મધ્ય પૂર્વમાં મહાયુદ્ધ, ભારતમાં PM મોદી એક્શન મોડમાં: CCSની બેઠકમાં લેવાયા મોટા નિર્ણયો

પશ્ચિમ એશિયામાં ચાલી રહેલા સંકટને પગલે દેશમાં ઇંધણ, વીજળી અને ખાતરની કોઈ અછત ન સર્જાય તે માટે પ્રધાનમંત્રીએ લીધો તાગ; કાળાબજાર રોકવા આપ્યા કડક આદેશ.

PM Modi CCS Meeting

Source : PTI

Show Quick Read

Key points generated by AI, verified by newsroom

• પશ્ચિમ એશિયા સંઘર્ષની અસર: ભારતમાં આવશ્યક ચીજોના પુરવઠાની સમીક્ષા.
• ખેડૂતોને ખાતર, ઉદ્યોગોને કાચો માલ: પુરવઠાની ખાતરી અપાઈ.
• આયાત-નિકાસ માટે નવા સ્ત્રોત, ખાસ મંત્રી સમૂહની રચના.
• સંગ્રહખોરી અને કાળાબજાર સામે કડક કાર્યવાહીના નિર્દેશ.

પશ્ચિમ એશિયા (મધ્ય પૂર્વ) માં અત્યારે જે યુદ્ધ જેવી સ્થિતિ ચાલી રહી છે, તેની અસર આખી દુનિયા પર પડી રહી છે. આ પરિસ્થિતિમાં ભારતને કોઈ મોટું નુકસાન ન થાય અને સામાન્ય જનતાને હાલાકી ન ભોગવવી પડે તે માટે પ્રધાનમંત્રી નરેન્દ્ર મોદીએ રવિવારે (22 માર્ચના રોજ) એક અત્યંત મહત્વપૂર્ણ ઉચ્ચ સ્તરીય બેઠક (CCS) યોજી હતી. આ બેઠકમાં ખાસ કરીને દેશમાં પેટ્રોલિયમ, ક્રૂડ ઓઇલ, ગેસ (LPG), વીજળી અને ખેડૂતો માટે ખાતરના પુરવઠાની ઝીણવટભરી સમીક્ષા કરવામાં આવી હતી. યુદ્ધના કારણે સપ્લાય ચેન ખોરવાય નહીં અને નાગરિકોને મોંઘવારી કે વસ્તુઓની અછતનો સામનો ન કરવો પડે તે માટે સરકારે આગોતરું આયોજન કરી લીધું છે.

ખેડૂતોને ખાતર અને દેશને વીજળીની કોઈ ચિંતા નહીં

બેઠકમાં સૌથી વધુ ભાર ખેડૂતો અને તેમની જરૂરિયાતો પર મુકાયો હતો. આવનારી ખરીફ સિઝનમાં ખેડૂતોને ખાતરની કોઈ અછત ન પડે તે મુદ્દે વિસ્તૃત ચર્ચા કરવામાં આવી હતી. સરકારે ખાતરી આપી છે કે આપણી પાસે ખાતરનો પૂરતો સ્ટોક છે અને ભવિષ્યમાં જરૂર પડે તો અન્ય દેશોમાંથી પણ ખાતર મંગાવવાના વિકલ્પો તૈયાર રખાયા છે, જેથી દેશની ખાદ્ય સુરક્ષા જળવાઈ રહે. આ ઉપરાંત, દેશના તમામ પાવર પ્લાન્ટ્સ પાસે કોલસાનો પૂરતો જથ્થો ઉપલબ્ધ હોવાથી ભારતમાં વીજળીની કોઈ જ અછત ઊભી થશે નહીં તેવો પણ વિશ્વાસ વ્યક્ત કરાયો હતો.

આયાત-નિકાસ માટે નવા રસ્તા અને ખાસ મંત્રી સમૂહની રચના

યુદ્ધના કારણે વેપાર અટકે નહીં તે માટે રાસાયણિક (કેમિકલ), ફાર્માસ્યુટિકલ અને પેટ્રોકેમિકલ જેવા ઉદ્યોગોને જરૂરી કાચો માલ બીજા દેશોમાંથી મળી રહે તે માટે આયાતના નવા સ્ત્રોતો શોધવા પર ભાર મૂકવામાં આવ્યો છે. સાથે જ, ભારતીય માલની નિકાસ વધારવા માટે નવા દેશોના બજારો પણ શોધવામાં આવશે. પીએમ મોદીએ આ તમામ પરિસ્થિતિને પહોંચી વળવા માટે મંત્રીઓ અને સચિવોનું એક ખાસ જૂથ (કમિટી) બનાવવાનો આદેશ આપ્યો છે, જે 'સંપૂર્ણ સરકાર' (Whole of Government) ના અભિગમ સાથે તમામ લોકો સાથે પરામર્શ કરીને કામ કરશે.

Chaired a meeting of the CCS to review the mitigating measures in the wake of the ongoing conflict in West Asia.

We had extensive discussions on short, medium and long term measures, including ensuring continued availability of fertilisers for farmers, diversifying import… pic.twitter.com/a0SQoGf39e

— Narendra Modi (@narendramodi) March 22, 2026

સંગ્રહખોરી અને કાળાબજાર કરનારાઓ પર કડક નજર

પીએમ મોદીએ બેઠકમાં સ્પષ્ટ કહ્યું છે કે આ સંઘર્ષની અસર આખી દુનિયા પર પડી રહી છે અને પરિસ્થિતિ સતત બદલાઈ રહી છે, પરંતુ ભારતના નાગરિકોને તેનાથી બચાવવા સરકાર પૂરા પ્રયાસો કરશે. તેમણે તમામ રાજ્ય સરકારો સાથે સતત સંપર્ક અને સંકલન જાળવવા જણાવ્યું છે, જેથી બજારમાં પેટ્રોલ, ડીઝલ કે અન્ય કોઈ આવશ્યક ચીજવસ્તુઓની સંગ્રહખોરી કે કાળાબજારી ન થાય.

પીએમ મોદીએ સોશિયલ મીડિયા (X) પર આપી માહિતી

બેઠક પૂર્ણ થયા બાદ પ્રધાનમંત્રીએ સોશિયલ મીડિયા પ્લેટફોર્મ 'X' પર પોસ્ટ કરતા લખ્યું હતું કે, "પશ્ચિમ એશિયાના સંઘર્ષને જોતા રાહત પગલાંની સમીક્ષા માટે મેં CCS ની બેઠકનું નેતૃત્વ કર્યું. અમે ખેડૂતો માટે ખાતરની સતત ઉપલબ્ધતા સુનિશ્ચિત કરવા, મુખ્ય ક્ષેત્રો માટે આયાતના સ્ત્રોતો વધારવા અને નવા સ્થળોએ નિકાસને પ્રોત્સાહન આપવા જેવા ટૂંકા, મધ્યમ અને લાંબા ગાળાના પગલાં પર વ્યાપક ચર્ચા કરી છે. અમે અમારા નાગરિકોને આ સંઘર્ષની અસરથી બચાવવા માટે સંપૂર્ણ રીતે પ્રતિબદ્ધ છીએ."

આ પણ વાંચો

24 વર્ષ અને એક પણ રજા નહીં! અમિત શાહે પીએમ મોદીના રેકોર્ડબ્રેક કાર્યકાળની કરી પ્રશંસા