Geniben Thakor: ગેનીબેન ઠાકોર દિલ્હીમાં, રાહુલ અને સોનિયા ગાંધી સાથે કરી મુલાકાત, તસવીરો આવી સામે

Banaskantha Seat, Geniben Thakor: દેશમાં લોકસભા ચૂંટણી પૂર્ણ થઇ ગઇ છે. આજે દિલ્હીમાં કોંગ્રેસની સંસદીય દળની બેઠક મળી હતી, આ બેઠકમાં સમગ્ર ભારતમાં ચૂંટણીની હાર જીતને લઇને ચર્ચા થઇ હતી

(તસવીર- એબીપી લાઇવ)

Banaskantha Seat, Geniben Thakor: દેશમાં લોકસભા ચૂંટણી પૂર્ણ થઇ ગઇ છે. આજે દિલ્હીમાં કોંગ્રેસની સંસદીય દળની બેઠક મળી હતી, આ બેઠકમાં સમગ્ર ભારતમાં ચૂંટણીની હાર જીતને લઇને ચર્ચા થઇ હતી. આ બેઠકમાં ગુજરાતના એકમાત્ર કોંગ્રેસી સાંસદ ગેનીબેન ઠાકોર ઉપસ્થિત રહ્યાં હતા. આ દરમિયાન ગેનીબેન ઠાકોરે કોંગ્રેસના મોવડી મંડળ સાથે મુલાકાત કરી હતી. જેની તસવીરો હાલમાં સામે આવી છે. 

આજે દિલ્હીમાં કોંગ્રેસ પાર્ટીની સંસદીય દળની બેઠક યોજાઇ હતી, આ બેઠકમાં કોંગ્રેસના દિગ્ગજ નેતાઓ સાથે ગેનીબેન ઠાકોરે પણ હાજરી આપી હતી. બેઠક બાદ ગેનીબેન ઠાકોરે કોગ્રેસના રાષ્ટ્રીય અધ્યક્ષ મલ્લિકાર્જૂન ખડગે સાથે મુલાકાત કરી હતી, આની સાથે સાથે ગેનીબેન ઠાકોર સોનિયા ગાંધી, પ્રિયંકા ગાંધી અને રાહુલ ગાંધીને પણ મળ્યા હતા. ગેનીબેન ઠાકોર હાલમાં દિલ્હીમાં છે, જ્યાં આ બેઠકમાં ગુજરાત કોંગ્રેસ તરફથી ગુજરાત કોંગ્રેસ પ્રદેશ પ્રમુખ શક્તિસિંહ ગોહિલ અને ગુજરાત વિધાનસભાના કોંગ્રેસના નેતા અમિત ચાવડા પણ હાજર રહ્યાં હતા.

બનાસકાંઠામાં ગેનીબેનની ભવ્ય જીત, બીજેપીના રેખા ચોધરીને હરાવ્યા હતા -  
આ લોકસભા ચૂંટણી 2024માં બનાસકાંઠા બેઠક પર કોંગ્રેસના ઉમેદવાર ગેનીબેન ઠાકોરને 67,1883 મત મળ્યા છે, અને ભાજપના ઉમેદવાર ડૉ. રેખાબેન ચૌધરીને 64,1477 મત મળ્યા છે. આ ચૂટણીમાં ગેનીબેન ઠાકોરે ભાજપના ઉમેદવારને 30,406 મતોની લીડથી હરાવી દીધા અને પ્રથમવાર બનાસકાંઠા બેઠક પર કબજો કર્યો. આ સાથે ગુજરાતમાં કોંગ્રેસી કાર્યકર્તાઓમાં નવો જુસ્સો અને જોમ ભરાયો છે. 

ગુજરાતમાં ભાજપની ક્લિન સ્વીપ પર કોંગ્રેસના મહિલા ઉમેદવાર ભારે પડ્યા છે. બનાસકાંઠાના કોંગ્રેસ ઉમેદવાર ગેનીબેન ઠાકોરે 30 હજાર 406 મતોથી ભાજપના રેખાબેન ચૌધરીને હરાવ્યા છે. ખાસ વાત છે કે, કોંગ્રેસના ગેનીબેન ઠાકોરે એકલા હાથે ભાજપની હેટ્રિક રોકી લીધી છે. 

બનાસકાંઠા બેઠક પર વિજયી થતા ગુજરાત કોંગ્રેસમાં એક નવો પ્રાણ ફૂંકાયો છે અને 62 વર્ષ બાદ બનાસકાંઠાને મહિલા સાંસદ મળ્યા છે. મતગણતરીમાં છેલ્લી મિનિટ સુધી ઘણા ચઢાવ આ બેઠક પર જોવા મળ્યા હતા. આખરે ભાજપના ઉમેદવાર રેખાબેન ચૌધરીને હારનો સમાનો કરવો પડ્યો હતો. પોતાને બનાસના બેન ગણાવી ચૂંટણીજંગમાં ઉતરેલા ગેનીબેન ઠાકોરનો મુકાબલો ના માત્ર ભાજપના રેખાબેન ચૌધરી સામે હતો, પરંતુ ભાજપનું મજબૂત સંગઠન અને બનાસકાંઠા જિલ્લાના સહકારી સંગઠન  સામે એટલી જ ટક્કર હતી, પણ આખરે ગેનીબેન ઠાકોરે તમામને માત આપી દીધી. ખાસ વાત છે કે, જીત બાદ ગેનીબેન ઠાકોરે વિરોધીઓ વિરુદ્ધ હુંકાર પણ કર્યો હતો કે, મતદારોને કોઈ હેરાન ના કરતા, હું મતદારોની સાથે છું.