વિદેશી મીડિયામાં ભારતની ચૂંટણીનો ડંકો: બંગાળમાં મોદીની જીતના પાકિસ્તાને પણ કર્યા વખાણ, જાણો બાંગ્લાદેશે શું કહ્યું?

તમિલનાડુમાં સુપરસ્ટાર વિજયની ધમાકેદાર એન્ટ્રી અને બંગાળમાં મમતા બેનર્જીના 15 વર્ષના શાસનનો અંત આંતરરાષ્ટ્રીય મીડિયામાં ચર્ચાનો મુખ્ય વિષય બન્યો.

Global Media on Indian Elections, Pak & Dhaka Praise Modi's Bengal Win

Source : X/@narendramodi

Show Quick Read

Key points generated by AI, verified by newsroom

• પશ્ચિમ બંગાળમાં ભાજપની ઐતિહાસિક જીત, મોદીની સ્થિતિ મજબૂત બની.
• તમિલનાડુમાં અભિનેતા વિજયની નવી પાર્ટીની ધમાકેદાર જીત.
• આંતરરાષ્ટ્રીય મીડિયાએ ચૂંટણી પરિણામોને રાજકીય ઉથલપાથલ ગણાવી.
• પાકિસ્તાન, બાંગ્લાદેશમાં પણ ચૂંટણી પરિણામોની નોંધ લેવાઈ.

PM Modi Bengal win: ભારતમાં તાજેતરમાં 4 રાજ્યો અને 1 કેન્દ્રશાસિત પ્રદેશમાં યોજાયેલી વિધાનસભા ચૂંટણીના પરિણામોએ આખી દુનિયાનું ધ્યાન ખેંચ્યું છે. પશ્ચિમ બંગાળમાં છેલ્લા 15 વર્ષથી સત્તા પર રહેલા મમતા બેનર્જીના શાસનનો અંત લાવીને પીએમ નરેન્દ્ર મોદીની ભાજપે મેળવેલી ઐતિહાસિક જીતની લંડનથી લઈને ન્યૂયોર્ક અને ઇસ્લામાબાદથી ઢાકા સુધી ચર્ચા થઈ રહી છે. આટલું જ નહીં, તમિલનાડુમાં સુપરસ્ટાર જોસેફ વિજયની નવી પાર્ટીની ધમાકેદાર એન્ટ્રી અને જીત પણ વિદેશી અખબારોમાં છવાયેલી છે. નોંધનીય વાત એ છે કે, ભારતની આ જંગી રાજકીય ઉથલપાથલ માટે પાકિસ્તાન અને બાંગ્લાદેશના મીડિયાએ પણ પીએમ મોદી અને વિજયની સફળતાની નોંધ લીધી છે.

બ્રિટિશ મીડિયા: 12 વર્ષની સૌથી મોટી સિદ્ધિ

જો બ્રિટિશ મીડિયાની વાત કરીએ તો, બીબીસી (BBC) અને ધ ગાર્ડિયન (The Guardian) બંનેએ બંગાળમાં ભાજપની આ જીતને ખૂબ જ મહત્વ આપ્યું છે.

બીબીસી: પોતાના ખાસ રિપોર્ટમાં નોંધ્યું છે કે, ભારતના સૌથી મુશ્કેલ ગણાતા રાજકીય ગઢ બંગાળને સર કરવું એ પીએમ મોદીના 12 વર્ષના કાર્યકાળની સૌથી મોટી સિદ્ધિઓમાંની એક છે. આ માત્ર કોઈ ત્રણ ટર્મ જૂની સરકારની હાર નથી, પણ પૂર્વ ભારતમાં ભાજપના વધતા પ્રભાવની મોટી સાબિતી છે.

ધ ગાર્ડિયન: આ અખબારે લખ્યું છે કે, બંગાળની આ જીત ભારતીય રાજકારણમાં બહુ મોટો બદલાવ લાવશે અને વિપક્ષ માટે આ એક બહુ મોટો ફટકો સાબિત થશે.

