IPL Auction: પિતાએ દુકાન વેચી, 27 લાખની લોન લીધી; હવે CSKએ દીકરાને ₹14.20 કરોડમાં ખરીદ્યો
IPL Auction 2026 news: ભરતપુરના કાર્તિક શર્માનું નસીબ ચમક્યું, ધોનીની ટીમે કરી ધનવર્ષા, સંઘર્ષની કહાની જાણીને આંખ ભીની થઈ જશે.
IPL Auction 2026 news: IPL 2026 ની હરાજી (IPL Auction 2026) માં અનેક ખેલાડીઓ પર પૈસાનો વરસાદ થયો, પરંતુ રાજસ્થાનના ભરતપુરના એક યુવા ક્રિકેટરની કહાનીએ સૌના દિલ જીતી લીધા છે. પાંચ વખતની ચેમ્પિયન ચેન્નાઈ સુપર કિંગ્સ (CSK) એ ભરતપુરના આશાસ્પદ ખેલાડી કાર્તિક શર્મા (Kartik Sharma) ને પોતાની ટીમમાં સામેલ કરવા માટે ₹14 કરોડ 20 લાખ ની જંગી બોલી લગાવી છે. એક સામાન્ય મધ્યમવર્ગીય પરિવારમાંથી આવતા કાર્તિક માટે આ માત્ર એક રકમ નથી, પણ તેના પિતાના સંઘર્ષનું પરિણામ છે.
પિતાનું બલિદાન અને 27 લાખનું દેવું
કાર્તિકની સફળતા પાછળ તેના પિતા મનોજ શર્માનો ત્યાગ છુપાયેલો છે. જિલ્લા ક્રિકેટ એસોસિએશનના જણાવ્યા મુજબ, કાર્તિકની કારકિર્દી માટે તેના પિતાએ પોતાની દુકાન વેચી દીધી હતી. એટલું જ નહીં, દીકરાનું ક્રિકેટનું સપનું પૂરું કરવા માટે તેમણે માથે ₹27 લાખની લોન લીધી હતી અને ટ્યુશન ભણાવીને ઘરનું ગુજરાન ચલાવ્યું હતું. આજે જ્યારે દીકરો કરોડોમાં વેચાયો છે, ત્યારે પિતાનું આ બલિદાન સાર્થક થયું છે.
ભરતપુરમાં દિવાળી જેવો માહોલ
આ સમાચાર મળતાની સાથે જ ભરતપુરના લક્ષ્મણ મંદિર ચોકમાં જશ્નનો માહોલ સર્જાયો હતો. ક્રિકેટ ચાહકો અને એસોસિએશનના હોદ્દેદારોએ ફટાકડા ફોડીને ઉજવણી કરી હતી. જ્યારે વીડિયો કોલ પર કાર્તિક અને તેના પિતાનો સંપર્ક કરવામાં આવ્યો ત્યારે બંને ભાવુક થઈ ગયા હતા અને તેમની આંખોમાં ખુશીના આંસુ હતા.
ધોનીની ટીમે કેમ લગાવી મોટી બોલી?
કાર્તિક શર્મા ડોમેસ્ટિક ક્રિકેટમાં પોતાની સિક્સર ફટકારવાની ક્ષમતા (Six-hitting ability) માટે જાણીતો છે. તેણે અંડર-19 અને રણજી ટ્રોફીમાં શાનદાર પ્રદર્શન કર્યું છે અને તેને પ્રતિષ્ઠિત 'મથુરા દાસ મથુરા એવોર્ડ' પણ મળ્યો છે. ક્રિકેટના જાણકારો અંદાજ લગાવી રહ્યા હતા કે તેને 6 થી 7 કરોડ મળશે, પરંતુ ધોનીની ટીમે ₹14.20 કરોડ આપીને તેની પ્રતિભાનું સાચું મૂલ્ય ચૂકવ્યું છે.
ચેન્નાઈ સુપર કિંગ્સ (CSK) સંપૂર્ણ સ્ક્વોડ
રુતુરાજ ગાયકવાડ (કેપ્ટન), એમએસ ધોની, શિવમ દુબે, સંજુ સેમસન (ટ્રેડેડ), નૂર અહેમદ, ખલીલ અહેમદ, પ્રશાંત વીર, કાર્તિક શર્મા, મેથ્યુ શોર્ટ, મેટ હેનરી, રાહુલ ચહર, સરફરાઝ ખાન, મુકેશ ચૌધરી, જેમી ઓવરટન, અકિલ હુસૈન, અંશુલ કંબોજ, આયુષ મ્હાત્રે, ડેવાલ્ડ બ્રુઇસ, નાથન એલિસ, શ્રેયસ ગોપાલ, અમન ખાન, ઉર્વિલ પટેલ, રામકૃષ્ણ ઘોષ, ગુર્જપનીત સિંહ, જેક ફોલ્કેસ.
ટોપ સ્ટોરી
ટ્રેન્ડિંગ સમાચાર
