ICC Annual Meeting: શું હવે 40 ઓવરની રમાશે વનડે ક્રિકેટ મેચો? આઈસીસી બેઠકમાં લેવાયા 4 મોટા નિર્ણય

ICC Annual Meeting Updates: સ્કોટલેન્ડમાં યોજાયેલી વાર્ષિક બેઠકમાં વનડે ફોર્મેટ અને WTC અંગે લેવાયા મહત્વના નિર્ણયો, મોરેશિયસ બન્યો ICC નો 111મો સભ્ય દેશ.

ICC Annual Meeting Updates ODI Overs World Test Championship Decisions

Source : सोशल मीडिया

Show Quick Read

Key points generated by AI, verified by newsroom

• ICC બેઠકમાં વનડે ઓવર ઘટાડવાનો પ્રસ્તાવ અમાન્ય રહ્યો.
• વર્લ્ડ ટેસ્ટ ચેમ્પિયનશિપમાં ટીમોની સંખ્યા 9 યથાવત રહેશે.
• યુએસએ અને કેનેડા ક્રિકેટ બોર્ડ પરનો પ્રતિબંધ યથાવત.
• મોરેશિયસ ICC નો 111મો એસોસિયેટ સભ્ય દેશ બન્યો.

ICC Annual Meeting Updates: સ્કોટલેન્ડની રાજધાની એડિનબર્ગ ખાતે 8 થી 11 જુલાઈ દરમિયાન ઇન્ટરનેશનલ ક્રિકેટ કાઉન્સિલ (ICC) ની ચાર દિવસીય વાર્ષિક બેઠક યોજાઈ હતી. આ બેઠકમાં વનડે મેચની ઓવર ઘટાડવાથી લઈને વર્લ્ડ ટેસ્ટ ચેમ્પિયનશિપ (WTC) માં નવી ટીમો ઉમેરવા સુધીના અનેક મહત્વપૂર્ણ મુદ્દાઓ પર ગંભીર ચર્ચા કરવામાં આવી હતી. ક્રિકેટ ચાહકો માટે આ બેઠકમાંથી 4 મોટા અને મહત્વના અપડેટ્સ સામે આવ્યા છે. ચાલો સરળ શબ્દોમાં જાણીએ કે ICC દ્વારા કયા મોટા નિર્ણયો લેવામાં આવ્યા છે.

1. વનડે ક્રિકેટ 50 ઓવરનું જ રહેશે

તાજેતરમાં એવા અહેવાલો વહેતા થયા હતા કે વનડે ક્રિકેટને વધુ રોમાંચક બનાવવા માટે તેને 50 ને બદલે 40 ઓવરનું કરવામાં આવી શકે છે. ઉલ્લેખનીય છે કે, 1987 ના વર્લ્ડ કપ પહેલા વનડે મેચ 60 ઓવરની રમાતી હતી. જોકે, 39 વર્ષ બાદ ફરી એકવાર ઓવર ઘટાડવાનો પ્રસ્તાવ મુકાયો હતો, પરંતુ આ મુદ્દે સભ્ય દેશો વચ્ચે કોઈ સહમતિ સાધી શકાઈ ન હતી. એટલે કે, હાલ પૂરતું વનડે ફોર્મેટ 50 ઓવરનું જ રહેશે અને તેમાં કોઈ કાપ મૂકવામાં આવશે નહીં.

2. વર્લ્ડ ટેસ્ટ ચેમ્પિયનશિપ (WTC) માં ટીમોની સંખ્યા નહીં વધે

હાલમાં વર્લ્ડ ટેસ્ટ ચેમ્પિયનશિપમાં ભારત, ઓસ્ટ્રેલિયા, ન્યુઝીલેન્ડ, સાઉથ આફ્રિકા, પાકિસ્તાન, બાંગ્લાદેશ, વેસ્ટ ઈન્ડિઝ, શ્રીલંકા અને ઈંગ્લેન્ડ એમ કુલ 9 ટીમો ભાગ લે છે. આ બેઠકમાં અફઘાનિસ્તાન, ઝિમ્બાબ્વે અને આયર્લેન્ડનો સમાવેશ કરીને ટીમોની સંખ્યા 12 કરવા અંગે વિસ્તૃત ચર્ચા થઈ હતી. પરંતુ આ પ્રસ્તાવ પર પણ કોઈ સકારાત્મક નિષ્કર્ષ આવી શક્યો નથી. જેથી આગામી સમયમાં પણ WTC માં ટીમોની સંખ્યા 9 જ યથાવત રહેશે.

આ પણ વાંચોઃ ચેતેશ્વર પૂજારાએ જણાવ્યું ઈંગ્લેન્ડમાં ટીમ ઈન્ડિયાની શરમજનક હારના 3 મુખ્ય કારણો

3. યુએસએ અને કેનેડા ક્રિકેટ બોર્ડને હાલ કોઈ રાહત નહીં

ICC દ્વારા અગાઉ યુએસએ (USA) ક્રિકેટ બોર્ડને કેટલાક કારણોસર સસ્પેન્ડ કરવામાં આવ્યું હતું. કાઉન્સિલે એ વાત સ્વીકારી છે કે 2028 ના લોસ એન્જલસ ઓલિમ્પિકને ધ્યાનમાં રાખીને અમેરિકન બોર્ડ પરથી આ સસ્પેન્શન હટાવવું ખૂબ જ જરૂરી છે, છતાં હાલ પૂરતો આ પ્રતિબંધ યથાવત રાખવામાં આવ્યો છે. આ ઉપરાંત, આ વર્ષે જૂન મહિનામાં સસ્પેન્ડ થયેલા કેનેડા ક્રિકેટ બોર્ડને પણ હાલ કોઈ રાહત આપવામાં આવી નથી. તેમનું સસ્પેન્શન પણ ચાલુ જ રહેશે.

4. મોરેશિયસ બન્યો ICC નો 111મો સભ્ય દેશ

વિશ્વભરમાં ક્રિકેટની વધતી જતી લોકપ્રિયતા વચ્ચે એક સારા સમાચાર એ છે કે મોરેશિયસને ICC નું 'એસોસિયેટ સભ્યપદ' આપવામાં આવ્યું છે. આ ઐતિહાસિક નિર્ણય સાથે જ મોરેશિયસ આંતરરાષ્ટ્રીય ક્રિકેટ કાઉન્સિલનો સત્તાવાર દરજ્જો મેળવનાર વિશ્વનો 111મો દેશ બની ગયો છે.

આ પણ વાંચોઃ ઈંગ્લેન્ડ સામેની ODI સિરીઝ પહેલા ટીમ ઈન્ડિયાને મોટો ઝટકો: આ સ્ટાર ખેલાડી થયો બહાર