એશિયામાં વધુ એક યુદ્ધના ભણકારા: પાકિસ્તાને અફઘાનિસ્તાન પર કર્યો ભયાનક હવાઈ હુમલો, કાબુલમાં 5 મોટા ધડાકા

તાલિબાનનો દાવો: પાકિસ્તાની વાયુસેનાએ પુલ-એ-ચરખી વિસ્તારમાં આવેલી નશા મુક્તિ હોસ્પિટલને નિશાન બનાવી; અનેક નિર્દોષ નાગરિકોના મોતની આશંકા.

Pakistan airstrikes Afghanistan

Source : ai

Show Quick Read

Key points generated by AI, verified by newsroom

એક તરફ મિડલ ઈસ્ટમાં અમેરિકા, ઈઝરાયલ અને ઈરાન વચ્ચે યુદ્ધનો માહોલ ગરમાયેલો છે, ત્યાં બીજી તરફ એશિયામાં પણ યુદ્ધના ભણકારા વાગી રહ્યા છે. પાકિસ્તાન અને અફઘાનિસ્તાન વચ્ચે અચાનક તણાવ ચરમસીમાએ પહોંચી ગયો છે. સોમવારે (16 માર્ચ) પાકિસ્તાની વાયુસેનાએ અફઘાનિસ્તાનની રાજધાની કાબુલ પર એક મોટો અને ભીષણ હવાઈ હુમલો (એરસ્ટ્રાઈક) કર્યો છે. તાલિબાનના પ્રવક્તાએ આ હુમલાની પુષ્ટિ કરતા જણાવ્યું છે કે કાબુલમાં 5 મોટા ધડાકા સંભળાયા છે, જેમાં એક નશા મુક્તિ (ડ્રગ ડી-એડિક્શન) હોસ્પિટલને નિશાન બનાવવામાં આવી છે. આ હુમલામાં સારવાર લઈ રહેલા અનેક નિર્દોષ નાગરિકોના મોત થયા હોવાની પૂરી આશંકા છે.

હોસ્પિટલ અને સરકારી ઈમારતો પર બોમ્બમારો

અફઘાનિસ્તાનની જાણીતી ન્યૂઝ એજન્સી 'ટોલો ન્યૂઝ' (Tolo News) ના સૂત્રોના જણાવ્યા અનુસાર, પાકિસ્તાની સેનાએ કાબુલના પુલ-એ-ચરખી વિસ્તારમાં આવેલી એક ડ્રગ ડી-એડિક્શન હોસ્પિટલ પર સીધો હુમલો કર્યો છે. જોકે, કેટલાક અન્ય મીડિયા રિપોર્ટ્સ એવો પણ દાવો કરી રહ્યા છે કે પાકિસ્તાની વાયુસેનાએ આ બોમ્બમારો કરીને અફઘાનિસ્તાનની કેટલીક મહત્વની સરકારી ઈમારતોને પણ નિશાન બનાવી છે.

તાલિબાને પાકિસ્તાનની કાર્યવાહીને વખોડી કાઢી

અફઘાનિસ્તાનમાં સત્તા પર રહેલા તાલિબાન શાસનના પ્રવક્તા ઝબીહુલ્લાહ મુજાહિદે સોશિયલ મીડિયા પ્લેટફોર્મ 'X' પર પોસ્ટ કરીને આખી દુનિયાને આ હુમલાની માહિતી આપી છે. તેમણે લખ્યું છે કે, પાકિસ્તાને ફરી એકવાર અફઘાનિસ્તાનની એરસ્પેસ (હવાઈ સીમા) નું ઉલ્લંઘન કર્યું છે અને કાબુલની હોસ્પિટલ પર બોમ્બ ફેંક્યા છે. મુજાહિદે રોષ ઠાલવતા કહ્યું કે, આ હુમલામાં મોટી સંખ્યામાં એવા સામાન્ય નાગરિકો માર્યા ગયા છે અને ઘાયલ થયા છે, જેઓ ત્યાં નશામુક્તિની સારવાર લઈ રહ્યા હતા. તાલિબાને પાકિસ્તાનની આ હરકતની આકરી નિંદા કરતા તેને 'માનવતા વિરુદ્ધનો મોટો ગુનો' ગણાવ્યો છે.

15 માર્ચે કંદહારમાં પણ કર્યો હતો હુમલો

નોંધનીય છે કે, પાકિસ્તાને આ પહેલીવાર નથી કર્યું. આ પહેલાં બરાબર એક દિવસ અગાઉ એટલે કે 15 માર્ચે પણ પાકિસ્તાને દક્ષિણ અફઘાનિસ્તાનના લશ્કરી ઠેકાણાઓ પર ભારે હુમલા કર્યા હતા. ન્યૂઝ એજન્સી AFP ના રિપોર્ટ મુજબ, પાકિસ્તાની સેનાએ કંદહારમાં અફઘાનિસ્તાનના ટેકનિકલ સપોર્ટ ઈન્ફ્રાસ્ટ્રક્ચર અને હથિયારોના ગોડાઉનને ઉડાવી દીધા હતા. મોડી રાત્રે સ્થાનિક લોકોએ શહેરની ઉપર લશ્કરી વિમાનો ઉડતા જોયા હતા અને ઉપરાછાપરી અનેક ધડાકા પણ સાંભળ્યા હતા.

આ પણ વાંચો

‘હું ધારું તો 1 કલાકમાં આખા ઈરાનની વીજળી ગુલ કરી શકું, પણ...’: અમેરિકાના રાષ્ટ્રપતિ ડોનાલ્ડ ટ્રમ્પની મોટી ધમકી