સૌરાષ્ટ્રના આ જિલ્લાનાં સંખ્યાબંધ ગામોમાં સ્વૈચ્છિક લોકડાઉન જાહેર. જાણો શું લેવાયો નિર્ણય ?

કોરોનાની ગંભીર સ્થિતિ છતાં તંત્ર બેફિકર રહેતા લોકોએ જાતે જ લોકડાઉન જાહેર કરી દીધું છે. જસદણ, ગોંડલ સહિતનાં તાલુકાનાં ગામોમાં વેપારીઓએ દુકાનો ખોલવાનો સમય ઘટાડ્યો છે.

રાજકોટઃ ગુજરાતમાં કોરોનાના કેસો સતત વધી રહ્યા છે. હવે સૌરાષ્ટ્રમાં પણ કોરોના હાહાકાર મચાવી રહ્યો છે. ત્યારે સૌરાષ્ટ્રના ત્રણ ધારાસભ્યો દ્વારા ફરીથી લોકડાઉનની માંગ પણ કરવામાં આવી છે. એટલું જ નહીં, રાજકોટ જિલ્લામાં પણ સોશિયલ મીડિયા પર લોકડાઉનની માંગ ઉઠી છે. જોકે, આ બધાની વચ્ચે રાજકોટ જિલ્લાના અનેક ગામોમાં સ્વયંભૂ લોકડાઉન જાહેર કરાયું છે. કોરોનાની ગંભીર સ્થિતિ છતાં તંત્ર બેફિકર રહેતા લોકોએ જાતે જ લોકડાઉન જાહેર કરી દીધું છે. જસદણ, ગોંડલ સહિતનાં તાલુકાનાં ગામોમાં વેપારીઓએ દુકાનો ખોલવાનો સમય ઘટાડ્યો છે. આવી જ રીતે સુરેન્દ્રનગર જિલ્લામાં પણ જિલ્લા કલેક્ટર દ્વારા સુરેન્દ્રનર, જોરાવરનગર, રતનપર, લીંબડીમાં દુકાનો ખોલવાનો સમય ઘટાડ્યો છે. બોટાદ જિલ્લામાં કોરોનાના વધી રહેલા કેસાના કારણે રાણપુર વેપારી મહામંડળે મહત્વપુર્ણ નિર્ણય લીધો છે. આ નિર્ણય પ્રમાણે આજથી એટલે કે સોમવારથી 12 દિવસ સુધી રાણપુરની તમામ દુકાનો બપોરે 2 વાગ્યા સુધી જ ખુલ્લી રહેશે. બોટાદ ના રાણપુરમાં વધતા જતા કોરોના કેસોને કારણે આ નિર્ણય લેવાયો છે. રાણપુર વેપારી મંડળની મીટીંગમાં કોરોના સંક્રમણને અટકાવવા આ મહત્વપૂર્ણ નિર્ણય લેવામાં આવ્યો છે. વેપારી મંડળે જાહેરાત કરી છે કે, આજે તારીખ-20-7-20 થી 31-7-20 સુધી સવારના 7થી બપોરના 2 વાગ્યા સુધી રાણપુર તમામ દુકાનો, લારી, ગલ્લા, કેબીન સહીતના તમામ ધંધા-રોજગાર ચાલુ રહેશે જ્યારે બપોરના 2 વાગ્યા પછી તમામ ધંધા સ્વયંભૂ બંધ રહેશે અને આ સમય દરમ્યાન સંપૂર્ણ લોકડાઉન પાળવામાં આવશે.