Rahul Gandhi : રાહુલ ગાંધીએ દબાવી સરકારની દુ:ખતી નસ, રૂ. 20,000 કરોડ કોના?

કોંગ્રેસ નેતા રાહુલ ગાંધીએ સોશિયલ મીડિયા દ્વારા વડાપ્રધાન નરેન્દ્ર મોદીને વેધક સવાલ પુછ્યો છે.

રાહુલ ગાંધી

Rahul Gandhi Slams PM Modi Over Adani : કોંગ્રેસ નેતા રાહુલ ગાંધીએ સોશિયલ મીડિયા દ્વારા વડાપ્રધાન નરેન્દ્ર મોદીને વેધક સવાલ પુછ્યો છે. રાહુલ ગાંધીએ સવાલ કર્યો છે કે, આખરે 20 હજાર કરોડ રૂપિયા કોના છે? રાહુલ ગાંધીએ ફેસબુક દ્વારા 59 સેકન્ડનો વીડિયો શેર કરતા આ સવાલ પૂછ્યો હતો. તેમણે ગૌતમ અદાણીના મામલામાં વડાપ્રધાનને ઘેર્યા હતા.

રાહુલ ગાંધીએ પોતાની ફેસબુક પોસ્ટમાં લખ્યું છે કે, વડાપ્રધાન, તમને પ્રશ્નો પૂછ્યાને ઘણો સમય થઈ ગયો છે. મને હજુ સુધી તમારો જવાબ મળ્યો નથી, તેથી હું તેનું પુનરાવર્તન કરું છું. 20,000 કરોડ કોના છે? LIC, SBI, EPFOમાં જમા પૈસા અદાણીને કેમ આપવામાં આવે છે? તમારા અને અદાણી વચ્ચેના સંબંધો વિશે દેશને સત્ય કહો!

અદાણી કેસ પર કોંગ્રેસ આક્રમક

જાહેર છે કે, કોંગ્રેસ અને રાહુલ ગાંધી અદાણી મુદ્દે કેન્દ્ર સરકાર વિરુદ્ધ સતત આક્રમક છે. તાજેતરમાં જ હિંડનબર્ગનો રિપોર્ટ આવ્યા બાદ રાહુલ ગાંધીએ સંસદમાં સરકારને ઘેરી હતી. કોંગ્રેસ અદાણી કેસની તપાસ માટે સંયુક્ત સંસદીય સમિતિની રચના કરવાની માંગ કરી રહી છે. સંસદમાં મડાગાંઠ પાછળ કોંગ્રેસની આ માંગ હોવાનું માનવામાં આવે છે.

રાહુલે સંસદ સભ્યપદ ગુમાવ્યા બાદ પણ કેન્દ્ર પર કોંગ્રેસ પ્રહારો

કોંગ્રેસ એવો પણ આરોપ લગાવી રહી છે કે, અદાણી કેસ પર સરકાર પર સવાલ ઉઠાવવા માટે શાસક પક્ષ દ્વારા રાહુલ ગાંધીને નિશાન બનાવવામાં આવ્યા હતા, જેના કારણે તેમણે સંસદનું સભ્યપદ ગુમાવ્યું હતું. 25 માર્ચે પણ રાહુલ ગાંધીએ ટ્વિટર દ્વારા પોતાનો એક વીડિયો શેર કરતા કેન્દ્ર પર નિશાન સાધ્યું હતું. તેમણે ટ્વીટ કર્યું હતું કે, હું સાચું બોલું છું, હું દેશ માટે બોલું છું અને હું મારા અંતિમ શ્વાસ સુધી સત્યના માર્ગ પર ચાલીશ. વડાપ્રધાન, તમે એ જણાવો કે 20 હજાર કરોડ કોના છે?

વીડિયોમાં રાહુલ ગાંધીએ કહ્યું હતું કે, તમે મને (સંસદમાંથી) આજીવન અયોગ્ય ઠેરવો, મને જેલમાં નાખો, હું મારું કામ ચાલુ રાખીશ, હું રોકાઈશ નહીં. તેમણે કહ્યું હતું કે, "લોકો જાણે છે." અદાણીજી ભ્રષ્ટ વ્યક્તિ છે, હવે જનતાના મનમાં સવાલ ઉઠ્યો છે કે, ભારતના વડાપ્રધાન આ ભ્રષ્ટ વ્યક્તિને કેમ બચાવી રહ્યા છે?