Gujarat Rain: હવામાન વિભાગે રાજ્યના આ જિલ્લાઓમાં કરી વરસાદની આગાહી, જાણો ક્યાં વરસશે?

Gujarat Rain: હવામાન વિભાગે રાજ્યના આ જિલ્લાઓમાં કરી વરસાદની આગાહી, જાણો ક્યાં વરસશે?

પ્રતિકાત્મક તસવીર

અમદાવાદ: હવામાન વિભાગ મુજબ રાજ્યમાં ચોમાસાના સત્તાવાર આગમનને લઈને હાલ કોઈ અણસાર નથી દેખાઈ રહ્યા. હાલ ચોમાસું મહારાષ્ટ્રના દક્ષિણ વિસ્તારમાં સ્થિર થયું છે. આગામી ત્રણથી ચાર દિવસમાં ચોમાસું આગળ વધવાની હવામાન વિભાગે શક્યતા વ્યક્ત કરી છે.

બીજી તરફ 24 જૂન સુધી રાજ્યના અલગ-અલગ જિલ્લામાં વરસાદની હવામાન વિભાગે આગાહી કરી છે. હવામાન વિભાગે ખેડા, મહીસાગર, પંચમહાલ, દાહોદ, વડોદરા અને છોટા ઉદેપુર જિલ્લામાં ભારે વરસાદની આગાહી કરી છે. આજે કચ્છ સહિત સૌરાષ્ટ્રના ચાર જિલ્લાને બાદ કરતા અન્ય જિલ્લામાં સારા વરસાદનું હવામાન વિભાગનું પૂર્વાનુમાન છે.

હવામાન વિભાગે કાલે સૌરાષ્ટ્રના ગીર સોમનાથ, અમરેલી, ભાવનગરની સાથે ઉત્તર ગુજરાતના અરવલ્લી જિલ્લામાં હળવા વરસાદની આગાહી વ્યક્ત કરી છે. મધ્ય ગુજરાતના મહીસાગર, પંચમહાલ, દાહોદ, વડોદરા અને છોટા ઉદેપુર જિલ્લામાં પણ વરસાદ વરસી શકે છે.

આ તરફ દક્ષિણ ગુજરાતના નર્મદા, સુરત, તાપી, નવસારી, ડાંગ અને વલસાડની સાથે સંઘ પ્રદેશ દીવ, દમણ અને દાદરાનગર હવેલીમાં પણ વરસાદ વરસવાની હવામાન વિભાગે આગાહી વ્યક્ત કરી છે.

હવામાન વિભાગે કરેલી આગાહી મુજબ રાત્રે 10 વાગ્યા સુધીમાં અમરેલી, ભાવનગર, તાપી, નર્મદા, વડોદરા, છોટાઉદેપુર, આણંદ, ભરૂચ, પંચમહાલ, દાહોદ, મહીસાગર, ડાંગ, બોટાદ, અમદાવાદ, ખેડા, અરવલ્લી અને સાબરકાંઠામાં ગાજવીજ સાથે હળવાથી લઈ સામાન્ય વરસાદ વરસી શકે છે.