IPL 2025: લખનૌ સુપર જાયન્ટ્સના કેપ્ટનના નામની જાહેરાત, 27 કરોડનો ખેલાડી સંભાળશે કમાન
ગોએન્કાએ કહ્યું હતું કે, "હાલમાં લોકો IPLના સૌથી સફળ કેપ્ટનોની યાદીમાં 'ધોની અને રોહિત'નું નામ લે છે, પરંતુ મારા શબ્દોને યાદ રાખજો, 10-12 વર્ષ પછી તે યાદીમાં 'માહી, રોહિત અને ઋષભ પંત'નું નામ હશે."
LSG captain Rishabh Pant: લખનૌ સુપર જાયન્ટ્સે ઈન્ડિયન પ્રીમિયર લીગ (IPL)ની 2025ની સીઝન માટે તેમના નવા કેપ્ટનની જાહેરાત કરી દીધી છે. લખનૌ સુપર જાયન્ટ્સના માલિક સંજીવ ગોએન્કાએ પુષ્ટિ કરી છે કે વિકેટકીપર બેટ્સમેન ઋષભ પંત IPL 2025માં ટીમનું નેતૃત્વ કરશે. ગત સિઝન સુધી કેએલ રાહુલ લખનૌના કેપ્ટન હતા, પરંતુ IPL 2025ની હરાજી પહેલા તેમને રિલીઝ કરવામાં આવ્યા હતા.
IPL 2025ની મેગા ઓક્શનમાં લખનૌ સુપર જાયન્ટ્સે ઋષભ પંત માટે ઐતિહાસિક બોલી લગાવી હતી. લખનૌએ આ વિસ્ફોટક વિકેટકીપર બેટ્સમેનને 27 કરોડ રૂપિયામાં ખરીદ્યો હતો. આ સાથે પંત IPLના ઇતિહાસનો સૌથી મોંઘો ખેલાડી બન્યો હતો અને હવે તે IPLના ઇતિહાસનો સૌથી મોંઘો કેપ્ટન પણ બની ગયો છે.
સંજીવ ગોએન્કાએ ઋષભ પંત સાથે પ્રેસ કોન્ફરન્સ કરી હતી, જેમાં તેમણે આ જાહેરાત કરી હતી. ગોએન્કાએ દાવો કર્યો હતો કે ઋષભ પંત IPLના ઇતિહાસમાં સૌથી મહાન કેપ્ટન બનશે. તમને જણાવી દઈએ કે ઋષભ પંત પહેલા દિલ્હી કેપિટલ્સનો કેપ્ટન હતો. ગોએન્કાએ કહ્યું હતું કે, "હાલમાં લોકો IPLના સૌથી સફળ કેપ્ટનોની યાદીમાં 'માહી (MS ધોની) અને રોહિત'નું નામ લે છે, પરંતુ મારા શબ્દોને યાદ રાખજો, 10-12 વર્ષ પછી તે યાદીમાં 'માહી, રોહિત અને ઋષભ પંત'નું નામ હશે."
ઋષભ પંતે ગત સિઝનમાં દિલ્હી કેપિટલ્સ (DC)ની કેપ્ટનશીપ કરી હતી. તેમને દિલ્હીની ટીમે જાળવી રાખ્યો નહોતો, જેના કારણે તેમણે 2016 પછી પ્રથમ વખત હરાજીમાં પ્રવેશ કર્યો હતો. દિલ્હીની ટીમે પંત માટે રાઈટ ટુ મેચ (RTM) કાર્ડનો ઉપયોગ કર્યો હતો, પરંતુ અંતે લખનૌની ટીમે પંતને 27 કરોડમાં ખરીદ્યો હતો. ઋષભ પંતે 43 મેચમાં દિલ્હી કેપિટલ્સનું નેતૃત્વ કર્યું હતું, જેમાં ટીમે 23 મેચ જીતી હતી અને 19 મેચમાં હારનો સામનો કરવો પડ્યો હતો, જ્યારે એક મેચ ટાઈ રહી હતી.
IPL 2025 માટે અત્યાર સુધી સાત ટીમોના કેપ્ટન નક્કી કરવામાં આવ્યા છે. લખનૌ સુપર જાયન્ટ્સના કેપ્ટન ઋષભ પંત, ચેન્નાઈ સુપર કિંગ્સના કેપ્ટન રુતુરાજ ગાયકવાડ, ગુજરાત ટાઈટન્સના કેપ્ટન શુભમન ગિલ, રાજસ્થાન રોયલ્સના કેપ્ટન સંજુ સેમસન, મુંબઈ ઈન્ડિયન્સના કેપ્ટન હાર્દિક પંડ્યા, પંજાબ કિંગ્સના કેપ્ટન શ્રેયસ અય્યર અને સનરાઈઝર્સ હૈદરાબાદના કેપ્ટન પેટ કમિન્સ છે. હવે આરસીબી, કેકેઆર અને દિલ્હી કેપિટલ્સના કેપ્ટનની જાહેરાત થવાની બાકી છે.
આ પણ વાંચો....
ટ્રેન્ડિંગ સમાચાર
ટોપ સ્ટોરી
