નીતિશ કુમારે જાહેરમાં મહિલાનો હિજાબ હટાવતા ભડકો! RJD-કોંગ્રેસ લાલઘૂમ, જુઓ Video
પટણામાં નિમણૂક પત્ર વિતરણ વખતે બની ઘટના: વિપક્ષે કહ્યું- 'માનસિક સંતુલન ગુમાવ્યું છે', આ કૃત્ય અક્ષમ્ય અને શરમજનક.
Nitish Kumar Viral Video: બિહારના મુખ્યમંત્રી નીતિશ કુમારનો એક ચોંકાવનારો વીડિયો સોશિયલ મીડિયા પર આગની જેમ વાયરલ થઈ રહ્યો છે. પટણામાં આયોજિત એક કાર્યક્રમ દરમિયાન સીએમ નીતિશ કુમારે મંચ પર એક મહિલા ડૉક્ટરનો હિજાબ કથિત રીતે હટાવવાનો પ્રયાસ કરતા રાજકીય ભૂકંપ સર્જાયો છે. આ ઘટના કેમેરામાં કેદ થતા જ વિપક્ષી પાર્ટીઓ RJD અને કોંગ્રેસે નીતિશ કુમારની માનસિક સ્થિતિ પર ગંભીર સવાલો ઉઠાવ્યા છે અને નૈતિકતાના ધોરણે તેમના તાત્કાલિક રાજીનામાની માંગ કરી છે.
બિહારના રાજકારણમાં અવારનવાર વિચિત્ર ઘટનાઓ બનતી રહે છે, પરંતુ તાજેતરના કિસ્સાએ તમામ મર્યાદાઓ વટાવી દીધી છે. પટણામાં રાજ્ય સરકાર દ્વારા આયુષ ડૉક્ટરોને નિમણૂક પત્રો એનાયત કરવાનો એક સમારોહ યોજવામાં આવ્યો હતો. આ કાર્યક્રમમાં જ્યારે એક મહિલા ડૉક્ટર પોતાનું નિમણૂક પત્ર લેવા માટે મંચ પર પહોંચી, ત્યારે મુખ્યમંત્રી નીતિશ કુમારે અચાનક તેના માથા પર પહેરેલા હિજાબ તરફ હાથ લંબાવ્યો હતો અને તેને હટાવવાનો ઇશારો કે પ્રયાસ કર્યો હતો. આ ઘટનાના દ્રશ્યો ત્યાં હાજર કેમેરામાં કેદ થઈ ગયા હતા અને જોતજોતામાં આ વીડિયો સોશિયલ મીડિયાના દરેક પ્લેટફોર્મ પર વાયરલ થઈ ગયો છે.
આ ઘટના બાદ બિહારની મુખ્ય વિપક્ષી પાર્ટી રાષ્ટ્રીય જનતા દળ (RJD) એ સરકાર સામે મોરચો માંડ્યો છે. RJD એ પોતાના સત્તાવાર સોશિયલ મીડિયા હેન્ડલ પર આ વીડિયો શેર કરીને મુખ્યમંત્રીની માનસિકતા પર સીધો પ્રહાર કર્યો છે. પાર્ટીએ તીખી પ્રતિક્રિયા આપતા લખ્યું છે કે, "નીતિશજીની માનસિક સ્થિતિ અત્યંત કથળી ગઈ હોય તેવું લાગે છે. શું નીતિશ બાબુ હવે પૂરેપૂરા 'સંઘી' વિચારધારામાં રંગાઈ ગયા છે?" વિપક્ષનો આરોપ છે કે મુખ્યમંત્રીનું આવું વર્તન તેમના પદની ગરિમાને શોભતું નથી અને તે દર્શાવે છે કે તેઓ હવે નિર્ણય લેવાની ક્ષમતા ગુમાવી રહ્યા છે.
यह क्या हो गया है नीतीश जी को?
— Rashtriya Janata Dal (@RJDforIndia) December 15, 2025
मानसिक स्थिति बिल्कुल ही अब दयनीय स्थिति में पहुंच चुकी है या नीतीश बाबू अब 100% संघी हो चुके हैं?@yadavtejashwi #RJD #bihar #TejashwiYadav pic.twitter.com/vRyqUaKhwm
બીજી તરફ, કોંગ્રેસ પાર્ટીએ પણ આ મુદ્દે આકરા પાણીએ છે. બિહાર કોંગ્રેસના નેતાઓએ આ ઘટનાને 'અક્ષમ્ય અપરાધ' અને 'બેશરમીની હદ' ગણાવી છે. કોંગ્રેસના પ્રવક્તાએ જણાવ્યું હતું કે, "જ્યારે રાજ્યના મુખ્યમંત્રી જ જાહેરમાં એક મહિલા ડૉક્ટર સાથે આવું અપમાનજનક વર્તન કરે, ત્યારે સામાન્ય મહિલાઓની સુરક્ષાની અપેક્ષા કોની પાસે રાખવી?" કોંગ્રેસે સ્પષ્ટ શબ્દોમાં કહ્યું છે કે આ કોઈ સામાન્ય ભૂલ નથી, પરંતુ એક ઘૃણાસ્પદ કૃત્ય છે. રાજ્યના વડા તરીકે તેમણે મહિલાનું સન્માન જાળવવું જોઈએ, તેના બદલે તેઓ જાહેરમાં મર્યાદા ભંગ કરી રહ્યા છે.
આ વિવાદ હવે માત્ર રાજકીય પક્ષો પૂરતો સીમિત રહ્યો નથી, પરંતુ સામાન્ય જનતામાં પણ ભારે રોષ જોવા મળી રહ્યો છે. અગાઉ પણ નીતિશ કુમાર વિધાનસભામાં મહિલાઓ અંગેના વિવાદાસ્પદ નિવેદનોને કારણે ટીકાનો ભોગ બન્યા હતા. હવે આ હિજાબ પ્રકરણે ફરી એકવાર તેમની મુશ્કેલીઓમાં વધારો કર્યો છે. કોંગ્રેસ અને RJD બંને પક્ષોએ એકસૂરે માંગ કરી છે કે મુખ્યમંત્રીએ આ કૃત્ય બદલ માફી માંગવી જોઈએ અને નૈતિક જવાબદારી સ્વીકારીને તાત્કાલિક પોતાના હોદ્દા પરથી રાજીનામું આપી દેવું જોઈએ. હાલમાં આ વીડિયો બિહારના રાજકારણમાં ચર્ચાના કેન્દ્રસ્થાને છે.
Before You Go
Bhavnagar Liquor Scam : ભાવનગર લઠ્ઠાકાંડના આરોપીઓના 10 દિવસના રિમાન્ડ મંજૂર
ટોપ સ્ટોરી
ટ્રેન્ડિંગ સમાચાર
