Gujarat Rain: મધ્ય અને દક્ષિણ ગુજરાતમાં ગાજવીજ સાથે ભારે વરસાદની આગાહી

રાજ્યના હવામાન વિભાગ દ્વારા મધ્ય અને દક્ષિણ ગુજરાતમાં ગાજવીજ સાથે ભારે વરસાદની આગાહી કરવામાં આવી છે.

પ્રતિકાત્મક તસવીર

અમદાવાદ: આજથી 2 સપ્ટેમ્બર સુધી રાજ્યમાં મધ્યમ વરસાદની હવામાન વિભાગે આગાહી વ્યક્ત કરી છે. હવામાન વિભાગની આગાહી મુજબ મધ્ય ગુજરાત અને દક્ષિણ ગુજરાતમાં ગાજવીજ સાથે ભારે વરસાદની આગાહી કરવામાં આવી છે.

31 ઓગસ્ટ સુધી ઠંડર સ્ટ્રોમ વોર્નિંગ પણ આપવામાં આવી છે. આજે રાજ્યના સાત જિલ્લા અને બે સંઘ પ્રદેશ દમણ અને દાદરાનગર હવેલીમાં વરસાદનું યલો એલર્ટ જાહેર કરવામાં આવ્યું છે.

આવતીકાલે મધ્ય ગુજરાતના મહીસાગર, દાહોદ, પંચમહાલ, વડોદરા અને છોટા ઉદેપુરમાં વરસાદનું યલો એલર્ટ જાહેર કરવામાં આવ્યું છે.

દક્ષિણ ગુજરાતના ભરૂચ, નર્મદા, તાપી, સુરત, નવસારી, ડાંગ અને વલસાડ જિલ્લાના છુટાછવાયા સ્થળો પર ગાજવીજ સાથે વરસાદ વરસી શકે છે. સંઘ પ્રદેશ દમણ અને દાદરાનગર હવેલીમાં પણ આવતીકાલ માટે હવામાન વિભાગે વરસાદનું યલો એલર્ટ જાહેર કર્યું છે.

ભારે વરસાદની શક્યતાને પગલે આગામી બે દિવસ દક્ષિણ ગુજરાતમાં માછીમારોને દરિયો ન ખેડવા સૂચના આપવામાં આવી છે. હવામાન વિભાગ મુજબ અત્યાર સુધીમાં રાજ્યમાં ચોમાસાની સિઝનનો સાડા 25 ઈંચથી વધુ વરસાદ વરસી ચૂકયો છે.

ગુજરાતમાં સીઝનનો સરેરાશ 77 ટકાથી વધુ વરસાદ વરસ્યો છે. જેમાં સૌથી વધુ દક્ષિણ ગુજરાત અને કચ્છમાં 80 ટકાથી વધુ વરસાદ વરસ્યો છે. જ્યારે સૌથી ઓછો વરસાદ મધ્ય ગુજરાતમાં 73 ટકા વરસાદ વરસ્યો છે.