પાલડીમાં રેડ મારી પોલીસે સટ્ટાકિંગ જીતુ થરાદને ઝડપ્યો, IPL કૌભાંડ સાથે શું છે કનેક્શન

અમદાવાદઃ સટ્ટાકિંગ જીતુ થરાદને અમદાવાદ ક્રાઇમબ્રાન્ચે ઝડપી લીધો હતો. સાયબર ક્રાઇમ બ્રાન્ચે પાલડીના મહાલક્ષ્મી ચાર રસ્તા ખાતે આવેલા સપનેય કોમ્પલેક્ષના ચોથા માળે દરોડો પાડી જીતુ થરાદ વરુણ સોલંકી સહિતાના 6 સાગરીતોને ક્રિકેટ મેચ પર સટ્ટો રમાડતા ઝડપી લીધા હતા.

જ્યારે પોલીસે રેડ કરી ત્યારે જીતુએ પોલીસને કહ્યું કે સાહબ મેં તો સિર્ફ બેઠને આયા થા. જો કે પોલીસે જીતુની એક વાત ન માની આખરે 18 લોકો સાથે જીતુ સામે કાયદેસરની કાર્યવાહી કરી વધુ તપાસ હાથ ધરી હતી.

સૂત્રોના જણાવ્યા મુજબ પોલીસે રેડ કરી ત્યારે અનિલ નવકાર નામનો શખ્સ ભલામણ માટે દોડી આવ્યો અને મોડી રાત સુધી ભલામણોનો દોર ચાલ્યો હતો. જીતુ થરાદ ક્રિકેટ સટ્ટામાં મોટુ માથુ ગણાય છે. 2013માં આઇપીએલ કૌભાંડમાં જીતુ થરાદનુ નામ બહાર આવ્યું હતું.

પોલીસે જીતુ થરાદ સહિત 18 લોકોની ધરપકડ કરી છે જ્યારે મુદ્દામાલમાં 10થી વધુ કોમ્પ્યુટર, દસેક લાખ રોકડા જપ્ત કર્યા હતા. સૂત્રોના જણાવ્યા મુજબ ઓફિસના પાંચ માલીક છે અને મુખ્ય માલિક દુબઈ રહે છે.

આ રેડમાં પોલીસને ચેઈન નાઈન નામની શેરબજારની ઓફિસની તપાસમાં તેમાં ડબ્બા ટ્રેડીંગ ચલાવતાં રશેષ શાહની પણ ધરપકડ કરી હતી.