જો રૂટે ઇતિહાસ રચ્યો: સચિન તેંડુલકર અને સનથ જયસૂર્યાના મોટા રેકોર્ડ તોડી નાખ્યા
ઇંગ્લેન્ડની ધરતી પર ભારત સામે ટેસ્ટમાં સૌથી વધુ રન બનાવનાર, આંતરરાષ્ટ્રીય ક્રિકેટમાં 9મા સ્થાને પહોંચ્યો.
Joe Root: ઇંગ્લેન્ડના સ્ટાર બેટ્સમેન જો રૂટે ભારત સામે લીડ્સ ખાતે રમાઈ રહેલી પાંચ મેચની ટેસ્ટ શ્રેણીની પ્રથમ મેચના બીજા દિવસે બે મોટા રેકોર્ડ પોતાના નામે કર્યા છે. માત્ર 2 રન બનાવતાની સાથે જ તેણે ભારતીય દિગ્ગજ સચિન તેંડુલકરનો ઇંગ્લેન્ડની ધરતી પર ભારત વિરુદ્ધ ટેસ્ટમાં સૌથી વધુ રન બનાવવાનો રેકોર્ડ તોડ્યો, અને થોડા સમય પછી, 8 રન બનાવતાની સાથે જ તેણે આંતરરાષ્ટ્રીય ક્રિકેટમાં સૌથી વધુ રન બનાવનાર શ્રીલંકાના સનથ જયસૂર્યાને પણ પાછળ છોડી દીધો.
સચિન તેંડુલકરનો રેકોર્ડ તોડ્યો
ભારતે પ્રથમ ઇનિંગમાં યશસ્વી જયસ્વાલ, શુભમન ગિલ અને ઋષભ પંતની સદીઓની મદદથી 471 રનનો વિશાળ સ્કોર બનાવ્યો હતો. તેના જવાબમાં, ઇંગ્લેન્ડની ઇનિંગ્સની શરૂઆત ખરાબ રહી હતી. ઓપનર જેક ક્રોલી માત્ર 4 રન બનાવીને જસપ્રીત બુમરાહનો શિકાર બન્યો હતો. જોકે, બેન ડકેટ (62 રન) અને ઓલી પોપે ઇનિંગ્સને સંભાળી હતી. ડકેટની વિકેટ પડ્યા બાદ જો રૂટ બેટિંગમાં આવ્યો અને તેના ખાતામાં 2 રન ઉમેરતાની સાથે જ તેણે ઇંગ્લેન્ડની ધરતી પર ભારત વિરુદ્ધ ટેસ્ટ મેચોમાં સૌથી વધુ રન બનાવવાનો રેકોર્ડ પોતાના નામે કર્યો. અગાઉ આ રેકોર્ડ સચિન તેંડુલકરના નામે હતો, જેમણે ઇંગ્લેન્ડમાં 17 ટેસ્ટ મેચોમાં 1575 રન બનાવ્યા હતા. જો રૂટે માત્ર 16 ટેસ્ટ મેચમાં આ કારનામો કરીને સચિનને પાછળ છોડ્યો છે અને હવે તેના 1576 રન* થયા છે.
ઇંગ્લેન્ડની ધરતી પર ભારત અને ઇંગ્લેન્ડ વચ્ચેની ટેસ્ટ મેચમાં સૌથી વધુ રન બનાવનારા ખેલાડીઓ:
- જો રૂટ (ઇંગ્લેન્ડ) - 1576* રન
- સચિન તેંડુલકર (ભારત) - 1575 રન
- રાહુલ દ્રવિડ (ભારત) - 1376 રન
- એલિસ્ટર કૂક (ઇંગ્લેન્ડ) - 1196 રન
- સુનીલ ગાવસ્કર (ભારત) - 1152 રન
સનથ જયસૂર્યાને પણ પાછળ છોડ્યો
આટલું જ નહીં, જો રૂટે ઇંગ્લેન્ડની ઇનિંગ્સમાં 8 રન બનાવતાની સાથે જ આંતરરાષ્ટ્રીય ક્રિકેટમાં સૌથી વધુ રન બનાવનારાઓની યાદીમાં શ્રીલંકાના દિગ્ગજ સનથ જયસૂર્યાને પણ પાછળ છોડી દીધો છે. રૂટ હવે આંતરરાષ્ટ્રીય ક્રિકેટમાં સૌથી વધુ રન બનાવનારા 9મા ક્રમે પહોંચી ગયો છે, તેના ખાતામાં હવે કુલ 21033 રન નોંધાયા છે, જ્યારે જયસૂર્યાના 21032 રન હતા.
આંતરરાષ્ટ્રીય ક્રિકેટમાં સૌથી વધુ રન બનાવનારા બેટ્સમેન:
- સચિન તેંડુલકર (ભારત) - 34357 રન
- કુમાર સંગાકારા (શ્રીલંકા) - 28016 રન
- વિરાટ કોહલી (ભારત) - 27599 રન
- રિકી પોન્ટિંગ (ઓસ્ટ્રેલિયા) - 27483 રન
- મહેલા જયવર્ધને (શ્રીલંકા) - 25957 રન
- જેક્સ કાલિસ (દક્ષિણ આફ્રિકા) - 25534 રન
- રાહુલ દ્રવિડ (ભારત) - 24208 રન
- બ્રાયન લારા (વેસ્ટ ઇન્ડીઝ) - 22358 રન
- જો રૂટ (ઇંગ્લેન્ડ) - 21033* રન
- સનથ જયસૂર્યા (શ્રીલંકા) - 21032 રન
જો રૂટનું આ પ્રદર્શન દર્શાવે છે કે તે ટેસ્ટ ક્રિકેટ ઉપરાંત આંતરરાષ્ટ્રીય ક્રિકેટમાં પણ પોતાનું કદ વધારી રહ્યો છે અને ભવિષ્યમાં વધુ મોટા રેકોર્ડ તોડી શકે છે.
ટોપ સ્ટોરી
ટ્રેન્ડિંગ સમાચાર
