ગ્રામ પંચાયત ચૂંટણી: ભાજપ અને કોંગ્રેસ બંને પક્ષોએ શું કર્યો દાવો, જાણો વિગત

ભરતસિંહ સોલંકીએ જણાવ્યું કે, 2015માં કોંગ્રેસે 23 જેટલી જીલ્લા પંચાયત અને મોટાભાગની તાલુકા પંચાયત પર વિજય મેળવ્યો હતો. તેમજ તાજેતરની વિધાનસભા ચૂંટણીમાં પણ અમે મોટાભાગની ગ્રામ્ય બેઠકો પર કબજો મેળવ્યો છે. આ હારના કારણે ભાજપ હવે ખેડૂતો વિરુદ્ધ કિન્નાખોરી રાખી રહ્યું છે અને તેમની કનડગત કરી રહ્યું છે.

ગાંધીનગરઃ ગુજરાતમાં હાલમાં જ 1,127 પંચાયતની ચૂંટણી પૂર્ણ થઈ ત્યારે મંગળવારે ભાજપ અને કોંગ્રેસ બંને દ્વારા પોતાના સમર્થિત ઉમેદવારને વધુ વોટ મળ્યાં હોવાનો દાવો કરી રહ્યા છે. રાજ્યમાં 1,423 ગ્રામ પંચાયતમાં ચૂંટણી જાહેર થઈ હતી જે પૈકી 1,127માં ચૂંટણી યોજાઈ હતી જ્યારે બાકીની પંચાયતો સમરસ જાહેર થઈ હતી. જેમાં મંગળવારે ગ્રામ પંચાયતની ચૂંટણીની મતગણતરી કરવામાં આવી હતી.