પંજાબની રાવી નદીમાંથી BSFએ પકડી પાકિસ્તાની બોટ, સર્ચ ઓપરેશન ચાલુ

નવી દિલ્હીઃ પંજાબ અજનાલા સેક્ટરની પાસે રાવી નદીમાં પાકિસ્તાનની એક સંદિગ્ધ બોટ મળી છે અને હવે બીએસએફ તેની તપાસ કરી રહી છે. પંજાબમાં અમૃતસરની પાસે ખાસા પોસ્ટના ક્કડ રાનિયા વિસ્તારમાં આ બોટ મળી છે અને આ જગ્યા પાકિસ્તાની સરહદની ખૂબ જ નજીક છે. આ બોટ મળ્યા બાદ આતંકવાદીની ઘૂસણખોરીની શક્યતા વધી ગઈ છે. સ્થાનીક મહિલાઓ અનુસાર તેમણે બોટમાંથી કેટલાક સંદિગ્ધને ઉતરતા પણ જોયા છે. આ સંદિગ્ધ બોટને જોયા બાદ બીએસએફ અને સેનાની વોટર વિંગ સમગ્ર વિસ્તારમાં સઘન સર્ચ ઓપરેશન ચલાવી રહી છે. સુરક્ષાદળો એ વાતની પણ તપાસ કરી રહ્યા છે કે ખરેખર બોટમાં બેસીને કોઈ ઘૂસણખોર ભારતની સરહદમાં દાખલ તો નથી થઈ ગયો ને. જોકે, બીએસએફના ઉચ્ચ અધિકારીઓનું એ પણ કહેવું છે કે, રાવી નદીમાં પાણીની સપાટી વધવાથી બની શકે કે આ બોટ તણાઈને સરહદમાં આવી ગઈ હોય. આ ઘટનાના એક દિવસ પહેલા જ પોરબંદરમાંથી પાકિસ્તાની બોટ ઝડપાઈ હતી.