મધ્ય પૂર્વમાં ફરી ભડકશે યુદ્ધની આગ? ટ્રમ્પે કહ્યું- ઈરાને હજુ પૂરતી કિંમત ચૂકવી નથી

અમેરિકા અને ઈરાન વચ્ચે તણાવ વધ્યો, ટ્રમ્પે ઈરાનના નવા શાંતિ પ્રસ્તાવને નકારવાના સંકેત આપ્યા.

Trump on Iran, They Haven't Paid Enough, Middle East War Tensions Rise

Source : એબીપી અસ્મિતા

Show Quick Read

Key points generated by AI, verified by newsroom

• ઈરાનનો 14 મુદ્દાનો શાંતિ પ્રસ્તાવ ટ્રમ્પને સ્વીકાર્ય નથી.
• ઈરાન અમેરિકા પર પ્રતિબંધો હટાવવા અને સૈનિકો પાછા ખેંચવા કહે છે.
• હોર્મુઝ સ્ટ્રેટ પર ઈરાન નમતું જોખવા તૈયાર નથી.
• યુદ્ધના ખતરા વચ્ચે ઓમાન રાજદ્વારી પ્રયાસો કરી રહ્યું છે.

Trump Iran News 2026: મધ્ય પૂર્વમાં શાંતિની આશાઓ પર ફરી એકવાર પાણી ફરી વળતું દેખાઈ રહ્યું છે. અમેરિકા અને ઈરાન વચ્ચેનો તણાવ હવે ચરમસીમાએ પહોંચી ગયો છે. અમેરિકાના રાષ્ટ્રપતિ ડોનાલ્ડ ટ્રમ્પે કડક વલણ અપનાવતા સ્પષ્ટ કહી દીધું છે કે ઈરાને હજુ સુધી પોતાના કરેલાની પૂરતી કિંમત ચૂકવી નથી. ઈરાન દ્વારા પાકિસ્તાનની મધ્યસ્થીથી મોકલવામાં આવેલા 14 મુદ્દાના નવા શાંતિ પ્રસ્તાવને ટ્રમ્પ સ્વીકારે તેવી શક્યતા નહિવત્ છે. આ ઉપરાંત, દુનિયાના સૌથી મહત્વના જળમાર્ગ 'હોર્મુઝ સ્ટ્રેટ' ને લઈને પણ બંને દેશો સામસામે આવી ગયા છે, જેનાથી નિષ્ણાતો માને છે કે આગામી દિવસોમાં યુદ્ધની સ્થિતિ વધુ ભયંકર બની શકે છે.

શું છે ઈરાનનો 14 મુદ્દાનો નવો પ્રસ્તાવ?

શનિવારે ટ્રમ્પે જણાવ્યું હતું કે તેઓ ઈરાન તરફથી આવેલા એક નવા પ્રસ્તાવ પર વિચાર તો કરી રહ્યા છે, પણ તેમને ઈરાન સાથે ડીલ થવાની કોઈ ખાસ આશા નથી. ઈરાનની 'નૂર ન્યૂઝ એજન્સી' ના જણાવ્યા અનુસાર, ઈરાને પાકિસ્તાન મારફતે અમેરિકાને 14 મુદ્દાનો પ્રસ્તાવ મોકલ્યો છે (નોંધનીય છે કે પાકિસ્તાને આ બંને દેશો વચ્ચે પ્રથમ સીધી વાટાઘાટો કરાવી છે). આ પ્રસ્તાવમાં અમેરિકાની 9 મુદ્દાની યોજનાની સામે ઈરાને શરત રાખી છે કે અમેરિકા તેના પર લાગેલા તમામ પ્રતિબંધો હટાવે, નૌકાદળની નાકાબંધી પૂરી કરે, મધ્ય પૂર્વમાંથી પોતાના સૈનિકો પાછા ખેંચે અને લેબનોનમાં ઈઝરાયેલની લશ્કરી કાર્યવાહી તાત્કાલિક અટકાવે.

પરંતુ, ટ્રમ્પને આ શરતો જરાય સ્વીકાર્ય લાગતી નથી. સામે પક્ષે, ઈરાનની સેના (IRGC) એ પણ ઉગ્ર પ્રતિક્રિયા આપતા ચીમકી આપી છે કે હવે અમેરિકા પાસે નિર્ણય લેવા માટે બહુ ઓછો સમય અને વિકલ્પો બચ્યા છે.

રાજદ્વારી વાટાઘાટો અને ઓમાનની ભૂમિકા

આ તંગદિલી વચ્ચે રાજદ્વારી પ્રયાસો પણ ચાલુ છે. રવિવારે ઈરાનના વિદેશ મંત્રી અબ્બાસ અરાઘચીએ ઓમાનના વિદેશ મંત્રી બદર અલ-બુસૈદી સાથે ફોન પર વાતચીત કરી હતી. અગાઉ અમેરિકા અને ઈરાન વચ્ચેની વાટાઘાટોમાં ઓમાને જ નિરીક્ષક તરીકે કામ કર્યું હતું.

હોર્મુઝ સ્ટ્રેટ મુદ્દે ઈરાન નમતું જોખવા તૈયાર નથી

આ બધા વચ્ચે સૌથી મોટો સળગતો મુદ્દો 'હોર્મુઝ સ્ટ્રેટ' (Strait of Hormuz) નો છે. દુનિયાભરના તેલ અને ગેસના વેપારનો લગભગ 20% હિસ્સો આ જળમાર્ગ પરથી જ પસાર થાય છે. અમેરિકી રાષ્ટ્રપતિ ટ્રમ્પે આ માર્ગને ફરીથી ખોલવા માટે એક નવો પ્લાન રજૂ કર્યો છે. પરંતુ ઈરાન કોઈ કાળે પાછળ હટવા તૈયાર નથી.

ઈરાની સંસદના ડેપ્યુટી સ્પીકર અલી નિકઝાદે રવિવારે સ્પષ્ટ શબ્દોમાં કહી દીધું છે કે, "હોર્મુઝ સ્ટ્રેટ ઈરાનનું છે અને અમે અમારા વલણથી એક ઈંચ પણ પાછા નહીં હટીએ." તેમણે વધુમાં ઉમેર્યું કે યુદ્ધના કારણે થયેલા નુકસાનની ભરપાઈ કરવા દેશ કામ કરી રહ્યો છે, અને ટ્રમ્પની નાકાબંધીની યોજના 100 ટકા નિષ્ફળ જશે.

આ નિવેદનો પરથી સ્પષ્ટ થાય છે કે અમેરિકા અને ઈરાન વચ્ચેની ખાઈ હજુ પુરાઈ નથી અને દુનિયા પર ફરી એકવાર મોટા યુદ્ધનો ખતરો મંડરાઈ રહ્યો છે.