ગાંધીનગર શરમસાર: 5 વર્ષની માસૂમ પર દુષ્કર્મ! રાત્રે ઉઠાવી જઈને પીંખી નાખી, 4 નરાધમો ઝડપાયા
Gandhinagar crime news: સિવિલ હોસ્પિટલમાં જિંદગી સામે જંગ લડી રહી છે દીકરી: રાત્રે ઉઠાવી જઈને આચર્યું હીન કૃત્ય, બાળ આયોગે તપાસના આદેશ આપ્યા.
Gandhinagar crime news: ગુજરાતનું પાટનગર ગાંધીનગર શરમસાર થયું છે. રોજીરોટી માટે સૌરાષ્ટ્રથી આવેલા એક શ્રમજીવી પરિવારની માત્ર 5 વર્ષની માસૂમ બાળકી સાથે સામૂહિક દુષ્કર્મની હચમચાવી દેનારી ઘટના સામે આવી છે. નરાધમો રાત્રિના અંધકારમાં બાળકીને ઉઠાવી ગયા હતા અને પોતાની હવસ સંતોષ્યા બાદ તેને પરત મૂકી ગયા હતા. હાલ પીડિત બાળકીની હાલત ગંભીર હોવાથી તેને સિવિલ હોસ્પિટલમાં સારવાર માટે ખસેડવામાં આવી છે. આ મામલે પોલીસે ત્વરિત કાર્યવાહી કરીને 4 થી વધુ શંકાસ્પદ ઈસમોની અટકાયત કરી પૂછપરછ હાથ ધરી છે.
ગાંધીનગર શહેર, જેને આપણે સલામત અને શાંત શહેર માનીએ છીએ, ત્યાં એક હૃદયદ્રાવક કિસ્સો પ્રકાશમાં આવ્યો છે. મૂળ સૌરાષ્ટ્રનો એક શ્રમજીવી પરિવાર અહીં મજૂરી કામ કરીને ગુજરાન ચલાવતો હતો. મોડી રાત્રે જ્યારે પરિવાર સૂતો હતો, ત્યારે હવસખોરોએ આ પરિવારની 5 વર્ષની ફૂલ જેવી બાળકીને નિશાન બનાવી હતી. નરાધમો બાળકીને ચૂપચાપ ઉઠાવી ગયા હતા અને એકાંત જગ્યાએ લઈ જઈને તેની સાથે પાશવી કૃત્ય આચર્યું હતું. આ ઘટનાએ માનવતાને પણ લજવી દીધી છે.
પોતાની રાક્ષસી વૃત્તિ સંતોષ્યા બાદ આરોપીઓ બાળકીને ફરી ત્યાં જ મૂકીને ફરાર થઈ ગયા હતા. દુષ્કર્મને કારણે માસૂમ બાળકીની તબિયત લથડવા લાગી હતી અને તેની હાલત જોઈને પરિવારજનો ગભરાઈ ગયા હતા. તેમણે તાત્કાલિક બાળકીને સારવાર અર્થે ગાંધીનગર સિવિલ હોસ્પિટલમાં ખસેડી હતી, જ્યાં હાલ ડોક્ટરોની ટીમ તેની સારવાર કરી રહી છે. આ બનાવની જાણ થતાં જ ઉચ્ચ પોલીસ અધિકારીઓનો કાફલો ઘટનાસ્થળે અને હોસ્પિટલે દોડી ગયો હતો.
પોલીસે આ કેસની ગંભીરતાને ધ્યાનમાં લઈને તાત્કાલિક તપાસનો ધમધમાટ શરૂ કર્યો છે. ઘટનાસ્થળેથી પુરાવા એકત્ર કરવા માટે FSL (ફોરેન્સિક સાયન્સ લેબોરેટરી) ની મદદ લેવામાં આવી છે. અત્યાર સુધીની તપાસના આધારે પોલીસે 4 થી 5 જેટલા શંકાસ્પદ શખ્સોની અટકાયત કરી લીધી છે અને તેમની કડક પૂછપરછ કરવામાં આવી રહી છે. પોલીસનો દાવો છે કે ટૂંક સમયમાં જ મુખ્ય આરોપીઓને જેલના સળિયા પાછળ ધકેલી દેવામાં આવશે.
આ ગંભીર ઘટનાના પડઘા રાજ્યભરમાં પડ્યા છે. ગુજરાત રાજ્ય બાળ આયોગના ચેરમેન ધર્મિષ્ઠા ગજ્જરે પણ આ ઘટનાની કડક નોંધ લીધી છે. તેમણે સિવિલ હોસ્પિટલની મુલાકાત લીધી હતી અને પીડિત બાળકી તેમજ તેના પરિવારજનોને મળીને સાંત્વના પાઠવી હતી. તેમણે દીકરીઓ પર વધી રહેલી આવી ઘટનાઓ અંગે ભારે ચિંતા વ્યક્ત કરી હતી અને તંત્રને કડક કાર્યવાહી કરવા સૂચના આપી હતી.
ઘટનાસ્થળની મુલાકાત બાદ એક ચોંકાવનારી હકીકત પણ સામે આવી છે. શ્રમજીવી પરિવાર જ્યાં વસવાટ કરે છે, ત્યાં પાયાની સુવિધા ગણાતી વીજળી (લાઈટ) ની પણ વ્યવસ્થા નથી. અંધકારનો લાભ લઈને જ આરોપીઓએ આ કૃત્યને અંજામ આપ્યો હોવાનું મનાય છે. બાળ આયોગે શ્રમજીવી પરિવારોની સુરક્ષા અને રહેણાંક વિસ્તારમાં લાઈટ જેવી સુવિધાઓના અભાવ અંગે પણ સ્થાનિક તંત્રનું ધ્યાન દોર્યું છે.
બાળ આયોગના ચેરમેને ખાતરી આપી છે કે પીડિત પરિવારને સરકાર તરફથી તમામ જરૂરી મદદ પૂરી પાડવામાં આવશે. સાથે જ તેમણે સમાજના જાગૃત નાગરિકોને અપીલ કરી છે કે આવા દૂષણોને ડામવા માટે લોકોએ પણ આગળ આવવું પડશે. આરોપીઓને ફાંસી જેવી કડક સજા મળે તે માટે કાનૂની રાહે તમામ પ્રયાસો કરવામાં આવશે તેવી ખાતરી તેમણે પરિવારને આપી હતી.
ટોપ સ્ટોરી
ટ્રેન્ડિંગ સમાચાર
