Hun To Bolish | હું તો બોલીશ | જળકર્ફ્યુ

દેવભૂમિ દ્વારકા જિલ્લામાં મેઘરાજાએ તાંડવ મચાવ્યો.યાત્રાધામ દ્વારકામાં ગઈકાલે 10 ઈંચ વરસાદ વરસ્યા બાદ આજે સાંજના 6 વાગ્યા સુધીમાં 7 ઈંચ વરસાદ વરસ્યો. 34 કલાકમાં 17 ઈંચ વરસાદ ખાબકતા જળબંબાકારની સ્થિતિ સર્જાઈ. ખંભાળિયા તો જાણે ડૂબી ગયું. ખંભાળિયામાં ગઈકાલે 18 ઈંચ વરસાદ વરસ્યો હતો. આજે 7 ઈંચ વરસાદ વરસ્યો. 34 કલાકમાં 25 ઈંચ વરસાદ વરસતા ખંભાળિયા જળમગ્ન થયું. ભાણવડમાં પણ આજે સાંજના 6 વાગ્યા સુધીમાં 7 ઈંચ જેટલો વરસાદ ખાબકી ગયો. કલ્યાણપુર તાલુકામાં પણ સાડા 6 ઈંચ જેટલો વરસાદ પડતા જળબંબાકારની સ્થિતિ સર્જાઈ. યાત્રાધામ દ્વારકાનો રબારી ગેટ વિસ્તાર પાણીમાં ગરકાવ થયો.અહીં દુકાનોમાં વરસાદી પાણી ઘૂસી ગયા. ઈસ્કોન ગેટ વિસ્તારની પણ આજ સ્થિતિ રહી. ઘૂંટણસમા પાણી ભરાયા. દ્વારકાના ગોમતી ઘાટ પરથી પાણી રસ્તા પર આવ્યા. ભારે વરસાદને લઈ દ્વારકા-જામનગર હાઈવેને સ્થિતિ એવી સર્જાઈ કે નદી છે કે હાઈવે કહેવું મુશ્કેલ બન્યું. ખંભાળિયા-દ્વારકા સ્ટેટ હાઈવે.. અને કલ્યાણપુર-પોરબંદર સ્ટેટ હાઈવે પણ પાણીમાં ગરકાવ થયો. હાઈવે જ પાણીમાં ડૂબી જતા બંધ કરાયા. મૂશળધાર વરસાદને લઈ ખંભાળિયા શહેરમાં જળપ્રલય આવ્યો. ખંભાળિયામાં વહેતી ઘી નદીમાં પૂર આવ્યું. ઘી નદીના પાણી આસપાસની સોસાયટીમાં ઘૂસી ગયા. દ્વારકા પાસે રેલવે ટ્રેક પર પાણી ફરી વળતા રેલ વ્યવહાર ખોરવાયો છે. કેટલીક ટ્રેનોને અધવચ્ચે જ રોકી દેવાઈ. તો કેટલીક ટ્રેનોને રદ કરાઈ... જેને લઈ દ્વારકા અને ખંભાળિયાના રેલવે સ્ટેશન પર મોટી સંખ્યામાં મુસાફરો અટવાયા છે.. આવી જ સ્થિતિ છે બસ સ્ટેશનની પણ. હાઈવે જ પાણીમાં ગરકાવ થતાં ST બસના રૂટ કેન્સલ કરાયા છે.. જેને લઈ મુસાફરો બસ સ્ટેશને અટવાયા છે. ભાણવડના વર્તુ 2 ડેમમાંથી પાણી છોડાતા રાવલ ગામ બેટમાં ફેરવાયું છે.. ખંભાળિયાની રામનાથ સોસાયટીમાં ઘૂંટણસમા પાણી ભરાયા. મકાનોમાં પાણી ઘૂસી જતાં લોકોને સલામત સ્થળે ખસેડાયા. ખંભાળિયાની પ્રાંત અધિકારીની કચેરીનું પરિસર તળાવ બની ગયું. ખંભાળિયાના સ્મશાનમાં પણ વરસાદી પાણી ફરી વળ્યા. સ્મશાનમાં અગ્નિદાહ દેવાની જગ્યા જ ડૂબી ગઈ. લાઈટ ન હોવાથી ઈલેક્ટ્રિક સ્મશાન પણ બંધ રહ્યું.