IPL 2022, Mega Auction: IPL મેગા ઓક્શન માટે PSL છોડી ભારત આવશે આ કોચ

કોચ એન્ડી ફ્લાવર ઇન્ડિયન પ્રિમિયર લીગના મેગા ઓક્શન માટે પાકિસ્તાન સુપર લીગના સત્રને અધવચ્ચે છોડીને ભારત આવશે

નવી દિલ્હીઃ લખનઉ સુપર જાયન્ટ્સના કોચ એન્ડી ફ્લાવર ઇન્ડિયન પ્રિમિયર લીગના મેગા ઓક્શન માટે પાકિસ્તાન સુપર લીગના સત્રને અધવચ્ચે છોડીને ભારત આવશે. હાલમાં તેઓ મુલતાનના સુલતાન્સ ટીમ સાથે જોડાયેલા છે. આઇપીએલના મેગા ઓક્શન 12-13 ફેબ્યુઆરીના રોજ બેંગલુરુમાં યોજાશે. મુલતાન સુલતાન્સની સાથે વ્યસ્ત કોચ એન્ડી ફ્લાવર લખનઉની ટીમની મદદ માટે મેગા ઓક્શનમાં સામેલ થશે.

થોડા સમય અગાઉ જ લખનઉની ટીમે એન્ડી ફ્લાવરને પોતાની ટીમના કોચ તરીકે નિયુક્ત કર્યા હતા. એન્ડી આ અગાઉ 2020 અને 2021ની સીઝનમાં પંજાબ કિંગ્સના કોચ તરીકે કામ કરી ચૂક્યા છે. આઇપીએલની આ સીઝનમાં પણ ફ્લાવર અને કેએલ રાહુલની કેપ્ટન અને કોચ તરીકેની જોડી જોવા મળશે. આ અગાઉ આ બંન્ને પંજાબ કિગ્સ સાથે જોડાયા હતા.

મુલતાન સુલતાન્સ તરફથી જાહેર કરાયેલા નિવેદનમાં કહેવામાં આવ્યું છે કે એન્ડી વર્ચ્યુઅલ માધ્યમથી ટીમ સાથે જોડાયેલા રહેશે. 13 ફેબ્રુઆરી બાદ તે ટીમ સાથે ફરી જોડાઇ જશે. મુલતાન સુલતાન્સે પાકિસ્તાન સુપર લીગની આ સીઝનમાં શાનદાર દેખાવ કર્યો છે. મુલતાને ચાર મેચમાં ચાર જીત અને આઠ પોઇન્ટ્સ સાથે લીગમાં પ્રથમ નંબર પર છે.

મેગા ઓક્શન અગાઉ લખનઉએ પોતાની ટીમમાં કેએલ રાહુલ, માર્ક્સ સ્ટોઇનિસ અને રવિ બિશ્નોઇને સામેલ કર્યા છે.