હવે એક નહીં વર્ષમાં બે વખત રમાશે IPL મેચ! સૌરવ ગાંગુલી લઈ શકે છે મોટો નિર્ણય

આઈપીએલ ગવર્નિંગ કાઉન્સિલમાં આઈપીએલ ટીમોના આઈસીસીના એસોસિએટ દેશો સાથે મુકાબલાની વાત અંગે પણ ચર્ચા થઈ.

નવી દિલ્હીઃ ક્રિકેટનો રોમાંચ સમગ્ર વિશ્વમાં વધી રહ્યો છે. ટી20 આવ્યા બાદથી સમગ્ર વિશ્વમાં તમામ પ્રકારની લીગ શરૂ થઈ જેના કારણે  તેની લોકપ્રિયતા પણ ખૂબ વધી છે. જ્યારે આઈપીએલની વાત કરીએ તો તે સમગ્ર વિશ્વમાં સૌથી વધારે પસંદ કરવામાં આવતી ક્રિકેટ લીગ છે. તેને લઈને ફેન્સમાં દીવાનગમી સાતમા આસમાને રહેતી હોય છે પરંતુ હવે આ વર્ષે આ રોમાંચ બે ગણો થઈ શકે છે કારણ કે મિની આઈપીએલને લઈને પણ બીસીસીઆઈ વિચાર કરી રહ્યું છે. ઈન્ડિયન એક્સપ્રેસના અહેવાલ મુજબ, બીસીસીઆઈ ચેમ્પિયન્સ લીગ બંધ થયા બાદ ખાલી પડેલી જગ્યાને ભરવા અંગે વિચાર કરી રહી છે. બીસસીઆઈ ટૂંક સમયમાં જ મિની આઈપીએલ પર વિચાર કરી શકે છે. બેઠકમાં આઈપીએલના ચીફ ઓપરેટિંગ અધિકારી હેમાંગ અમીને ગવર્નિંગ કાઉન્સિલને જણાવ્યું હતું કે ચેમ્પિયન્સ લીગ સપ્ટેમ્બર અને ઑક્ટોબરમાં 15થી 20 દિવસ સુધી આયોજિત કરવામાં આવતી હતી. જે સપ્ટેમ્બર અને ઑક્ટોબરમાં યોજાતી હતી. એવામાં આ સમયે વધુ એક આઈપીએલ લાવવી જોઈએ જેથી બ્રાન્ડનું વિસ્તરણ થઈ શકે અને નાણાંકીય ફાયદો પણ થાય. આ મુદ્દે હવે બીસીસીઆઈની બેઠકમાં નિર્ણય લેવામાં આવશે. નોંધનીય છે કે ચેમ્પિયન્સ લીગને 5 વર્ષ પહેલા 2014 બાદ બંધ કરી દેવામાં આવી હતી. અહેવાલ મુજબ, આઈપીએલ ગવર્નિંગ કાઉન્સિલમાં આઈપીએલ ટીમોના આઈસીસીના એસોસિએટ દેશો સાથે મુકાબલાની વાત અંગે પણ ચર્ચા થઈ. બેઠકમાં પ્રસ્તાવ રજૂ કરવામાં આવ્યો કે જુલાઈ અને ઑગસ્ટમાં આઈપીએલ ટીમો એસોસિએટ દેશોમાં જઈને મેચ રમી શકે છે.