Maharashtra Politics: શિવસેના-ભાજપમાં ભંગાણના સંકેત, મુખ્યમંત્રી શિંદેના દિકરાએ રાજીનામું આપવાની આપી ચીમકી

મહારાષ્ટ્રના રાજકારણમાં ફરી એકવાર ઉથલપાથલ જોવા મળી છે. રાજ્યના મુખ્યમંત્રી એકનાથ શિંદેની આગેવાની હેઠળની શિવસેના અને ભાજપ વચ્ચે ભંગાણના સંકેત જોવા મળ્યા છે.

( Image Source : PTI )

Shiv Sena And BJP Conflict: મહારાષ્ટ્રના રાજકારણમાં ફરી એકવાર ઉથલપાથલ જોવા મળી છે. રાજ્યના મુખ્યમંત્રી એકનાથ શિંદેની આગેવાની હેઠળની શિવસેના અને ભાજપ વચ્ચે ભંગાણના સંકેત જોવા મળ્યા છે. મુખ્યમંત્રી એકનાથ શિંદેના પુત્ર અને સાંસદ શ્રીકાંત શિંદેએ તેમના પદ પરથી રાજીનામું આપવાની ચીમકી આપી   છે. તે ઘણા મુદ્દાઓ પર નારાજ હોવાનું કહેવાય છે. મહારાષ્ટ્રમાં એકનાથ શિંદેના નેતૃત્વવાળી શિવસેના અને ભાજપની ગઠબંધન સરકાર છે. હવે આ ગઠબંધનમાં તિરાડ પડવાના સંકેત દેખાઈ રહ્યા છે.  કલ્યાણ લોકસભા સીટના સાંસદ શ્રીકાંત શિંદેએ ભાજપના કેટલાક નેતાઓ પર શિવસેના-ભાજપ ગઠબંધનને નબળું પાડીને સ્વાર્થી રાજકારણ કરવાનો આરોપ લગાવ્યો છે. ગુરુવારે (08 જૂન) ડોમ્બિવલીમાં ભાજપ અધિકારીઓની એક બેઠક યોજાઈ હતી જેમાં શિવસેનાનો બહિષ્કાર કરવાનો નિર્ણય લેવામાં આવ્યો હતો. જેના કારણે શ્રીકાંત શિંદે પરેશાન છે.

શું છે સમગ્ર મામલો ?

હકીકતમાં ભાજપના કાર્યકર્તા નંદુ જોશી વિરુદ્ધ એક મહિલાની છેડતી કરવા બદલ FIR નોંધવામાં આવી છે. આ અંગે નંદુ જોશી અને ઘણા કાર્યકરોએ આરોપ લગાવ્યો કે ડોમ્બિવલી માનપાડા પોલીસ સ્ટેશનમાં એફઆઈઆર નોંધવા પાછળ શિવસેનાનો હાથ છે.

રાજ્યકક્ષાના મંત્રી રવિન્દ્ર ચૌહાણના નેતૃત્વમાં બેઠક યોજાઈ હતી

બીજી તરફ, બુધવારે ડોમ્બિવલીમાં રાજ્યકક્ષાના મંત્રી રવિન્દ્ર ચૌહાણના નેતૃત્વમાં બેઠક યોજાઈ હતી, જેમાં શિવસેનાને અલગ કરવાનો નિર્ણય લેવામાં આવ્યો હતો. આ સિવાય બીજુ કારણ એ પણ જણાવવામાં આવી રહ્યું છે કે ભાજપે ગુરુવારે લોકસભા ચૂંટણીમાં 48 સીટો માટે પ્રભારીઓના નામની જાહેરાત કરી દીધી છે.

48 લોકસભા બેઠકો માટે ચૂંટણી પ્રમુખોની જાહેરાત

મહારાષ્ટ્રમાં ભાજપે ગુરુવારે (08 જૂન) રાજ્યની 48 લોકસભા બેઠકો અને 288 વિધાનસભા બેઠકો માટે ચૂંટણી પ્રમુખોની જાહેરાત કરી. આ અંગે પ્રદેશ ભાજપ અધ્યક્ષ ચંદ્રશેખર બાવનકુલેએ જણાવ્યું હતું કે શિવસેના સાથે ગઠબંધન કરીને મુખ્યમંત્રી એકનાથ શિંદે અને નાયબ મુખ્યમંત્રી દેવેન્દ્ર ફડણવીસના નેતૃત્વમાં ચૂંટણી લડવામાં આવશે.

તેમણે એમ પણ કહ્યું હતું કે શિવસેના જે બેઠકો પર ચૂંટણી લડશે ત્યાં ભાજપના ચૂંટણી વડા શિવસેનાના ઉમેદવારની જીત સુનિશ્ચિત કરવા માટે કામ કરશે. તેમણે કહ્યું કે કેન્દ્રીય મંત્રી અમિત શાહ 10 જૂને મધ્ય મહારાષ્ટ્રના નાંદેડમાં એક રેલીને સંબોધિત કરશે અને પાર્ટી રાજ્યમાં મોદીની રેલીનું આયોજન પણ કરી રહી છે.