કોરોના વાયરસ ફેલાવવાનો ખતરો, ટળી શકે છે IPL: મંત્રી

તેમણે કહ્યું કે, જ્યારે મોટી સંખ્યામાં લોકો એકઠા થાય છે ત્યારે બીમારીઓ ફેલાવવાનો ખતરો વધી જાય છે.

મુંબઇઃ મહારાષ્ટ્રના સ્વાસ્થ્યમંત્રી રાજેશ ટોપેએ શનિવારે કહ્યુ કે, દેશભરમાં કોરોના વાયરસના વધતા ખતરાને ધ્યાનમાં રાખી ઇન્ડિયન પ્રિમિયર લીગનું આયોજન બાદમાં કરાવી શકાય છે. તેમણે કહ્યું કે, જ્યારે મોટી સંખ્યામાં લોકો એકઠા થાય છે ત્યારે બીમારીઓ ફેલાવવાનો ખતરો વધી જાય છે. એવામાં આઇપીએલ જેવા આયોજનો માટે આ યોગ્ય સમય નથી. તેને બાદમાં પણ આયોજીત કરી શકાય છે. ટોપેએ કહ્યુ કે, આઇપીએલને સ્થગિત કરવા માટે સતાવાર રીતે વાતચીત ચાલી રહી છે અનેટૂંક સમયમાં તેની જાહેરાત કરવામાં આવશે. મહારાષ્ટ્રના મંત્રીનું આ નિવેદન એવા સમયમાં આવ્યું છે જ્યારે આઇપીએલ શરૂ થવામાં એક મહિનાથી પણ ઓછો સમય રહી ગયો છે. તેનું આયોજન 29 માર્ચના રોજ થશે અને પ્રથમ મેચ વાનખેડે સ્ટેડિયમમાં મુંબઇ ઇન્ડિયન્સ અને ચેન્નઇ સુપરકિંગ્સ વચ્ચે રમાશે. થોડા દિવસ અગાઉ જ બીસીસીઆઇના અધ્યક્ષ સૌરવ ગાંગુલીએ કહ્યું હતું કે આઇપીએલનું આયોજન નક્કી તારીખ પર થશે. કોરોના વાયરસથી બચવા માટે તમામ સંભવ પગલા ભરવામાં આવશે. ગાંગુલીએ કહ્યુ કે, આઇપીએલ ઓન છે અને બોર્ડ ટુનામેન્ટને આયોજીત કરવા માટે તમામ પગલા ભરી રહ્યું છે. નોંધનીય છે કે ભારતમાં અત્યાર સુધીમાં કોરોના વાયરસના 34 પોઝીટિવ કેસ સામે આવ્યા છે.