ટેકનોલોજીથી રોકાશે પેપર લીક! PM મોદીએ આઈટી નિષ્ણાંત નંદન નીલેકણીને સોંપી મોટી જવાબદારી
નંદન નીલેકણીના નેતૃત્વમાં પરીક્ષા સુધારા માટે હાઈ-પાવર ટાસ્ક ફોર્સની રચના; પીએમ મોદીએ કહ્યું- ભવિષ્ય સાથે ચેડા કરનારા જેલમાં સડી રહ્યા છે.
PM Modi Paper Leak Law: દેશમાં તાજેતરમાં બનેલી NEET પેપર લીકની ઘટનાઓ વચ્ચે પ્રધાનમંત્રી નરેન્દ્ર મોદીએ એક નવો સેલ્ફી વીડિયો સંદેશ જાહેર કરીને દેશના વિદ્યાર્થીઓને મોટી રાહત આપી છે. પીએમ મોદીએ પોતાના ઇન્સ્ટાગ્રામ એકાઉન્ટ પર આ વીડિયો શેર કરતા જાહેરાત કરી છે કે, પેપર લીક જેવી ગંભીર ઘટનાઓને કાયમ માટે રોકવા કાલે સંસદમાં એક કડક કાયદો લાવવામાં આવશે. આ ઉપરાંત, ભવિષ્યમાં પરીક્ષાઓ એકદમ પારદર્શક અને વિશ્વસનીય બને તે હેતુથી, જાણીતા ટેકનોલોજી નિષ્ણાત નંદન નીલેકણીના નેતૃત્વમાં એક શક્તિશાળી 'ટાસ્ક ફોર્સ'ની રચના કરવાનો પણ ઐતિહાસિક નિર્ણય લેવામાં આવ્યો છે.
સેલ્ફી વીડિયોમાં આપ્યો કડક કાર્યવાહીનો સંદેશ
પોતાના મોબાઈલના સેલ્ફી કેમેરાથી જાતે જ રેકોર્ડ કરાયેલા આ ખાસ વીડિયોમાં પીએમ મોદીએ દેશના યુવાનોને સીધો અને સ્પષ્ટ સંદેશ આપ્યો છે. તેમણે કહ્યું કે, "મિત્રો, ભારત સરકાર આપણા વિદ્યાર્થીઓના ઉજ્જવળ ભવિષ્ય માટે સતત અનેક કડક પગલાં લઈ રહી છે. જે પણ લોકોએ વિદ્યાર્થીઓના ભવિષ્ય સાથે ચેડા કર્યા છે, તેઓ આજે જેલમાં સડી રહ્યા છે." આ ગેરરીતિના મામલાઓમાં વિદ્યાર્થીઓને ઝડપી ન્યાય મળે તે માટે સરકારે ફાસ્ટ-ટ્રેક કોર્ટની પણ સ્થાપના કરી છે અને હવે કડક જોગવાઈઓ સાથેના એક નવા કાયદા તરફ સરકાર ઝડપથી આગળ વધી રહી છે.
નંદન નીલેકણીની અધ્યક્ષતામાં ટાસ્ક ફોર્સની રચના
NEET પરીક્ષાના મોટા વિવાદ બાદ દેશની પરીક્ષા પ્રણાલીમાં મૂળભૂત સુધારા (Exam Reforms) કરવા પર પીએમ મોદીએ સૌથી વધુ ભાર મૂક્યો છે. તેમણે કહ્યું કે, "આપણે માત્ર આજનું નહીં, પરંતુ ભવિષ્ય વિશે પણ વિચારવું જ પડશે. આપણી પરીક્ષા લેવાની આખી સિસ્ટમ એકદમ વિશ્વસનીય, પારદર્શક અને લેટેસ્ટ ટેકનોલોજીથી સજ્જ હોવી જોઈએ."
આ જ લક્ષ્યને પાર પાડવા માટે સરકારે વિશ્વ વિખ્યાત ટેક એક્સપર્ટ શ્રી નંદન નીલેકણીની અધ્યક્ષતામાં એક ઉચ્ચ સ્તરીય (High-Powered) ટાસ્ક ફોર્સની રચના કરવાની સત્તાવાર જાહેરાત કરી છે.
HIGH POWERED TASK FORCE on examination reforms under the leadership of Shri Nandan Nilekani constituted.@NandanNilekani pic.twitter.com/mMpmPdIEL5
— Narendra Modi (@narendramodi) July 26, 2026
ટાસ્ક ફોર્સના રિપોર્ટના આધારે લેવાશે નિર્ણય
આ નવી અને શક્તિશાળી ટાસ્ક ફોર્સ દેશની પરીક્ષા પદ્ધતિમાં જરૂરી એવા તમામ સુધારાઓ પર પોતાનું પૂરું ધ્યાન કેન્દ્રિત કરશે. પ્રધાનમંત્રીએ પોતાના વીડિયોના અંતમાં વિદ્યાર્થીઓને ખાતરી આપતા જણાવ્યું છે કે, આ ટાસ્ક ફોર્સ દ્વારા જે પણ અહેવાલ (રિપોર્ટ) આપવામાં આવશે, તેના આધારે જ આગામી તમામ પરીક્ષાઓની વિશ્વસનીયતા વહેલામાં વહેલી તકે સુનિશ્ચિત કરવામાં આવશે.
આ પણ વાંચોઃ ધર્મેન્દ્ર પ્રધાનના રાજીનામા બાદ દેશને મળ્યા નવા શિક્ષણ મંત્રી, જાણો કોણ છે પ્રહલાદ જોશી?
ટોપ સ્ટોરી
ટ્રેન્ડિંગ સમાચાર
