IPL 2026: 25 કરોડમાં વેચાયેલા કેમેરોન ગ્રીનને મોટું નુકસાન! પગારમાંથી ₹7.2 કરોડ કપાશે, જાણો કેમ?
Cameron Green IPL price: KKR એ રેકોર્ડ બોલી લગાવી પણ ખેલાડીને મળશે માત્ર 18 કરોડ: જાણો BCCI નો નવો નિયમ અને બાકીના પૈસા કોના ખિસ્સામાં જશે.
Cameron Green IPL price: IPL 2026 ની હરાજીમાં અપેક્ષા મુજબ જ ઓસ્ટ્રેલિયન ખેલાડીઓનો દબદબો જોવા મળ્યો છે. જ્યારે ડેવોન કોનવે અને જેક ફ્રેઝર-મેકગર્ક જેવા સ્ટાર્સ વેચાયા વિનાના રહ્યા, ત્યારે કેમેરોન ગ્રીનનું નામ આવતાની સાથે જ ટીમો વચ્ચે બોલીનું યુદ્ધ જામ્યું હતું. ખાસ કરીને ચેન્નાઈ સુપર કિંગ્સ (CSK) અને કોલકાતા નાઈટ રાઈડર્સ (KKR) વચ્ચે જોરદાર ટક્કર થઈ હતી. CSK એ ₹25 કરોડ સુધીની બોલી લગાવી હતી, પરંતુ KKR પાસે પર્સમાં સૌથી વધુ બેલેન્સ હોવાથી તેમણે બાજી મારી લીધી અને ₹25.20 કરોડમાં ગ્રીનને પોતાની ટીમમાં સામેલ કર્યો.
જોકે, આ વખતે BCCI એ હરાજીના નિયમોમાં ફેરફાર કર્યો છે, જેની સીધી અસર ખેલાડીના ખિસ્સા પર પડી છે. નવા નિયમ મુજબ, ભલે કેમેરોન ગ્રીન પર ₹25.20 કરોડની બોલી લાગી હોય, પરંતુ તેને પગાર તરીકે મહત્તમ ₹18 કરોડ જ મળી શકશે. એટલે કે, તેની હરાજી કિંમતમાંથી ₹7.2 કરોડનો મોટો કાપ મૂકવામાં આવશે. આ નિયમ હરાજીમાં ખેલાડીઓની કિંમતોમાં અસમાનતા ઘટાડવા અને સંતુલન જાળવવા માટે બનાવવામાં આવ્યો હોવાનું મનાય છે.
હવે પ્રશ્ન એ થાય છે કે શું ખેલાડીના પગારમાંથી કપાતા આ પૈસાનો ફાયદો ફ્રેન્ચાઇઝી (KKR) ને મળશે? તો જવાબ છે - ના. KKR ના પર્સમાંથી તો પૂરેપૂરા ₹25.20 કરોડ જ કપાશે. ફ્રેન્ચાઇઝીને કોઈ ડિસ્કાઉન્ટ મળશે નહીં. ખેલાડી અને હરાજી કિંમત વચ્ચેની જે તફાવતની રકમ છે (અહીં ₹7.2 કરોડ), તે BCCI ના 'ખેલાડી કલ્યાણ ભંડોળ' (Player Welfare Fund) માં જમા કરવામાં આવશે. એટલે કે આ પૈસાનો ઉપયોગ ભવિષ્યમાં ખેલાડીઓના હિત માટે કરવામાં આવશે, નહીં કે ટીમ માલિકોના ફાયદા માટે.
💰 INR 25.20 Crore 🤯🤯
— IndianPremierLeague (@IPL) December 16, 2025
The third most expensive player in the history of #TATAIPL auction! 🔨
Cameron Green will play for @KKRiders 💜#TATAIPLAuction pic.twitter.com/c0ErBPWHju
કેમેરોન ગ્રીનની IPL કારકિર્દી પર નજર કરીએ તો, 26 વર્ષીય આ ઓલરાઉન્ડરે 2023 માં મુંબઈ ઈન્ડિયન્સ સાથે પોતાની સફર શરૂ કરી હતી, જ્યાં તેણે 16 મેચમાં 452 રન અને 6 વિકેટ લીધી હતી. ત્યારબાદ 2024 માં તે ટ્રેડ થઈને રોયલ ચેલેન્જર્સ બેંગ્લોર (RCB) માં ગયો હતો, જ્યાં તેણે 13 મેચમાં 255 રન અને 10 વિકેટ ઝડપી હતી. હવે 2026 માં KKR તેની ત્રીજી ટીમ બનશે.
આમ, ભલે આંકડાકીય રીતે ગ્રીન આ સિઝનનો સૌથી મોંઘો ખેલાડી બની ગયો હોય, પરંતુ વાસ્તવિક કમાણીની દ્રષ્ટિએ તેને મોટું નુકસાન વેઠવું પડ્યું છે. BCCI નો આ નવો નિયમ આગામી સમયમાં વિદેશી ખેલાડીઓની કમાણી પર કેવી અસર કરશે તે જોવું રસપ્રદ રહેશે. KKR માટે હવે ગ્રીનનું પ્રદર્શન તેની કિંમત જેટલું દમદાર રહે છે કે કેમ, તેના પર સૌની નજર રહેશે.
ટોપ સ્ટોરી
ટ્રેન્ડિંગ સમાચાર
