શુભમન ગિલનો તરખાટ: 84 રનની તોફાની ઈનિંગથી ગુજરાતની 7મી જીત, રાજસ્થાન ટોપ-4માંથી આઉટ

IPL 2026 RR vs GT highlights: IPL 2026: ગુજરાત ટાઇટન્સે રાજસ્થાન રોયલ્સને 77 રનથી કચડ્યું, RR પોઈન્ટ ટેબલમાં ટોપ-4માંથી આઉટ.

Gujarat Titans Beat Rajasthan Royals by 77 Runs Securing 7th Win IPL 2026

Source : IPL/X

Show Quick Read

Key points generated by AI, verified by newsroom

• ગુજરાત ટાઇટન્સે રાજસ્થાન રોયલ્સને 77 રનથી હરાવ્યું.
• શુભમન ગિલ અને સાઈ સુદર્શને તોફાની બેટિંગ કરી.
• રાજસ્થાન 152 રનમાં ઓલઆઉટ, રાશિદ ખાને 4 વિકેટ લીધી.

IPL 2026 RR vs GT highlights: IPL 2026ના રોમાંચક જંગમાં ગુજરાત ટાઇટન્સે પોતાનો દબદબો જાળવી રાખ્યો છે. મેચ 52માં ગુજરાતે બેટિંગ અને બોલિંગ બંનેમાં શાનદાર રમત દેખાડીને રાજસ્થાન રોયલ્સને 77 રનથી કારમી હાર આપી છે. આ ધમાકેદાર જીત સાથે ગુજરાતે ટૂર્નામેન્ટમાં પોતાની 7મી જીત નોંધાવી છે અને પ્લેઓફમાં પહોંચવાનો પોતાનો દાવો એકદમ મજબૂત કરી લીધો છે. જ્યારે બીજી તરફ, સળંગ બીજી હારનો સામનો કરનાર રાજસ્થાનની ટીમ પોઈન્ટ ટેબલમાં ટોપ-4માંથી બહાર ફેંકાઈ ગઈ છે. ગિલની કેપ્ટનશિપ અને ગુજરાતના ઘાતક બોલરોના તરખાટ સામે આખી રાજસ્થાનની ટીમ સાવ ઘૂંટણિયે પડી ગઈ હતી.

ગુજરાતની તોફાની બેટિંગ:

મેચની શરૂઆતમાં પ્રથમ બેટિંગ કરતા ગુજરાતે 20 ઓવરમાં 4 વિકેટના નુકસાને 229 રનનો તોતિંગ સ્કોર બોર્ડ પર લગાવી દીધો હતો. કેપ્ટન શુભમન ગિલે આક્રમક બેટિંગ કરતા માત્ર 44 બોલમાં 9 ચોગ્ગા અને 3 છગ્ગા ફટકારીને 84 રનની શાનદાર ઇનિંગ રમી હતી. તેને યુવા બેટ્સમેન સાઈ સુદર્શને પણ મજબૂત સાથ આપ્યો, જેણે 36 બોલમાં 6 ચોગ્ગા અને 2 છગ્ગાની મદદથી 55 રન ઝૂડી કાઢ્યા હતા.

આ ઐતિહાસિક જીત પછી ગુજરાત ટાઇટન્સ 14 પોઈન્ટ સાથે પોઈન્ટ ટેબલમાં બીજા નંબરે પહોંચી ગયું છે. ટીમને હજુ 3 મેચ રમવાની બાકી છે, પરંતુ અહીંથી તેમની પ્લેઓફની ટિકિટ લગભગ કન્ફર્મ માનવામાં આવી રહી છે.

રન ચેઝમાં રાજસ્થાનનો ધબડકો:

230 રનના વિશાળ ટાર્ગેટનો પીછો કરવા ઉતરેલી રાજસ્થાન રોયલ્સની ટીમ 16.3 ઓવરમાં માત્ર 152 રન બનાવીને ઓલઆઉટ થઈ ગઈ હતી. જોકે તેમની શરૂઆત સારી રહી હતી; ઓપનર વૈભવ સૂર્યવંશી અને યશસ્વી જયસ્વાલે 17 બોલમાં 38 રનની ભાગીદારી નોંધાવી હતી. પરંતુ સૂર્યવંશી (16 બોલમાં 3 ચોગ્ગા અને 3 છગ્ગા સાથે 36 રન) આઉટ થતા જ રાજસ્થાનની ગાડી પાટા પરથી ઉતરી ગઈ હતી. 40 રને બીજી, 68 રને ત્રીજી, 87 રને ચોથી અને 91 રને પાંચમી વિકેટ પડ્યા પછી આખી ટીમ પત્તાના મહેલની જેમ ધરાશાયી થતી ગઈ અને 152 રને સમેટાઈ ગઈ.

રાજસ્થાન તરફથી રવિન્દ્ર જાડેજાએ સૌથી વધુ સંઘર્ષ કરતા 25 બોલમાં 3 ચોગ્ગા અને 2 છગ્ગા ફટકારી 38 રન બનાવ્યા હતા. આ સિવાય ધ્રુવ જુરેલે 24, શિમરોન હેટમાયરે 6, શુભમ દુબેએ 15, દાસુન શનાકાએ 16 અને જોફ્રા આર્ચરે 5 રન બનાવ્યા હતા. કેપ્ટન યશસ્વી જયસ્વાલ માત્ર 3 રન જ બનાવી શક્યો હતો.

ગુજરાતની કાતિલ બોલિંગ:

ગુજરાતના બોલરોએ મેદાન મારી લીધું હતું. સ્પિનર રાશિદ ખાને પોતાની જાદુઈ બોલિંગથી 4 વિકેટ ઝડપીને રાજસ્થાનની બેટિંગ લાઇન-અપની કમર તોડી નાખી હતી. જ્યારે જેસન હોલ્ડરે 3, કાગીસો રબાડાએ 2 અને મોહમ્મદ સિરાજે 1 વિકેટ લઈને ટીમને શાનદાર જીત અપાવી હતી.