કર્ણાટકના રાજકારણમાં ભૂકંપ! 48 નેતાઓ હની ટ્રેપમાં ભેરવાયા, સીડી બનીને તૈયાર....
તમામ પક્ષોના નેતાઓ હની ટ્રેપમાં ફસાયા, સીડી અને પેન ડ્રાઈવનો કર્યો ઉલ્લેખ.
Karnataka honey trap case: કર્ણાટકના સહકાર મંત્રી કેએન રાજન્નાએ ગુરુવારે હની ટ્રેપને લઈને એક મોટો દાવો કર્યો છે. તેમણે વિધાનસભામાં જણાવ્યું હતું કે કેન્દ્રીય નેતાઓ સહિત ઓછામાં ઓછા 48 નેતાઓ હની ટ્રેપમાં ફસાયા છે અને આ મુદ્દો કોઈ એક પક્ષ સુધી સીમિત નથી. તેમણે આ દરમિયાન સીડી અને પેન ડ્રાઈવનો પણ ઉલ્લેખ કર્યો હતો, જેનાથી આ કૌભાંડની ગંભીરતાનો અંદાજ લગાવી શકાય છે.
હની ટ્રેપને લઈને છેલ્લા કેટલાક દિવસોથી કર્ણાટકના રાજકારણમાં ભારે ચર્ચા ચાલી રહી છે. આ વચ્ચે મંત્રી કેએન રાજન્નાનું આ નિવેદન ખૂબ જ મહત્વનું માનવામાં આવે છે. તેમણે ગૃહમાં ભારપૂર્વક કહ્યું હતું કે તેમને પણ ફસાવવાનો પ્રયાસ કરવામાં આવ્યો હતો અને આવા કિસ્સાઓમાં માત્ર એક કે બે નહીં પરંતુ લગભગ 48 લોકો સીડી અને પેન ડ્રાઈવનો શિકાર બન્યા છે.
આ પહેલા કર્ણાટકના જાહેર બાંધકામ મંત્રી સતીશ જરકીહોલીએ પણ દાવો કર્યો હતો કે કર્ણાટકના એક વરિષ્ઠ મંત્રીને હની ટ્રેપ કરવાના બે પ્રયાસો કરવામાં આવ્યા હતા, જો કે તે સફળ થયા ન હતા અને પોલીસ આ મામલે તપાસ કરી રહી છે.
ન્યૂઝ એજન્સી IASના રિપોર્ટ અનુસાર, કેએન રાજન્નાના પુત્ર રાજેન્દ્ર રાજન્નાએ પણ જણાવ્યું છે કે તેમને પણ હની ટ્રેપમાં ફસાવવાનો પ્રયાસ કરવામાં આવ્યો હતો. તેમણે કહ્યું કે આ મામલો ઘણા સમય પહેલા શરૂ થયો હતો, જ્યારે તેમનો ફોન અને વીડિયો કોલ દ્વારા સંપર્ક કરવામાં આવ્યો હતો. જો કે, શરૂઆતમાં તેમણે આ અંગે કોઈ વાત કરી ન હતી, પરંતુ જ્યારે આ મુદ્દો વિધાનસભામાં ઉઠાવવામાં આવ્યો ત્યારે તેમણે આ અંગે ખુલીને વાત કરવાનું નક્કી કર્યું. રાજેન્દ્ર રાજન્નાએ એમ પણ કહ્યું કે તેમણે આ અંગે મુખ્યમંત્રી અને ગૃહ મંત્રી સાથે વાત કરી છે અને તેઓ આ મામલે સંપૂર્ણ તપાસ ઈચ્છે છે. તેમને શા માટે ફસાવવાનો પ્રયાસ કરવામાં આવ્યો તે અંગે તેમને કોઈ જાણકારી નથી.
કેએન રાજન્નાના આ દાવાએ કર્ણાટકના રાજકારણમાં ખળભળાટ મચાવી દીધો છે. 48 નેતાઓ હની ટ્રેપમાં ફસાયા હોવાની વાતથી રાજકીય વર્તુળોમાં અનેક તર્ક-વિતર્ક શરૂ થઈ ગયા છે. જો આ દાવા સાચા સાબિત થાય છે તો રાજ્યના રાજકારણમાં મોટો ભૂકંપ આવી શકે છે. હાલમાં આ મામલે કોઈ વધુ સત્તાવાર માહિતી સામે આવી નથી, પરંતુ વિધાનસભામાં મંત્રી દ્વારા કરવામાં આવેલો આ ધડાકો ચોક્કસપણે ગંભીર તપાસ માંગી રહ્યો છે.
ટ્રેન્ડિંગ સમાચાર
ટોપ સ્ટોરી
