યુપીમાં ભાજપની સ્થિતિ કેવી? 2027ની ચૂંટણીના 9 મહિના પહેલા Axis My India ના પ્રદીપ ગુપ્તાનો મોટો દાવો

એક્સિસ માય ઇન્ડિયાના ચેરમેને યુપી ચૂંટણી અંગે કહ્યું કે, રાજ્યમાં લોકો સંતુષ્ટ છે, પણ જો સરકારનું કામ થોડુંય નબળું પડે તો અહીં સમીકરણો ખૂબ જ ઝડપથી બદલાઈ જાય છે. 2022ના આંકડા પણ આ જ વાતની સાક્ષી છે.

up election 2027 axis my india pradeep gupta bjp sp vote share

Source : PTI

Show Quick Read

Key points generated by AI, verified by newsroom

• લોકો હાલ સંતુષ્ટ છે, પણ વિકલ્પ શોધતા વાર નથી.
• યુપીમાં રાજકીય સમીકરણો ખૂબ જ ઝડપથી બદલાય છે.
• મતોનું વિભાજન સીટોના ગણિત પર મોટી અસર કરે છે.
• 2022માં ભાજપને 41.29% મતો સાથે 255 બેઠકો મળી.

UP Election 2027: ઉત્તર પ્રદેશમાં આગામી વર્ષે એટલે કે 2027માં વિધાનસભાની ચૂંટણીઓ યોજાવા જઈ રહી છે. ચૂંટણીમાં હવે માંડ 9 મહિના જેટલો સમય બાકી રહ્યો છે, ત્યારે દરેકના મનમાં એક જ સવાલ છે કે દેશના સૌથી મોટા રાજ્ય યુપીમાં ભાજપની વર્તમાન સ્થિતિ કેવી છે? આ તમામ અટકળો વચ્ચે દેશની જાણીતી પોલિંગ એજન્સી 'એક્સિસ માય ઇન્ડિયા'ના ચેરમેન પ્રદીપ ગુપ્તાએ યુપી ચૂંટણીને લઈને એક મોટો દાવો કર્યો છે. તેમણે વર્તમાન સરકાર વિશે લોકોનો મૂડ કેવો છે અને યુપીનું રાજકારણ કેવી રીતે કામ કરે છે, તેનું એકદમ સચોટ અને રસપ્રદ વિશ્લેષણ રજૂ કર્યું છે.

લોકો સંતુષ્ટ છે, પણ વિકલ્પ શોધતા વાર નથી લાગતી

યુપીના રાજકારણની વાત કરતા પ્રદીપ ગુપ્તાએ જણાવ્યું છે કે, "હાલમાં ઉત્તર પ્રદેશમાં લોકોના સંતોષનું સ્તર ઘણું સારું છે. આ જોતા એવું લાગે છે કે રાજ્યમાં કોઈ મોટી સમસ્યાઓ નથી. પરંતુ, યુપી એક અલગ જ પ્રકારનું રાજ્ય છે જ્યાં વસ્તુઓ અને રાજકીય સમીકરણો ખૂબ જ ઝડપથી બદલાઈ જાય છે. જો વર્તમાન સરકારનું કામ થોડું પણ નબળું પડે, તો લોકો તરત જ નવો વિકલ્પ શોધવા લાગે છે. અહીં આ જ રીતે કામ થાય છે."

સમાચાર એજન્સી PTI સાથેની વાતચીતમાં તેમણે ઉદાહરણ આપતા સમજાવ્યું કે, અગાઉ બસપા સુપ્રીમો માયાવતી 29 ટકા મતો સાથે અને સમાજવાદી પાર્ટી લગભગ 26 ટકા મતો સાથે પણ પૂર્ણ બહુમતીવાળી સરકાર બનાવી ચૂક્યા છે. એટલે કે, જો મતોનું યોગ્ય વિભાજન થાય, તો માત્ર 25 ટકા મત મેળવનારી પાર્ટી પણ યુપીમાં સરળતાથી ચૂંટણી જીતી શકે છે.

2022ના ચૂંટણી પરિણામો શું ઈશારો કરે છે?

વર્ષ 2022ની વિધાનસભા ચૂંટણીના પરિણામો પણ એ જ દર્શાવે છે કે યુપીમાં મતોની ટકાવારી (વોટ શેર) અને જીતેલી સીટોના આંકડા વચ્ચે કેટલો મોટો અને ચોંકાવનારો તફાવત હોઈ શકે છે. 2022માં ભારતીય જનતા પાર્ટી (BJP)એ 41.29 ટકા મતો મેળવીને 255 સીટો જીતી હતી, જ્યારે સમાજવાદી પાર્ટી (SP)ને 32.06 ટકા મતો સાથે 111 સીટો મળી હતી. સૌથી વધુ આશ્ચર્યની વાત એ છે કે, બહુજન સમાજ પાર્ટી (BSP)ને 12.88 ટકા જેટલા સારા વોટ મળવા છતાં તેમને માત્ર 1 જ સીટથી સંતોષ માનવો પડ્યો હતો. બીજી બાજુ, કોંગ્રેસે 399 સીટો પર ચૂંટણી લડી હતી, પણ 2.33 ટકા મતો સાથે તેઓ માત્ર 2 સીટો જ જીતી શક્યા હતા.

આ પણ વાંચોઃ બંગાળ એક્ઝિટ પોલ: મમતા દીદીનો ગઢ તૂટશે? 4 એજન્સીઓના સર્વેમાં ભાજપને સ્પષ્ટ બહુમતી

મતોનું વિભાજન અને સીટોનું ગણિત

આ આંકડાઓ સ્પષ્ટ કરે છે કે ઉત્તર પ્રદેશમાં જ્યારે ઘણી પાર્ટીઓ મેદાનમાં હોય (બહુકોણીય મુકાબલો) ત્યારે મતોનું વિભાજન સીટોના ગણિત પર સીધી અને મોટી અસર કરે છે. આ જ કારણ છે કે ઓછા મત મેળવનારી પાર્ટી વધુ બેઠકો જીતી જાય છે અને વધુ મત મેળવનારી પાર્ટી પાછળ રહી જાય એવું પણ બને છે. નોંધનીય છે કે, 2022માં 6 લાખથી વધુ લોકોએ NOTA વિકલ્પ પસંદ કર્યો હતો અને અપક્ષ ઉમેદવારોને પણ લગભગ 10 લાખ મતો મળ્યા હતા, છતાં તેઓ એકપણ બેઠક જીતી શક્યા ન હતા. હવે જોવાનું એ રહે છે કે 2027માં યુપીની જનતા કોના પર કળશ ઢોળે છે.