IND vs PAK: શું ભારતીય ખેલાડીઓ પાકિસ્તાની ટીમ સાથે હાથ મિલાવશે? સૂર્યકુમાર યાદવનો જવાબ થયો વાયરલ
એશિયા કપ 2025ની ગ્રુપ સ્ટેજ મેચમાં ભારતીય ખેલાડીઓ અને પાકિસ્તાની ખેલાડીઓ વચ્ચે હાથ ન મિલાવવાના બનાવને કારણે ભારે વિવાદ સર્જાયો હતો.
Suryakumar Yadav statement: એશિયા કપ 2025માં ભારત અને પાકિસ્તાન વચ્ચેની સુપર 4 મેચ પહેલા, 'હાથ મિલાવવા'ના વિવાદ પર ફરીથી ચર્ચા શરૂ થઈ છે. ગ્રુપ સ્ટેજની મેચ દરમિયાન પાકિસ્તાન ક્રિકેટ બોર્ડ (PCB)એ આ મુદ્દે બહિષ્કારની ધમકી પણ આપી હતી. આગામી મુકાબલા પહેલા ભારતીય ટીમના કેપ્ટન સૂર્યકુમાર યાદવને જ્યારે આ વિશે પ્રશ્ન પૂછવામાં આવ્યો, ત્યારે તેમણે રાજકીય વિવાદથી દૂર રહીને એક ચતુરાઈભર્યો જવાબ આપ્યો. તેમના નિવેદનથી સ્પષ્ટ થાય છે કે ટીમનું ધ્યાન માત્ર ક્રિકેટ પર જ કેન્દ્રિત છે, જેના કારણે સોશિયલ મીડિયા પર તેમના નિવેદન ખૂબ જ વાયરલ થઈ રહ્યા છે.
એશિયા કપ 2025ની ગ્રુપ સ્ટેજ મેચમાં ભારતીય ખેલાડીઓ અને પાકિસ્તાની ખેલાડીઓ વચ્ચે હાથ ન મિલાવવાના બનાવને કારણે ભારે વિવાદ સર્જાયો હતો. આ ઘટના બાદ હવે ભારત અને પાકિસ્તાન ફરી એકવાર સુપર 4 મેચમાં દુબઈમાં આમને-સામને થવાના છે. આ હાઈ-વોલ્ટેજ મેચ પહેલા આ વિવાદ પર ભારતીય ટીમના કેપ્ટન સૂર્યકુમાર યાદવને પ્રશ્ન પૂછવામાં આવ્યો, અને તેમનો જવાબ સોશિયલ મીડિયા પર છવાઈ ગયો છે.
સૂર્યકુમારનો રાજકીય સવાલ પર ક્રિકેટર જેવો જવાબ
પ્રેસ કોન્ફરન્સ દરમિયાન, એક પત્રકારે સૂર્યકુમાર યાદવને પૂછ્યું કે શું ભારતીય ટીમ પાકિસ્તાની ખેલાડીઓ સાથે હાથ મિલાવશે? આ પ્રશ્નનો સીધો જવાબ આપવાને બદલે, સૂર્યકુમાર યાદવે તેને ટાળીને મેચ પર ધ્યાન કેન્દ્રિત કર્યું. તેમણે કહ્યું, "આ બેટ અને બોલ વચ્ચે એક શાનદાર મુકાબલો હશે અને તે એક દબાણથી ભરેલી મેચ હશે." તેમણે ઉમેર્યું કે સ્ટેડિયમ લોકોથી ભરેલું હશે અને ભીડ તમને સંપૂર્ણ સમર્થન આપશે. તેથી, ખેલાડીઓ માટે શ્રેષ્ઠ છે કે તેઓ પોતાનું શ્રેષ્ઠ પ્રદર્શન કરે અને મેચનો આનંદ માણે.
સોશિયલ મીડિયાથી દૂર રહેવાની સલાહ
વધુમાં, સૂર્યકુમાર યાદવે ખેલાડીઓને સોશિયલ મીડિયા અને બાહ્ય અવાજોથી દૂર રહેવાની સલાહ આપી. તેમણે કહ્યું કે ખેલાડીઓ માટે શ્રેષ્ઠ છે કે તેઓ પોતાના રૂમમાં રહે, ફોન બંધ કરે અને આરામ કરે. તેમણે ભારપૂર્વક જણાવ્યું કે શ્રેષ્ઠ પ્રદર્શન કરવા માટે ખેલાડીઓએ બહારના વિવાદોથી દૂર રહેવું જરૂરી છે.
રાષ્ટ્રગીત પર આંખો બંધ કરવા પાછળનું કારણ
પ્રેસ કોન્ફરન્સમાં સૂર્યકુમાર યાદવે એક રસપ્રદ ખુલાસો પણ કર્યો. તેમણે કહ્યું કે જ્યારે પણ તે ટીમ ઇન્ડિયાની જર્સી પહેરીને મેદાનમાં આવે છે, ત્યારે તે તેમના માટે ગૌરવની ક્ષણ હોય છે. તેમણે જણાવ્યું કે રાષ્ટ્રગીત વાગતી વખતે તે હંમેશા પોતાની આંખો બંધ કરી દે છે, કારણ કે આ પળ તેના માટે અત્યંત ભાવુક અને ગર્વની હોય છે. સૂર્યકુમાર યાદવનો આ સમજદારીભર્યો અને રાષ્ટ્રપ્રેમ દર્શાવતો જવાબ બંને દેશોના પ્રશંસકો દ્વારા ખૂબ જ સકારાત્મક રીતે સ્વીકારવામાં આવ્યો છે.
ટોપ સ્ટોરી
ટ્રેન્ડિંગ સમાચાર
