'બિપોરજોય' વાવાઝોડું ગંભીર સ્વરૂપ લઈ રહ્યું છે, શું આ વખતે ચોમાસું ખૂબ મોડું શરૂ થશે? જાણો વિગતે

Cyclone Biporjoy: આ વર્ષે અરબી સમુદ્રમાં પ્રથમ ચક્રવાતી વાવાઝોડું બિપોરજોય ઝડપથી ગંભીર ચક્રવાતી તોફાનમાં ફેરવાઈ ગયું છે. જેના કારણે કેરળમાં ચોમાસાની ધીમી શરૂઆત થવાની આગાહી છે.

'બિપોરજોય' વાવાઝોડું ગંભીર સ્વરૂપ લઈ રહ્યું છે

સમાચાર એજન્સી પીટીઆઈ અનુસાર, ભારતીય હવામાન વિભાગ (આઈએમડી) એ બુધવારે (07 જૂન) સવારે કહ્યું કે કેરળમાં બે દિવસમાં ચોમાસાની શરૂઆત માટે અનુકૂળ સ્થિતિ છે. જોકે, હવામાનશાસ્ત્રીઓનું કહેવું છે કે ચક્રવાતી તોફાન ચોમાસાની તીવ્રતાને અસર કરી રહ્યું છે અને કેરળ પર તેની શરૂઆત હળવી રહેશે.

હવામાન વિભાગના જણાવ્યા અનુસાર, તે ઉત્તર તરફ આગળ વધીને ખૂબ જ તીવ્ર ચક્રવાતી વાવાઝોડામાં પરિવર્તિત થવાની ધારણા છે. આ પછી, તે આગામી ત્રણ દિવસમાં ઉત્તર-ઉત્તર પશ્ચિમ તરફ આગળ વધશે. જોકે, IMDએ હજુ સુધી ભારત, ઓમાન, ઈરાન અને પાકિસ્તાન સહિત અરબી સમુદ્રને અડીને આવેલા દેશો પર કોઈ મોટી અસરની આગાહી કરી નથી.