Women's World Cup: વર્લ્ડકપ જીત બાદ મહિલા ક્રિકેટર્સની બ્રાન્ડ વેલ્યૂમાં વધારો, કંપનીઓની લાગી લાઈન
Women's World Cup: ભારતીય મહિલા ક્રિકેટ ટીમના ઐતિહાસિક વર્લ્ડ કપ વિજયથી દેશને માત્ર ગૌરવ જ નહીં, પણ ખેલાડીઓની બ્રાન્ડ વેલ્યુ પણ વધી ગઈ છે
Women's World Cup: ભારતીય મહિલા ક્રિકેટ ટીમના ઐતિહાસિક વર્લ્ડ કપ વિજયથી દેશને માત્ર ગૌરવ જ નહીં, પણ ખેલાડીઓની બ્રાન્ડ વેલ્યુ પણ વધી ગઈ છે. નવી મુંબઈના ડીવાય પાટિલ સ્ટેડિયમમાં દક્ષિણ આફ્રિકાને 52 રનથી હરાવીને ટીમ ઈન્ડિયાએ પોતાનો પહેલો મહિલા વર્લ્ડ કપ જીત્યો હતો. આ વિજય બાદ ખેલાડીઓને એન્ડોર્સમેન્ટ અને બ્રાન્ડ ડીલ્સ મળી રહી છે. મોટી કંપનીઓ હવે તેમની સાથે જોડાવા માંગે છે અને તેમના સોશિયલ મીડિયા ફેન ફોલોઇંગમાં બમણી અને ત્રણ ગણી વૃદ્ધિ થઈ છે.
બ્રાન્ડ વેલ્યુમાં 100 ટકાનો વધારો
ઈકોનોમિક ટાઈમ્સના અહેવાલ મુજબ, ભારતીય મહિલા ક્રિકેટરોની બ્રાન્ડ વેલ્યુ 25 ટકાથી 30 ટકા વધી છે. ટીમની સ્ટાર ખેલાડીઓ જેમિમા રોડ્રિગ્સ, સ્મૃતિ મંધાના, હરમનપ્રીત કૌર, દીપ્તિ શર્મા અને શેફાલી વર્માને સતત નવી બ્રાન્ડ ઓફર મળી રહી છે.
બેઝલાઇન વેન્ચર્સના મેનેજિંગ ડિરેક્ટર તુહિન મિશ્રાએ જણાવ્યું હતું કે, "વર્લ્ડ કપ ફાઇનલ પછીથી અમને બ્રાન્ડ્સ તરફથી કોલ મળી રહ્યા છે. ઘણી કંપનીઓ વધેલી ફી પર હાલના કોન્ટ્રાક્ટ રિન્યૂ કરવા પણ વિચારી રહી છે. સરેરાશ ફી વધારો 25-30 ટકા રહ્યો છે."
જેમિમા રોડ્રિગ્સ બ્રાન્ડ્સની નવી ફેવરિટ બની
સેમિફાઇનલમાં ઓસ્ટ્રેલિયા સામે 125 રનની શાનદાર ઇનિંગ રમનાર જેમિમા રોડ્રિગ્સ હવે કંપનીઓ માટે ટોચની પસંદગી બની ગઈ છે. એવું નોંધાયું છે કે તેમની બ્રાન્ડ વેલ્યુમાં 100 ટકાનો વધારો થયો છે. JSW સ્પોર્ટ્સના ચીફ કોમર્શિયલ ઓફિસર કરણ યાદવે જણાવ્યું હતું કે, "ઓસ્ટ્રેલિયા સામેની મેચ પૂરી થતાંની સાથે જ અમને 10 થી વધુ કેટેગરીઓમાં બ્રાન્ડ્સ તરફથી ઓફર મળી હતી. અમે હવે દરેક ઓફર પર કાળજીપૂર્વક વિચાર કરી રહ્યા છીએ." જેમિમા હવે એન્ડોર્સમેન્ટ માટે 75 લાખથી 1.5 કરોડ રૂપિયા સુધી ચાર્જ કરી રહી છે, જે તેની લોકપ્રિયતાનો સ્પષ્ટ પુરાવો છે.
સ્મૃતિ મંધાના સૌથી વધુ કમાણી કરનારી મહિલા ક્રિકેટર છે
ભારતીય મહિલા ટીમની વાઇસ-કેપ્ટન સ્મૃતિ મંધાના પહેલેથી જ દેશની સૌથી વધુ કમાણી કરનારી મહિલા ક્રિકેટર છે. તે Nike, Hyundai, Herbalife, SBI, Gulf Oil અને PNB MetLife Insurance જેવી મોટી કંપનીઓ માટે જાહેરાતો આપે છે. તેના બ્રાન્ડ ડીલ્સ સામાન્ય રીતે 1.5 થી 2 કરોડ રૂપિયાની વચ્ચે હોય છે.
બ્રાન્ડમાં રસ વધતો જાય છે
હિન્દુસ્તાન યુનિલિવર, પેપ્સી, પુમા, સ્વિગી ઇન્સ્ટામાર્ટ અને સર્ફ એક્સેલ જેવી કંપનીઓએ ભારતની જીતની ઉજવણી કરવા માટે તરત જ સોશિયલ મીડિયા કેમ્પેઈન લોન્ચ કર્યા હતા. એચયુએલના એમડી પ્રિયા નાયરે કહ્યું, "આ જીત દરેક ભારતીય મહિલાની છે જે મેદાનમાં ઉતરે છે, બહાદુરીથી રમે છે અને છાપ છોડી દે છે." Surf Excel એ તેના "દાગ અચ્છે હૈં" ઝૂંબેશ સાથે મહિલા ક્રિકેટરોને સલામ કરી હતી. સ્વિગી ઇન્સ્ટામાર્ટ અને પેપ્સીએ પણ સોશિયલ મીડિયા પર હૃદયસ્પર્શી પોસ્ટ સાથે ટીમ ઇન્ડિયાની જીતની ઉજવણી કરી હતી.
મહિલા ક્રિકેટને સન્માન મળ્યું
વર્લ્ડ કપ વિજય પછી ભારતીય મહિલા ખેલાડીઓની લોકપ્રિયતા અને માર્કેટ વેલ્યૂમાં વધારો મહિલા ક્રિકેટ માટે એક નવા યુગની શરૂઆત કરી શકે છે. આ ગતિ કેટલો સમય ટકી રહે છે તે જોવું રસપ્રદ રહેશે.
ટોપ સ્ટોરી
ટ્રેન્ડિંગ સમાચાર
