Vadodara Rain: વડોદરામાં ગાજવીજ સાથે ધોધમાર વરસાદ, અલકાપુરી, સયાજીગંજ અને માંજલપુર સહિતના વિસ્તારો પાણી-પાણી
Vadodara Heavy Rain: વરસાદના કારણે વડોદરા જિલ્લાના વાતાવરણમાં ભારે ઠંડક પ્રસરી જતાં લોકોને ગરમીથી રાહત મળી છે
- વડોદરામાં રેડ એલર્ટ વચ્ચે ભારે પવન સાથે ધોધમાર વરસાદ.
- નીચાણવાળા વિસ્તારોમાં જળબંબાકાર, તકેદારી ખાતર શાળા-કોલેજો બંધ.
- વાઘોડિયામાં ઘરોમાં પાણી ભરાતા ઘરવખરીને મોટું નુકસાન થયું.
- વરસાદથી વાતાવરણ ઠંડુ થયું, ખેડૂતોમાં વાવણી માટે હર્ષ.
Vadodara Heavy Rain: હવામાન વિભાગની રેડ એલર્ટ આગાહી વચ્ચે આજે વડોદરા શહેર અને જિલ્લાના તમામ તાલુકાઓમાં ભારે પવન અને વીજળીના કડાકા સાથે ધોધમાર વરસાદ ખાબક્યો હતો. વરસાદના કારણે વાઘોડિયા સહિતના નીચાણવાળા વિસ્તારોમાં જળબંબાકારની સ્થિતિ સર્જાતાં તકેદારીના ભાગરૂપે તંત્ર દ્વારા તમામ શાળા-કોલેજોમાં રજા જાહેર કરવામાં આવી છે.
વડોદરા શહેરમાં સવારથી જ મેઘરાજાએ રૌદ્ર સ્વરૂપ ધારણ કર્યું હતું. શહેરના અલકાપુરી, સયાજીગંજ, સમા, રાવપુરા, માંજલપુર, અકોટા, ગોરવા, હરણી અને મક્કરપુરા તેમજ બાજવા, કોયલી અને દશરથ સહિતના વિસ્તારોમાં તોફાની પવન સાથે વરસાદ વરસ્યો હતો. જિલ્લાના તાલુકાઓની વાત કરીએ તો, વાઘોડિયામાં ધોધમાર વરસાદથી ભારે તારાજી સર્જાઈ હતી. વાઘોડિયાના પીપળીયા, ગોરજ, રૂસ્તમપુરા, નિમેટા અને આજવા વિસ્તારમાં પાણી ફરી વળ્યા હતા. શિવકૃપા, પરિશ્રમ અને શ્રમ સાધના સોસાયટીના ઘરોમાં પાણી ભરાઈ જવાથી લોકોની ઘરવખરીને મોટું નુકસાન પહોંચ્યું હતું. આ ઉપરાંત સાવલી, ટૂંડાવ, ગોઠડા અને મુંવાલમાં વીજળીના કડાકા સાથે વરસાદ થયો હતો. ડભોઈના ટાવર બજાર, જૈન વાગા અને એસટી ડેપો વિસ્તાર તેમજ શિનોરમાં રાત્રિ દરમિયાન ૧.૪૯ ઈંચ વરસાદ નોંધાયો હતો, જેથી સમગ્ર પંથકમાં જળબંબાકારની પરિસ્થિતિ ઉત્પન્ન થઈ હતી.
વરસાદના કારણે વડોદરા જિલ્લાના વાતાવરણમાં ભારે ઠંડક પ્રસરી જતાં લોકોને ગરમીથી રાહત મળી છે, જ્યારે વાવણી લાયક વરસાદથી ધરતીપુત્રોમાં હર્ષની લહેર જોવા મળી રહી છે. જોકે નીચાણવાળા વિસ્તારોમાં પાણી ભરાવાના કારણે સ્થાનિક તંત્ર દ્વારા રસ્તાઓ પરથી પાણી નિકાલની કામગીરી ઝડપથી શરૂ કરી દેવામાં આવી છે.
ગુજરાતમાં 24 કલાકમાં 106 તાલુકામાં ધોધમાર વરસાદ
રાજ્યમાં બદલાયેલા હવામાનને પગલે વિવિઘ વિસ્તારોમાં વરસાદી માહોલ જામ્યો છે, જેમાં ખાસ કરીને 7 તાલુકાઓમાં 2.09 ઈંચથી લઈને 2.38 ઈંચ જેટલો નોંધપાત્ર વરસાદ પડ્યો છે. સ્ટેટ ઈમરજન્સી ઓપરેશન સેન્ટરના આંકડા અનુસાર, પંચમહાલના જાંબુઘોડા અને છોટાઉદેપુરના પાવી જેતપુર તાલુકામાં સૌથી વધુ 2.83 ઈંચ વરસાદ ખાબક્યો છે. આ ઉપરાંત ક્વાંટ તાલુકામાં અઢી ઈંચ, નસવાડીમાં 2.36 ઈંચ અને તાપીના કુકરમુંડા તાલુકામાં 2.17 ઈંચ વરસાદ નોંધાયો છે. રાજ્યના મોટાભાગના વિસ્તારોમાં વાદળછાયા વાતાવરણ અને ભારે પવન સાથે પડેલા વરસાદથી નીચાણવાળા વિસ્તારોમાં પાણી ભરાવાના દ્રશ્યો સામે આવ્યા હતા તેમજ ગ્રામ્ય વિસ્તારોમાં વાતાવરણ આહલાદક બની ગયું હતું.
ટોપ સ્ટોરી
ટ્રેન્ડિંગ સમાચાર
