PM Kisan Yojana: ખેડૂતો માટે ખુશખબર! આવતીકાલે રિલીઝ થશે 21મો હપ્તો, ગુજરાતના ખેડૂતોના ખાતામાં જમા થશે ₹986 કરોડ
ગાંધીનગરમાં CM ભૂપેન્દ્ર પટેલની અધ્યક્ષતામાં યોજાશે ભવ્ય કાર્યક્રમ, PM મોદી તામિલનાડુથી દેશના 9 કરોડ ખેડૂતોને આપશે ભેટ.
PM Kisan Yojana update: દેશના અન્નદાતાઓ માટે આવતીકાલનો દિવસ એટલે કે 19 નવેમ્બર અત્યંત મહત્વપૂર્ણ સાબિત થવાનો છે. વડાપ્રધાન નરેન્દ્ર મોદી તામિલનાડુના કોઈમ્બતુર ખાતેથી પ્રધાનમંત્રી કિસાન સન્માન નિધિ (PM-KISAN) યોજનાનો 21મો હપ્તો જાહેર કરશે. આ રાષ્ટ્રીય કાર્યક્રમ અંતર્ગત દેશભરના કરોડો ખેડૂતોને આર્થિક સહાય મળશે. ગુજરાત માટે પણ આ ગૌરવપૂર્ણ ક્ષણ છે, કારણ કે રાજ્યના 49.31 લાખથી વધુ ખેડૂત પરિવારોને આ યોજના હેઠળ ₹986 કરોડથી વધુની માતબર રકમ સીધી તેમના બેંક ખાતામાં પ્રાપ્ત થશે. આ નિમિત્તે ગાંધીનગર ખાતે મુખ્યમંત્રીની ઉપસ્થિતિમાં વિશેષ રાજ્ય કક્ષાનો કાર્યક્રમ યોજાશે.
PM મોદી કોઈમ્બતુરથી કરાવશે ધનવર્ષા
વડાપ્રધાન નરેન્દ્ર મોદી આવતીકાલે, તારીખ 19 નવેમ્બરના રોજ તામિલનાડુના કોઈમ્બતુરથી PM-KISAN યોજનાનો 21મો હપ્તો રિલીઝ કરીને દેશના ખેડૂતોને મોટી ભેટ આપશે. એક જ ક્લિક સાથે, સમગ્ર દેશના 9 કરોડથી વધુ ખેડૂતોના ખાતામાં કુલ ₹18,000 કરોડથી વધુની સહાય જમા કરવામાં આવશે. આ કાર્યક્રમ દરમિયાન વડાપ્રધાન દેશભરના ખેડૂતો સાથે વર્ચ્યુઅલ માધ્યમથી સંવાદ સાધશે અને તેમને વિશેષ સંબોધન કરશે, જેમાં કૃષિ ક્ષેત્રના વિકાસ અને ખેડૂતોના ઉત્થાન અંગે ચર્ચા કરવામાં આવશે.
ગાંધીનગરમાં રાજ્ય કક્ષાનો કાર્યક્રમ
આ રાષ્ટ્રીય ઘટનાના અનુસંધાને ગુજરાતના પાટનગર ગાંધીનગર ખાતે પણ એક ભવ્ય રાજ્ય કક્ષાના કાર્યક્રમનું આયોજન કરવામાં આવ્યું છે. આ કાર્યક્રમ રાજ્યના મુખ્યમંત્રી ભૂપેન્દ્ર પટેલની અધ્યક્ષતામાં યોજાશે. આ પ્રસંગે રાજ્યના નાયબ મુખ્યમંત્રી હર્ષ સંઘવી, કૃષિ મંત્રી જીતુભાઈ વાઘાણી અને કૃષિ રાજ્ય મંત્રી રમેશભાઈ કટારા ખાસ ઉપસ્થિત રહેશે અને ખેડૂતોનો ઉત્સાહ વધારશે.
ગુજરાતના ખેડૂતોને બમ્પર ફાયદો
રાજ્યના કૃષિ મંત્રી જીતુભાઈ વાઘાણીના જણાવ્યા અનુસાર, 21મા હપ્તા હેઠળ ગુજરાતના ખેડૂતોને મોટો ફાયદો થવા જઈ રહ્યો છે. રાજ્યના અંદાજિત 49.31 લાખથી વધુ ખેડૂત પરિવારોને કુલ ₹986 કરોડથી વધુની સહાય સીધી તેમના બેંક એકાઉન્ટમાં ટ્રાન્સફર કરવામાં આવશે. આ રકમ ખેડૂતોને તેમના કૃષિ કાર્યો અને જીવનનિર્વાહમાં મદદરૂપ થશે.
સહાય અને મંજૂરી પત્રોનું વિતરણ
ગાંધીનગર ખાતે યોજાનારા આ સમારોહમાં માત્ર પીએમ કિસાન યોજના જ નહીં, પરંતુ રાજ્ય સરકારની અન્ય કલ્યાણકારી યોજનાઓનો લાભ પણ આપવામાં આવશે. મુખ્યમંત્રી ભૂપેન્દ્ર પટેલના હસ્તે કૃષિ અને બાગાયત વિભાગની વિવિધ યોજનાઓના લાભાર્થી ખેડૂતોને સહાય અને મંજૂરી પત્રોનું વિતરણ કરવામાં આવશે. સરકારનો ઉદ્દેશ્ય ટેકનોલોજી અને આર્થિક સહાય દ્વારા ખેડૂતોને સશક્ત બનાવવાનો છે.
ટોપ સ્ટોરી
ટ્રેન્ડિંગ સમાચાર
