જમ્મુ-કાશ્મીરમાં PAK તરફથી ફાયરિંગ યથાવત, સવારથી અત્યાર સુધી 4 નાગરિકોના મોત થયા

આ પહેલા મંગળવારે પણ પાકિસ્તાને સીમા પારથી મોર્ટાર ફેંક્યા અને એલઓસી સાથે જોડાયેલી અરનિયા અને આરએસપુરા સેક્ટરના રહેવાસી વિસ્તારોને નિશાન બનાવવામાં આવ્યા. આ હુમલામાં એક મહિલાનું મોત થઇ ગયું હતું, જ્યારે અખનુરના સેરી પલ્લી ગામમાં એક માસૂમને ગોળી વાગવાથી મૃત્યુ થઇ હતી.

પોલીસ અનુસાર, પાકિસ્તાન તરફથી આખી રાત હીરાનગર, સાંબા, રામગઢ, અરનિયા અને આરએસપુરા સેક્ટરમાં ફાયરિંગ કરાયું. આંતરરાષ્ટ્રીય બોર્ડરની પાંચ કીમી.ની આસપાસ બધી સરકારી અને પ્રાઇવેટ સ્કૂલોને બંધ કરી દેવામાં આવી છે. સતત ફાયરિંગને જોતા આરએસપુરા, અરનિયા અને સાંબા સેક્ટરમાં વધુ બૂલેટપ્રૂફ વાહનોને મોકલવામાં આવ્યા છે. પાકિસ્તાન 82MMના મોર્ટાર ફેંકી રહ્યું છે.

પાકિસ્તાને બીએસએફની લગભગ 40 પૉસ્ટને નિશાન બનાવી છે. ગઇ રાત્રે સતત સીમા પારથી ગોળા દારુગોળા ફેંકવામાં આવ્યા. આ ફાયરિંગમાં 4 નાગરિકો ઘાયલ થયા છે, જેમાં ત્રણ હીરાનગર સેક્ટરના લોંદી ગામના છે, જ્યારે એક વ્યક્તિ અરનિયા સેક્ટરમાં ઘાયલ થયો છે.

બુધવારે સવારે કઠુઆ જિલ્લાથી હીરાનગરમાં સીમા પારથી ફાયરિંગ કરવામાં આવ્યું, આ દરમિયાન અહીં લોંદી વિસ્તારમાં રામપાલ નામના એક વ્યક્તિને ગોળી વાગી, જેને સારવાર માટે જમ્મુની સરકારી હોસ્પીટલમાં લઇ જવાયો ત્યાં તેનું મોત થયું હતું.

જમ્મુ-કાશ્મીરઃ નિયંત્રણ રેખા (LoC) પર પાકિસ્તાન દિવસ રાત સીઝફાયરનું ઉલ્લંઘન કરી રહ્યું છે. અરનિયા અને સાંબા બાદ હવે આરએસપુરા સેક્ટરમાં પણ પાકિસ્તાની રેન્જર્સ દ્વારા ફાયરિંગ થઇ રહ્યું છે. જેમાં આજે સવારથી અત્યાર સુધી 4 નાગરિકોના મોત થઇ ચૂક્યા છે.