અમેરિકન મીડિયા: મોદીની રાજકીય પકડ વધુ મજબૂત બની

અમેરિકન મીડિયા પણ આ પરિણામોથી દંગ છે અને તેને ઐતિહાસિક ગણાવી રહ્યું છે.

ન્યૂ યોર્ક ટાઇમ્સ: પોતાના રિપોર્ટમાં ભાજપની આ જીતને 'ઐતિહાસિક' ગણાવતા લખ્યું છે કે, પીએમ મોદીના પક્ષે પહેલીવાર આટલા મોટા રાજ્યમાં સત્તા મેળવીને ઇતિહાસ રચી દીધો છે. આ સાથે જ અખબારે તમિલનાડુમાં અભિનેતા વિજયની જીતને પણ આ ચૂંટણીનું સૌથી મોટું સરપ્રાઇઝ ગણાવ્યું છે.

વોશિંગ્ટન પોસ્ટ: પોતાના વિશ્લેષણમાં સ્પષ્ટ કર્યું છે કે 2024ની લોકસભા ચૂંટણીમાં સાથી પક્ષોના ટેકાથી સરકાર બનાવ્યા બાદ, બંગાળની આ મોટી જીતથી પીએમ મોદીની રાજકીય તાકાત અને સ્થિતિ વધુ મજબૂત બની છે. સાથે જ કેરળમાં કોંગ્રેસ ગઠબંધન સામે ડાબેરી સરકારની હારને પણ એક મોટી ઘટના માનવામાં આવી છે.

તમિલનાડુમાં 'થલપતિ' વિજયનો જાદુ

આ ચૂંટણીઓમાં માત્ર બંગાળ જ નહીં, દક્ષિણ ભારતનું તમિલનાડુ પણ દુનિયાભરમાં ચર્ચાનો વિષય બન્યું છે. વિદેશી મીડિયાએ તમિલ સુપરસ્ટાર જોસેફ વિજયની રાજકીય એન્ટ્રીની ખાસ નોંધ લીધી છે. વિજયે માત્ર 2 વર્ષ પહેલાં જ પોતાની 'તમિલગા વેટ્રી કઝગમ' (TVK) પાર્ટી બનાવી હતી, અને હવે તેણે ત્યાંની શક્તિશાળી શાસક પાર્ટી DMKને સત્તા પરથી હટાવી દીધી છે, જેને આંતરરાષ્ટ્રીય મીડિયાએ એક ચોંકાવનારૂં પરિણામ ગણાવ્યું છે.

પાડોશી દેશોની પ્રતિક્રિયા: પાકિસ્તાન અને બાંગ્લાદેશમાં ચર્ચા
ભારતની ચૂંટણીઓ હોય અને પાડોશી દેશોમાં તેની ચર્ચા ન થાય એવું તો બને જ નહીં!

પાકિસ્તાન: પાકિસ્તાનના જાણીતા અખબાર 'ડોન' (Dawn) એ પણ એએફપી (AFP)નો રિપોર્ટ છાપ્યો છે. જેમાં એ વાતનો સ્વીકાર કરવામાં આવ્યો છે કે મોદીની પાર્ટીએ પશ્ચિમ બંગાળ જેવા વિપક્ષના સૌથી મજબૂત ગઢમાં જીત મેળવી લીધી છે. રિપોર્ટ મુજબ, આ જીત 2029ની સામાન્ય ચૂંટણીઓ પહેલા પીએમ મોદીની સ્થિતિને અત્યંત મજબૂત કરશે.

બાંગ્લાદેશ: પડોશી દેશ બાંગ્લાદેશમાં પણ આ પરિણામોના પડઘા પડ્યા છે. બાંગ્લાદેશના 'ઢાકા ટ્રિબ્યુન' અખબારે તમિલનાડુમાં સીએમ એમ.કે. સ્ટાલિનની પોતાની સીટ પર થયેલી હાર અને વિજયની પાર્ટીની જબરદસ્ત જીતને એક બહુ મોટા આંચકા તરીકે વર્ણવી છે.