PBKS vs RCB Qualifier 1: મુલ્લાનપુરમાં વરસાદની સંભાવના, જાણો પ્લેઓફ મેચનો નિયમ? શું રિઝર્વ ડે છે ઉપલબ્ધ?

આઈપીએલે સત્તાવાર રીતે જાહેરાત કરી હતી કે હવે આ બંને મેચ મુલ્લાનપુરમાં ખસેડવામાં આવી છે

RCB

Source : Social Media

PBKS vs RCB Weather Report: ગુરુવારે મોહાલીમાં વરસાદની શક્યતા છે, આ દિવસે મુલ્લાનપુર ક્રિકેટ સ્ટેડિયમ (નવું પીસીએ સ્ટેડિયમ) ખાતે પંજાબ કિંગ્સ અને રોયલ ચેલેન્જર્સ બેંગલુરુ વચ્ચે પ્રથમ ક્વોલિફાયર મેચ રમાશે. વિજેતા ટીમ ફાઇનલમાં પ્રવેશ કરશે જ્યારે હારનાર ટીમને બીજી તક મળશે અને એલિમિનેટરના વિજેતા સામે ટકરાશે. પરંતુ જો વરસાદને કારણે મેચ રદ્દ થાય તો કઈ ટીમ ફાઇનલમાં પ્રવેશ મેળવશે અને કઈ ટીમ ક્વોલિફાયર 2 માં જશે? શું અહીં રિઝર્વ ડે છે? આ બધા પ્રશ્નોના જવાબો અહીં આપેલા છે.

અગાઉ ક્વોલિફાયર 1 અને એલિમિનેટરની મેચ હૈદરાબાદમાં રમવાની હતી પરંતુ આઈપીએલે સત્તાવાર રીતે જાહેરાત કરી હતી કે હવે આ બંને મેચ મુલ્લાનપુરમાં ખસેડવામાં આવી છે. પ્લેઓફ મેચ ગુરુવારથી શરૂ થઈ રહી છે. ક્વોલિફાયર 1 પોઈન્ટ ટેબલમાં ટોચ પર રહેલા શ્રેયસ ઐય્યરના નેતૃત્વ હેઠળના પંજાબ કિંગ્સ અને રોયલ ચેલેન્જર્સ બેંગલુરુ વચ્ચે રમાશે. આરસીબીએ લખનઉને હરાવીને ટેબલમાં બીજું સ્થાન મેળવ્યું હતું.

જો વરસાદને કારણે ક્વોલિફાયર 1 રદ થાય છે તો નિયમ શું છે?

જો પંજાબ કિંગ્સ અને રોયલ ચેલેન્જર્સ બેંગલુરુ વચ્ચેની મેચ રદ થાય છે તો પંજાબને ફાઇનલમાં પ્રવેશની ટિકિટ મળશે. જ્યારે આરસીબીએ ફાઇનલમાં પહોંચવા માટે ક્વોલિફાયર 2 રમવું પડશે. નિયમો અનુસાર, પોઈન્ટ ટેબલમાં ટોચની ટીમને પ્રાથમિકતા આપવામાં આવે છે.

શું પ્લેઓફ મેચોમાં રિઝર્વ ડે છે?

ના, પ્લેઓફ મેચોના રિઝર્વ ડે વિશે હજુ સુધી કોઈ સત્તાવાર માહિતી આપવામાં આવી નથી. ગયા સીઝનમાં આઈપીએલ ફાઇનલ માટે રિઝર્વ ડે નક્કી કરવામાં આવ્યો હતો. પરંતુ બીસીસીઆઈએ એક નવો નિયમ લાવ્યો છે, જે મેચ રદ થવાની શક્યતાઓને ઘણી ઓછી કરે છે.

બીસીસીઆઈ નવો નિયમ લાવે છે

બીસીસીઆઈએ આઈપીએલ 2025 મેચોના વધારાના સમયમાં 120 મિનિટનો ઉમેરો કર્યો છે, જે મુજબ રાત્રે 9:30 વાગ્યા સુધીમાં સંપૂર્ણ 20 ઓવરની મેચ શરૂ કરી શકાય છે.

મોહાલીમાં વરસાદની શક્યતા

મોહાલીના હવામાનની વાત કરીએ તો ગુરુવારે તાપમાન 36 ડિગ્રી સેલ્સિયસ રહેશે. વાદળછાયું વાતાવરણ રહેશે અને હળવો વરસાદ પડવાની શક્યતા છે. પરંતુ શુક્રવારે ભારે વરસાદની શક્યતા છે, આ દિવસે અહીં એલિમિનેટર મેચ રમાશે. આ મેચમાં મુંબઈ ઈન્ડિયન્સ અને ગુજરાત ટાઇટન્સ એકબીજા સામે ટકરાશે અને હારનારી ટીમ બહાર થઈ જશે. ગુજરાત પોઈન્ટ ટેબલમાં ત્રીજા સ્થાને છે અને મુંબઈ ચોથા સ્થાને છે.