Gujarat Corona Cases : ગુજરાતમાં કોરોનાના એક્ટિવ કેસો 1100ને પાર, 33 દર્દીઓ હોસ્પિટલમાં સારવાર હેઠળ

Gujarat Corona Cases : ગુજરાતમાં કોરોનાના એક્ટિવ કેસો 1100ને પાર, 33 દર્દીઓ હોસ્પિટલમાં સારવાર હેઠળ

અમદાવાદ: દેશમાં કોરોના વાયરસના કેસમાં સતત વધારો થઈ રહ્યો છે. ગુજરાતમાં પણ કેસ વધી રહ્યા છે. છેલ્લા 24 કલાકમાં ગુજરાતમાં કોરોના વાયરસના 235 કેસ નોંધાયા છે.  ગુજરાતમાં સોમવારે કોરોના વાયરસના 235 નવા કેસ નોંધાયા છે.  આ સાથે જ રાજ્યમાં કુલ એક્ટિવ કેસનો આંકડો 1109 પર પહોંચી ગયો છે.  

એક્ટિવ કેસની સંખ્યા 1109 પર પહોંચી 

ગુજરાતમાં છેલ્લા 24 કલાકમાં કોરોના વાયરના  235 નવા કેસ નોંધાયા છે.  રાજ્યમાં એક્ટિવ કેસની સંખ્યા 1109 પર પહોંચી ગઈ છે. જેમાં  33 હોસ્પિટલમાં દાખલ છે.  જ્યારે 1076 દર્દી હોમ આઇસોલેશનમાં છે. આ સિવાય 106 દર્દી સાજા થઈ જતા તેમને ડિસ્ચાર્જ કરવામાં આવ્યા છે.  

કેરળ સૌથી વધુ અસરગ્રસ્ત રાજ્ય

છેલ્લા 48 કલાકમાં દેશમાં કોરોનાના 769 નવા કેસ (Covid 19 Cases Updates) નોંધાયા છે. આ સાથે સારવાર હેઠળના દર્દીઓની સંખ્યા છ હજારને વટાવી ગઈ છે. આ સંદર્ભમાં કેન્દ્રીય આરોગ્ય મંત્રાલયે રવિવારે આંકડા જાહેર કર્યા હતા. મંત્રાલય અનુસાર, કેરળ સૌથી વધુ અસરગ્રસ્ત રાજ્ય છે. ત્યારબાદ ગુજરાત, બંગાળ અને દિલ્હીનો ક્રમ આવે છે.

કોરોનાના વધતા કેસોને ધ્યાનમાં રાખીને તૈયારીઓનો હિસ્સો લેવા માટે કેન્દ્ર 'મોક ડ્રીલ' કરી રહ્યું છે. તમામ રાજ્યોને ઓક્સિજન, વેન્ટિલેટર અને આવશ્યક દવાઓની ઉપલબ્ધતા સુનિશ્ચિત કરવા સૂચના આપવામાં આવી છે.

મંત્રાલયે જણાવ્યું હતું કે ભારતમાં કોરોનાની સારવાર લઈ રહેલા દર્દીઓની સંખ્યા 6,133 છે. છેલ્લા 24 કલાકમાં વધુ છ કોરોના દર્દીઓના મોત થયા છે. સત્તાવાર સૂત્રો અનુસાર, મોટાભાગના દર્દીઓમાં હળવા લક્ષણો હતા અને તેઓ ઘરે સારવાર બાદ સ્વસ્થ થયા છે. આ વર્ષે જાન્યુઆરીથી દેશમાં 65 લોકોના કોરોનાથી મૃત્યુ થયાના અહેવાલ છે. 22 મે સુધીમાં દેશમાં સારવાર હેઠળ રહેલા દર્દીઓની સંખ્યા 257 હતી.

કેરળ હજુ પણ દેશમાં સૌથી વધુ અસરગ્રસ્ત રાજ્ય છે. અહીં કોરોનાના કુલ 1950 કેસ છે. છેલ્લા 24 કલાકમાં તેમાં 144નો વધારો જોવા મળ્યો છે. આ પછી ગુજરાતમાં 822, દિલ્હીમાં 686, મહારાષ્ટ્રમાં 595, કર્ણાટકમાં 366, ઉત્તર પ્રદેશમાં 219, તમિલનાડુમાં 194, રાજસ્થાનમાં 132 અને હરિયાણામાં 102 કેસ મળી આવ્યા છે.