WhatsApp પર VIP સ્ટોક ટિપ્સથી સાવધાન! ગૃહ મંત્રાલયે જાહેર કરી નવી એડવાઈઝરી

online investment fraud: નકલી ટ્રેડિંગ એપ અને VIP સ્ટોક ટિપ્સના બહાને લાખો ખંખેરતી નવી મોડસ ઓપરેન્ડી, ગૃહ મંત્રાલયની ચેતવણી.

WhatsApp Telegram Investment Fraud Guard Against Fake Stock Trading Scams

Source : ai

Show Quick Read

Key points generated by AI, verified by newsroom

• નકલી રોકાણ એપથી છેતરપિંડી, ગૃહ મંત્રાલયે ચેતવણી આપી.
• ખાનગી લિંક્સથી નકલી એપ ડાઉનલોડ કરાવી નફો બતાવે.
• પૈસા ઉપાડવા ટેક્સ-ફી બહાને વધુ પૈસાની માંગણી થાય.
• અજાણી લિંક્સ ટાળો, બ્રોકર તપાસો, 1930 પર ફરિયાદ કરો.

online investment fraud: શું તમને પણ વોટ્સએપ કે ટેલિગ્રામ પર 'ગેરંટીડ રિટર્ન' કે 'VIP સ્ટોક ટિપ્સ' આપતા મેસેજ આવે છે? જો હા, તો ચેતી જજો! ગૃહ મંત્રાલય (MHA) ની ભારતીય સાયબર ક્રાઈમ કોઓર્ડિનેશન સેન્ટર (I4C) વિંગે ઓનલાઈન રોકાણના નામે થતી છેતરપિંડી અંગે ગંભીર ચેતવણી આપી છે. સાયબર ગુનેગારો હવે લોકોને શેરબજારમાં ટૂંકા ગાળામાં મોટા અને ગેરંટીડ નફાની લાલચ આપીને ખાનગી લિંક દ્વારા નકલી ટ્રેડિંગ એપ ડાઉનલોડ કરાવી રહ્યા છે, અને પછી ડેટા ચોરીની સાથે લાખો રૂપિયાનો ચૂનો લગાવી રહ્યા છે.

કેવી રીતે કામ કરે છે આ સાયબર ગઠિયાઓ?

આ છેતરપિંડીની શરૂઆત અજાણ્યા વોટ્સએપ અથવા ટેલિગ્રામ ગ્રુપથી થાય છે. ગઠિયાઓ નકલી રોકાણ જૂથો બનાવે છે અને પોતાને બજારના નિષ્ણાત અથવા પ્રતિષ્ઠિત નાણાકીય કંપનીના પ્રતિનિધિ તરીકે રજૂ કરે છે. તેઓ યુઝર્સને ફેક ટ્રેડિંગ સક્સેસ સ્ટોરીઝ અને 'VIP સ્ટોક ટિપ્સ' આપીને વિશ્વાસમાં લે છે. ત્યારબાદ, તેઓ પીડિતોને સત્તાવાર પ્લે સ્ટોર કે એપ સ્ટોરની જગ્યાએ કોઈ વોટ્સએપ મેસેજમાં આવેલી ખાનગી લિંક મારફતે ટ્રેડિંગ એપ ડાઉનલોડ કરવા માટે સમજાવે છે.

નકલી નફાની માયાજાળ અને મુંબઈનો કિસ્સો

તપાસકર્તાઓના જણાવ્યા અનુસાર, આ નકલી એપમાં પીડિતને શરૂઆતમાં ટ્રેડિંગ ડેશબોર્ડ પર મોટો નફો દેખાડવામાં આવે છે, જેથી તે વધુને વધુ પૈસા રોકવા પ્રેરાય. પરંતુ, જ્યારે રોકાણકાર પોતાના પૈસા ઉપાડવાનો (Withdraw) પ્રયાસ કરે છે, ત્યારે તેને ટેક્સ, પ્રોસેસિંગ ફી અથવા એકાઉન્ટ વેરિફિકેશન ચાર્જના બહાને વધુ પૈસા જમા કરાવવાનું કહેવાય છે.

આનું તાજેતરનું ઉદાહરણ મુંબઈના એક નિવૃત્ત વૈજ્ઞાનિકનો કિસ્સો છે. તેમને પણ આવા જ એક અજાણ્યા વોટ્સએપ ગ્રુપમાં એડ કરીને નકલી એપ ડાઉનલોડ કરાવાઈ હતી. નફો દેખાડીને તેમની પાસે મોટી રકમનું રોકાણ કરાવાયું અને જ્યારે તેમણે પૈસા ઉપાડવા માંગ્યા, ત્યારે તેમનું એકાઉન્ટ બ્લોક કરી દેવામાં આવ્યું, જેનાથી તેઓ પોતાના જ પૈસા પાછા મેળવી શક્યા નહીં.

રોકાણ કરતા પહેલા આટલું ખાસ ધ્યાનમાં રાખો:

સત્તાવાર એપ સ્ટોર સિવાય અન્ય કોઈ અજાણી કે ખાનગી લિંકથી ટ્રેડિંગ એપ ક્યારેય ડાઉનલોડ ન કરો.

અજાણ્યા વોટ્સએપ કે ટેલિગ્રામ ગ્રુપમાં મળતી રોકાણ સલાહ કે 'ગેરંટીડ રિટર્ન'ના દાવાઓને ચેતવણીરૂપ (Red Flag) માનીને તેના પર વિશ્વાસ ન કરો.

યાદ રાખો કે, સાચા સ્ટોકબ્રોકર કે નાણાકીય સંસ્થાઓ તમારા જમા થયેલા પૈસા ઉપાડવા માટે ક્યારેય વધારાના પૈસા કે ફી માંગતા નથી.

કોઈપણ પ્લેટફોર્મ પર રોકાણ કરતા પહેલા બ્રોકર અને ટ્રેડિંગ એપના ઓળખપત્રોની સંપૂર્ણ ખરાઈ કરો.

જો તમારી સાથે છેતરપિંડી થાય તો શું કરવું?

જો તમને જરા પણ શંકા હોય કે તમારી સાથે સાયબર ફ્રોડ થયો છે, તો મોડું કર્યા વગર તાત્કાલિક 1930 પર કૉલ કરીને રાષ્ટ્રીય સાયબર ક્રાઈમ હેલ્પલાઇનનો સંપર્ક કરો. આ ઉપરાંત, તમે ભારત સરકારના સત્તાવાર પોર્ટલ cybercrime.gov.in પર જઈને પણ તમારી ઓનલાઈન ફરિયાદ નોંધાવી શકો છો. અધિકારીઓના મતે, સાયબર ગુનાઓ સામે જાગૃતિ એ જ તમારું સૌથી મોટું હથિયાર છે, તેથી આ માહિતી તમારા પરિવાર અને મિત્રો સાથે ચોક્કસ શેર કરો.