ત્રીજા બાળક માટે 50 હજાર રૂપિયાનું ઇનામ, જો તે છોકરો હશે તો ગાય પણ મળશે; આ રાજ્યએ લોકોને આપી ઓફર

આંધ્ર પ્રદેશના ટીડીપી સાંસદે વસ્તી વધારવા માટે અનોખી યોજના જાહેર કરી, ત્રીજા બાળકને જન્મ આપનારી મહિલાઓને મળશે રોકડ પુરસ્કાર અને ગાય.

ટીડીપી સાંસદ કાલિસેટ્ટી અપ્પલા નાયડુ (ફાઇલ ફોટો)

Source : X @Kalisettitdp

TDP MP Appala Naidu third child reward: આંધ્રપ્રદેશમાં વસ્તી વધારવા માટે એક અનોખી યોજનાની જાહેરાત કરવામાં આવી છે. રાજ્યના મુખ્યમંત્રી અને તેલુગુ દેશમ પાર્ટી (ટીડીપી)ના પ્રમુખ ચંદ્રબાબુ નાયડુની વધુ બાળકો પેદા કરવાની હિમાયત વચ્ચે, પાર્ટીના એક સાંસદે મહિલાઓ માટે આકર્ષક ઓફર રજૂ કરી છે.

આંધ્ર પ્રદેશની વિઝિયાનગરમ લોકસભા સીટ પરથી TDP સાંસદ કાલિસેટ્ટી અપ્પલા નાયડુએ જાહેરાત કરી છે કે, તેમના મતવિસ્તારમાં ત્રીજા બાળકને જન્મ આપનારી દરેક મહિલાને 50 હજાર રૂપિયાનું રોકડ પુરસ્કાર આપવામાં આવશે. એટલું જ નહીં, તેમણે વધુમાં ઉમેર્યું કે જો ત્રીજું બાળક છોકરો હશે, તો મહિલાને એક ગાય પણ ભેટમાં આપવામાં આવશે.

ટીડીપી સાંસદ કાલિસેટ્ટી અપ્પલા નાયડુએ સ્પષ્ટતા કરી છે કે આ રોકડ પુરસ્કાર તેઓ તેમના પોતાના પગારમાંથી આપશે. આ જાહેરાત સોશિયલ મીડિયા પર ખૂબ જ ઝડપથી વાયરલ થઈ રહી છે, અને ટીડીપીના નેતાઓ અને કાર્યકરો દ્વારા તેને વ્યાપકપણે શેર કરવામાં આવી રહી છે. ટીડીપીના નેતાઓ માને છે કે નાયડુની આ પહેલ આંધ્રપ્રદેશની ઘટતી વસ્તીમાં વધારો લાવવામાં ક્રાંતિકારી પગલું સાબિત થશે. મુખ્યમંત્રી ચંદ્રબાબુ નાયડુએ પણ તેમના સાંસદના આ નિવેદનની પ્રશંસા કરી છે, જે યોજનાને સરકારનું સમર્થન હોવાનું સૂચવે છે. આ જાહેરાત આંતરરાષ્ટ્રીય મહિલા દિવસ પર વિઝિયાનગરમના રાજીવ સ્પોર્ટ્સ કમ્પાઉન્ડમાં આયોજિત એક વિશેષ બેઠક દરમિયાન કરવામાં આવી હતી.

મુખ્યમંત્રી ચંદ્રબાબુ નાયડુએ તાજેતરમાં દક્ષિણ ભારતમાં ઘટી રહેલી વસ્તી અંગે ગંભીર ચિંતા વ્યક્ત કરી હતી. દિલ્હીની મુલાકાત દરમિયાન, તેમણે વૃદ્ધ વસ્તીના કારણે ઉભા થતા પડકારો પર પ્રકાશ પાડ્યો હતો અને વસ્તી નિયંત્રણને બદલે લાંબા ગાળાના વસ્તી વિષયક વ્યવસ્થાપન પર ધ્યાન કેન્દ્રિત કરવાની જરૂરિયાત પર ભાર મૂક્યો હતો. તેમણે ઉત્તર પ્રદેશ અને બિહાર જેવા રાજ્યોમાં યુવા વસ્તી હોવાનો ઉલ્લેખ કર્યો હતો, જે આર્થિક વિકાસ માટે ફાયદાકારક હોઈ શકે છે. તેમના બદલાયેલા વિચારોને સ્પષ્ટ કરતા, નાયડુએ જાહેર કર્યું કે એક સમયે તેઓ કુટુંબ નિયોજનના સમર્થક હતા, પરંતુ હવે તેઓ વસ્તી વધારવાના પક્ષમાં છે, કારણ કે ભારત ડેમોગ્રાફિક ડિવિડન્ડમાં સૌથી વધુ ફાયદો ધરાવતો દેશ છે.

આ ઉપરાંત, મુખ્યમંત્રીએ શનિવારે એક અન્ય મહત્વપૂર્ણ જાહેરાત કરી હતી કે આંધ્ર પ્રદેશ સરકાર તમામ મહિલા કર્મચારીઓને ડિલિવરી સમયે પ્રસૂતિ રજા આપશે, પછી ભલે તેઓને ગમે તેટલા બાળકો હોય. આ પગલાં રાજ્ય સરકારની વસ્તી વધારવાની અને મહિલા કલ્યાણને પ્રોત્સાહન આપવાની પ્રતિબદ્ધતા દર્શાવે છે.