ચેમ્પિયન્સ ટ્રોફીનું આયોજન કરીને પાકિસ્તાનને ન થયો કોઈ ફાયદો, અહીં જાણો આખું ગણિત

ન્યૂઝીલેન્ડ અને ભારત વચ્ચે રમાયેલી ફાઈનલમાં ભારતની જીતથી પાકિસ્તાનની મુશ્કેલીઓમાં વધુ વધારો થયો છે.

ચેમ્પિયન્સ ટ્રોફી 2025નું આયોજન પાકિસ્તાનમાં થવાનું હતું, પરંતુ ભારતે સુરક્ષા કારણોસર ત્યાં મેચ રમવાનો ઇનકાર કર્યો હતો. જેના પરિણામે તમામ મેચ દુબઈમાં ખસેડવામાં આવી અને પાકિસ્તાનને આ નિર્ણયના કારણે મોટું આર્થિક નુકસાન સહન કરવું પડ્યું છે.

ચેમ્પિયન્સ ટ્રોફી 2025 માટે પાકિસ્તાને યજમાની મેળવવા માટે પાણીની જેમ પૈસા ખર્ચ્યા હતા. 29 વર્ષ બાદ પાકિસ્તાનને આઈસીસી ટૂર્નામેન્ટની યજમાની મળી હતી, જે એક મોટી તક હતી. જો કે, ટૂર્નામેન્ટની શરૂઆત પહેલાં જ ભારતે પાકિસ્તાનમાં રમવાનો સ્પષ્ટ ઇનકાર કરી દેતા પાકિસ્તાનની યોજનાઓ પર પાણી ફરી વળ્યું હતું.

ભારતીય ક્રિકેટ ટીમ અને તેના ચાહકોની લોકપ્રિયતા વિશ્વભરમાં છે. જ્યારે ભારત જેવી ટીમ પાકિસ્તાનમાં રમતી હોત, તો સ્ટેડિયમમાં ટિકિટોનું ધૂમ વેચાણ થાત અને પાકિસ્તાનને મોટી આવક થાત. આ આવક દેશની અર્થવ્યવસ્થાને પણ મજબૂત કરવામાં મદદરૂપ થાત.

પાકિસ્તાને મોટી આશા સાથે ટૂર્નામેન્ટનું આયોજન કર્યું હતું, પરંતુ ભારતના રમવાનો ઇનકાર અને મેચો દુબઈમાં ખસેડવાના કારણે પાકિસ્તાનની આર્થિક ગણતરીઓ ખોરવાઈ ગઈ હતી.

વધુમાં, પાકિસ્તાની ટીમનું ટૂર્નામેન્ટમાં નબળું પ્રદર્શન પણ નુકસાનકારક સાબિત થયું. પાકિસ્તાન ટીમ લીગ મેચોમાં જ હારીને ટૂર્નામેન્ટમાંથી બહાર થઈ ગઈ, જેના કારણે દર્શકોનો ઉત્સાહ ઓસરી ગયો અને ટિકિટોનું વેચાણ ઘટ્યું. આ બધી બાબતોને લીધે પાકિસ્તાનને આર્થિક રીતે મોટું નુકસાન થયું.

પાકિસ્તાનમાં છેલ્લી વખત આઈસીસી ટૂર્નામેન્ટનું આયોજન 1996 માં થયું હતું. ત્યાર બાદ આ પ્રથમ વખત હતી કે પાકિસ્તાનને આટલી મોટી વૈશ્વિક ઇવેન્ટની યજમાની મળી હતી. આ માટે પાકિસ્તાને રાવલપિંડી, કરાચી અને લાહોરના સ્ટેડિયમને આંતરરાષ્ટ્રીય ધોરણો મુજબ અપગ્રેડ કર્યા હતા અને સુરક્ષા વ્યવસ્થા પણ મજબૂત બનાવી હતી. આ સમગ્ર તૈયારી માટે પાકિસ્તાને અંદાજે 64 મિલિયન ડોલર એટલે કે લગભગ 558 કરોડ રૂપિયાનો ખર્ચ કર્યો હતો.

જો કે, ટિકિટના વેચાણથી ધાર્યા મુજબની આવક ન થતા અને અન્ય સ્ત્રોતોમાંથી પણ આવક ઓછી રહેતા, પાકિસ્તાનને આઈસીસી તરફથી યજમાની ફી તરીકે મળનારા 52 કરોડ રૂપિયા એટલે કે 6 મિલિયન ડોલરથી સંતોષ માનવો પડ્યો. ગણતરી મુજબ, પાકિસ્તાનને આ ટૂર્નામેન્ટના આયોજનમાં અંદાજે 195 કરોડ રૂપિયાનું નુકસાન થયું છે. વિદેશી દર્શકોની પાંખી હાજરી અને ટિકિટ વેચાણમાં નિષ્ફળતા આ નુકસાનના મુખ્ય કારણો રહ્યા હતા.