Donald Trump India tariffs: ભારત-રશિયા સંબંધોથી નારાજ ટ્રમ્પની ભારતને ખુલ્લી ધમકી: '24 કલાકમાં ભારે ટેરિફ લાદીશ'
ટ્રમ્પના મતે, ભારત રશિયા પાસેથી મોટી માત્રામાં તેલ ખરીદીને નફો કમાઈ રહ્યું છે, જ્યારે રશિયા યુક્રેનમાં યુદ્ધ ચાલુ રાખી રહ્યું છે.
Donald Trump India tariffs: અમેરિકન રાષ્ટ્રપતિ ડોનાલ્ડ ટ્રમ્પે ભારત પર આર્થિક પ્રતિબંધો લાદવાની મોટી જાહેરાત કરી છે, જેનું કારણ ભારત અને રશિયા વચ્ચેના વેપાર સંબંધો છે. એક મુલાકાત અને સોશિયલ મીડિયા પોસ્ટમાં ટ્રમ્પે ભારપૂર્વક કહ્યું છે કે, તે આગામી 24 કલાકમાં ભારત પર ભારે ટેરિફ લાદી શકે છે. ટ્રમ્પના મતે, ભારત રશિયા પાસેથી મોટી માત્રામાં તેલ ખરીદીને નફો કમાઈ રહ્યું છે, જ્યારે રશિયા યુક્રેનમાં યુદ્ધ ચાલુ રાખી રહ્યું છે. આ ધમકીના જવાબમાં ભારતે ટ્રમ્પના નિવેદનને "ગેરવાજબી" ગણાવ્યું છે, અને રશિયાએ પણ ભારતનું સમર્થન કર્યું છે.
ટ્રમ્પની ધમકી
ડોનાલ્ડ ટ્રમ્પે એક મુલાકાતમાં અને તેના સોશિયલ મીડિયા પ્લેટફોર્મ પર જણાવ્યું કે, "ભારત રશિયા પાસેથી માત્ર મોટા પ્રમાણમાં તેલ ખરીદી રહ્યું નથી, પરંતુ આ તેલનો મોટો ભાગ વેચીને નફો પણ કમાઈ રહ્યું છે." તેમણે વધુમાં ઉમેર્યું કે, "ભારતને યુક્રેનમાં કેટલા લોકો માર્યા જઈ રહ્યા છે તેની કોઈ પરવા નથી. તેથી, હું ભારત પર ટેરિફ વધારવા જઈ રહ્યો છું." ટ્રમ્પે તો ત્યાં સુધી કહ્યું કે તે આગામી 24 કલાકમાં આ પગલું ભરી શકે છે.
ભારતનો સણસણતો જવાબ
ટ્રમ્પની આ ધમકી પર ભારતે ત્વરિત અને આકરો જવાબ આપ્યો. ભારતના વિદેશ મંત્રાલયે આ નિવેદનને "ગેરવાજબી અને અતાર્કિક" ગણાવ્યું. મંત્રાલયે અમેરિકાના બેવડા વલણ પર સવાલ ઉઠાવતા કહ્યું કે, એક તરફ અમેરિકા ભારત-રશિયા વેપાર પર આંગળી ચીંધી રહ્યું છે, તો બીજી તરફ તે પોતે પણ રશિયા સાથે વેપાર ચાલુ રાખી રહ્યું છે. ગયા વર્ષે, અમેરિકાએ રશિયા પાસેથી યુરેનિયમ, પેલેડિયમ, ખાતરો અને રસાયણો સહિત લગભગ $3.5 બિલિયનનો વેપાર કર્યો હતો. મંત્રાલયે સ્પષ્ટ કર્યું કે ભારત તેના રાષ્ટ્રીય હિતો અને આર્થિક સુરક્ષાનું રક્ષણ કરવા માટે તમામ જરૂરી પગલાં લેશે.
રશિયાનું ભારતને સમર્થન
આ મામલે રશિયા પણ ભારતના બચાવમાં આવ્યું છે. રશિયન રાષ્ટ્રપતિ મહેલ ક્રેમલિનના પ્રવક્તા દિમિત્રી પેસ્કોવે ટ્રમ્પના નિવેદનને "ધમકી" ગણાવ્યું. તેમણે કહ્યું કે, "અમે આવા ઘણા નિવેદનો સાંભળીએ છીએ જે સ્પષ્ટપણે ધમકીઓ છે. આવી ધમકીઓ દેશોને રશિયા સાથેના વેપાર સંબંધો સમાપ્ત કરવા દબાણ કરવાનો પ્રયાસ છે." પેસ્કોવે ભારપૂર્વક કહ્યું કે દરેક સાર્વભૌમ દેશને પોતાના વેપાર ભાગીદારો અને આર્થિક સહયોગ માટે ભાગીદારો પસંદ કરવાનો અધિકાર છે.
ભારત-રશિયા વેપારની વર્તમાન સ્થિતિ
2022 માં રશિયા-યુક્રેન યુદ્ધ શરૂ થયા બાદ, ઘણા યુરોપિયન દેશોએ રશિયા સાથેનો વેપાર ઘટાડ્યો હતો. આ પછી, ભારતે રશિયા પાસેથી મોટા પ્રમાણમાં તેલ ખરીદવાનું શરૂ કર્યું અને થોડા જ સમયમાં રશિયા ભારતનું ટોચનું તેલ સપ્લાયર બની ગયું. ભારત હજુ પણ રશિયા પાસેથી મોટા પ્રમાણમાં તેલ ખરીદી રહ્યું છે અને આ જ કારણ ટ્રમ્પના આક્રોશનું મુખ્ય કારણ છે. જોકે, ભારતે સ્પષ્ટ કરી દીધું છે કે તે કોઈપણ દબાણમાં આવીને પોતાની વેપાર નીતિમાં ફેરફાર કરશે નહીં.
ટોપ સ્ટોરી
ટ્રેન્ડિંગ સમાચાર
