ઇશાન કિશનની આક્રમક બેવડી સદીથી બિહારમાં ઉજવણી, જાણો કેટલી સંપત્તિનો માલિક છે ઇશાન કિશન?

ભારતીય ક્રિકેટ ટીમના ઓપનર ઇશાન કિશને બાંગ્લાદેશ સામેની ત્રીજી વન-ડે મેચમાં આક્રમક બેવડી સદી ફટકારી તરખાટ મચાવી દીધો છે

ફોટોઃ ટ્વિટર

ભારતીય ક્રિકેટ ટીમના ઓપનર ઇશાન કિશને બાંગ્લાદેશ સામેની ત્રીજી વન-ડે મેચમાં આક્રમક બેવડી સદી ફટકારી તરખાટ મચાવી દીધો છે. બેવડી સદીમાં ઇશાન કિશને 24 ચોગ્ગા અને 10 છગ્ગા ફટકાર્યા હતા. ઇશાન કિશને માત્ર 126 બોલમાં બેવડી સદી ફટકારી હતી. ઈશાને 131 બોલમાં 210 રન બનાવ્યા હતા.

ઈશાન પાસે ઘણી ક્ષમતાઓ છે પરંતુ તે પ્રથમ વખત આંતરરાષ્ટ્રીય મંચ પર છવાયો હતો. ઈશાને ઈન્ડિયન પ્રીમિયર લીગમાં ધમાલ મચાવી દીધી છે. તે મુંબઈ ઈન્ડિયન્સ સાથે રમે છે અને આઈપીએલમાં સૌથી મોંઘા ખેલાડીઓમાંથી એક છે. ઈશાન કિશન કરોડોની સંપત્તિનો માલિક છે.  તેની પાસે લક્ઝરી કારનું કલેક્શન છે.

મૂળ બિહારના ઔરંગાબાદ જિલ્લાનો છે. ઈશાન ખૂબ જ નાની ઉંમરમાં કરોડપતિ બની ગયો હતો. ઈશાનની બેવડી સદી પર તેના વતન ગામમાં પણ ઉજવણીનો માહોલ જોવા મળ્યો હતો. મીડિયા રિપોર્ટ્સ અનુસાર, 2022માં તેમની કુલ સંપત્તિ 45 કરોડ રૂપિયા છે. ઈશાન વિકેટકીપર-બેટ્સમેન છે. તેમની આવકનો સ્ત્રોત ક્રિકેટમાંથી મેચ ફી, લીગ ક્રિકેટ કોન્ટ્રાક્ટ અને બ્રાન્ડ એન્ડોર્સમેન્ટ છે. ઈશાન કિશનની બ્રાન્ડ વેલ્યુ ઘણી વધારે છે. તેઓ બ્રાન્ડ એન્ડોર્સમેન્ટ માટે મોટી રકમ પણ લે છે.

ઈશાન કિશનની વાર્ષિક આવક લગભગ સાત કરોડ રૂપિયા હોવાનું કહેવાય છે. IPL 2022માં મુંબઈ ઈન્ડિયન્સે ઈશાન કિશનને 15.25 કરોડ રૂપિયામાં ખરીદ્યો હતો. 2018 માં મુંબઈએ કિશનને 6.20 કરોડ રૂપિયામાં ખરીદ્યો હતો. મુંબઈ ઈન્ડિયન્સ ઉપરાંત તે IPLમાં ગુજરાત લાયન્સ તરફથી પણ રમી ચૂક્યો છે. તે ઘરેલુ ટુર્નામેન્ટ રણજી ટ્રોફીમાં ઝારખંડ માટે રમે છે. 6 નવેમ્બર 2016ના રોજ ઈશાને 2016-17 રણજી ટ્રોફીમાં દિલ્હી સામે 273 રનની ઇનિંગ રમી હતી. ઝારખંડ તરફથી રણજી ટ્રોફીમાં કોઈ ખેલાડીનો આ અત્યાર સુધીનો સૌથી વધુ સ્કોર છે.

રિપોર્ટ્સ અનુસાર, ઈશાન કિશન પાસે કરોડોની કિંમતની કાર છે. તેની પાસે BMW 5 સિરીઝ છે, જેની કિંમત લગભગ 72 લાખ રૂપિયા છે. આ સિવાય તેની પાસે 92 લાખ રૂપિયાની ફોર્ડ મસ્ટંગ અને 1.05 કરોડ રૂપિયાની મર્સિડીઝ બેન્ઝ સી-ક્લાસ પણ છે.

પિતા બિલ્ડર છે

આ સિવાય ઈશાને રિયલ એસ્ટેટ પ્રોપર્ટીમાં પણ રોકાણ કર્યું છે. ઈશાનના પિતા પ્રણવ કુમાર પાંડે વ્યવસાયે બિલ્ડર છે અને તેની માતા સુચિત્રા પાંડે ગૃહિણી છે. વિસ્ફોટક બેવડી સદીની ઈનિંગ બાદ ઈશાન કિશનની બ્રાન્ડ વેલ્યુ વધી શકે છે. ઈશાન કિશને તેની 10મી વનડેમાં બેવડી સદી ફટકારીને ધૂમ મચાવી દીધી છે.