો અને વ્યવસ્થા, દીપેન્દ્ર પાઠકના નિવેદનને ટાંકીને ANIએ કહ્યું કે "સ્થિતિ નિયંત્રણમાં છે. અમે શાંતિ સમિતિઓ સાથે વાતચીત કરીને શાંતિપૂર્ણ વાતાવરણ બનાવવાનો પ્રયાસ કરી રહ્યા છીએ અને તમામને શાંતિ જાળવવા અપીલ કરી રહ્યા છીએ. " (PTIના ઇનપુટ સાથે)